An Librong Itinotokdo kan Biblia—Pangenot Niatong Pantabang sa Pag-adal sa Biblia
1 Napalukso nanggad an puso niato na maheling an pagluwas kan librong Ano Man Nanggad an Itinotokdo kan Biblia? sa “Diosnon na Pagkuyog” na Pandistritong Kombension! An mga delegado magayagayang nag-ako nin personal na kopya pagkatapos kan programa sa Sabado. Paano daw gagamiton an bagong pantabang na ini sa pagtotokdo? Dinisenyo iyan tangani na magin pangenot niatong pantabang sa pag-adal sa Biblia. Minsan ngani itatampok nguna an bagong libro bilang alok sa Marso, ineenkaminar an mga parahayag na ponan tolos-tolos an paggamit kaiyan tangani na makapoon asin makapagkondukta nin mga pag-adal sa Biblia.
2 Mga Pag-adal sa Biblia sa Presente: An mga parahayag na nagkokondukta nin mga pag-adal sa Biblia sa librong Kaaraman o brosyur na Kahagadan maninigong gumamit nin marahay na paghusgar sa pagdesisyon kun paano asin kun noarin poponan an paggamit kan bagong publikasyon durante kan pag-adal. Kun naponan kasuarin pa sana an sarong pag-adal, puede na nindong ponan an bagong libro. Kun harayo na kamo sa librong Kaaraman, puede nindong ipadagos an pag-adal sa kapitulo kan librong Itinotokdo kan Biblia na kapareho an tema. Kun matatapos na kamo sa librong Kaaraman, puede kamong magdesisyon na taposon na sana an publikasyon na iyan.
3 Daing duwa-duwa na kita gabos dakol an kamidbid na makikinabang sa pag-adal kan librong Itinotokdo kan Biblia. Taano ta dai alokan an lambang saro nin pag-adal sa Biblia sa sistematikong pantabang na ini sa pag-adal? Halimbawa, an mga nag-adal na sa brosyur na Kahagadan o librong Kaaraman alagad dai nag-oswag pasiring sa pagdusay asin bautismo tibaad boot na ipagpadagos an pag-adal ninda na ginagamit an bagong libro. Puedeng magdesisyon an mga magurang na gamiton an publikasyon na iyan mantang itinatao ninda sa saindang mga aki an kaaraman manongod sa kabotan nin Dios.—Col. 1:9, 10.
4 Pag-adal sa Ikaduwang Libro: Igwa daw nin areglo para sa inaadalan sa Biblia na mag-adal sa ikaduwang libro pagkatapos kan Ano Man Nanggad an Itinotokdo kan Biblia? Igwa. Kun risang-risa na an inaadalan sa Biblia nag-ooswag, minsan ngani maluway, asin inaapresyar nia an saiyang nanonodan, puedeng ipagpadagos an pag-adal sa Biblia na ginagamit an librong Nagkakasararo sa Pagsamba sa Iyo Sanang Tunay na Dios. Kompiado kita na an librong Itinotokdo kan Biblia magigin mapuersang pantabang na itinao sa sato mantang ginigibo niato an sugo na gumibo nin mga disipulo.—Mat. 28:19, 20.