Hapot

◼ Anong duwang publikasyon an maninigong gamiton sa pagkondukta nin pag-adal sa Biblia sa mga interesado?

An librong Itinotokdo kan Biblia iyo an satong pangenot na kasangkapan sa pagpoon asin pagkondukta nin mga pag-adal sa Biblia. Minsan ngani puede man na gumamit nin ibang publikasyon sa pagpoon nin pag-adal, siring baga nin angay na pulyeto, maninigong gumibo nin mga paghihingoa na ibalyo iyan sa librong Itinotokdo kan Biblia sa pinakamadaling panahon na mapupuede. Marahayon na mga resulta an nakamtan paagi sa paggamit kan librong Itinotokdo kan Biblia tanganing magpoon nin mga pag-adal sa Biblia.

Kun matapos na an librong Itinotokdo kan Biblia asin nag-ooswag an inaadalan sa Biblia, kun siring maninigo nang pag-adalan an librong Nagkakasararo sa Pagsamba. (Col. 2:7) An pahina 2 nagpapaliwanag kan katuyohan kan librong iyan: “Inandam an librong ini tanganing tabangan an gabos na siring na tawo na pahiwason asin pararomon an saindang pakasabot sa Tataramon nin Dios asin na mas lubos na iaplikar iyan sa saindang buhay.”

Kun an inaadalan sa Biblia kualipikado na sa bautismo bago matapos an duwang libro, maninigong ipadagos an pag-adal sagkod na matapos an ikaduwang libro. Minsan ngani bautisado na an inaadalan sa Biblia, an nagkokondukta puedeng magreport kan oras, pagdalaw liwat, asin pag-adal sa Biblia. Puede man na magreport kan oras an parahayag na kaiba kan nagkokondukta asin nakikikabtang sa pag-adal.