Kabtang 1—Pagkondukta nin Progresibong mga Pag-adal sa Biblia
Ano an Pag-adal sa Biblia?
1 Sa bilog na kinaban, mga anom na milyon na pag-adal sa Biblia an kinokonduktahan kan banwaan nin Dios kada bulan. Paagi sa paggamit nin epektibong mga pamamaagi nin pagtotokdo, matatabangan niato an mga inaadalan na ini sa Biblia na umoswag sagkod sa pagdusay asin bautismo patin magin “biyong kualipikado na magtokdo sa iba.” (2 Tim. 2:2) Boot daw nindong tabangan an inaadalan nindo na gumibo nin siring na pag-oswag? Poon sa isyung ini, itatampok kan An Satong Ministeryo sa Kahadean an serye nin mga artikulo na magpapaliwanag kan pundamental na mga aspekto sa pagkondukta nin progresibong mga pag-adal sa Biblia.
2 Kun Noarin Irereport an Pag-adal sa Biblia: Kun igwa kamo nin regular asin sistematikong pag-oolay sa Biblia, minsan ngani halipot, na ginagamit an Biblia kaiba an saro sa rekomendadong mga publikasyon, kamo nagkokondukta na nin pag-adal sa Biblia. Totoo ini dawa kun an pag-adal ginigibo sa may pinto kan kagharong o paagi sa telepono. Puede nang ireport an pag-adal kun iyan nakonduktahan na nin duwang beses pakatapos na idemonstrar an areglo sa pag-adal asin kun naniniwala kamo na magpapadagos an pag-adal.
3 An brosyur na Kahagadan asin an librong Kaaraman mga publikasyon na ginagamit sa pagkondukta nin dakol na pag-adal sa Biblia. Pagkatapos kaiyan, kun risang-risa na an saro nag-ooswag, dawa maluway, asin na nagtatalubo an pag-apresyar nia sa saiyang nanonodan, kun siring puedeng ipadagos an pag-adal sa librong Nagkakasararo sa Pagsamba. An brosyur na Puede Kang Magin Katood nin Dios! puedeng gamiton sa pakikipag-adal sa mga tawo na limitado an inadalan o kakayahan sa pagbasa.
4 An pag-adal sa Biblia haloy nang epektibo sa pagtabang sa minilyon na magin tunay na mga disipulo ni Jesu-Cristo. (Mat. 28:19, 20) Paagi sa pag-aplikar kan mga suhestion na itatao sa masunod na mga artikulo kan seryeng ini, makakapagkondukta kamo nin progresibong pag-adal sa Biblia.