Hapot

◼ Gurano kahaloy maninigo niatong konduktahan nin pag-adal an sarong progresibong tinotokdoan sa Biblia?

Pinakamarahay na padagos na konduktahan nin pag-adal an sarong progresibong tinotokdoan sa Biblia sagkod na matapos nia an duwang publikasyon—an Ano Man Nanggad an Itinotokdo kan Biblia? asin “Magdanay Kamo sa Pagkamoot nin Dios.” Totoo ini dawa ngani nabautismohan na an tinotokdoan sa Biblia bago pa matapos an duwang librong iyan. Pakabautismo sa saiya, puede niatong padagos na ireport an oras, pagdalaw liwat, asin pag-adal sa Biblia. Kun may kaiba kitang sarong parahayag asin nagpapartisipar sia sa pag-adal, puede man niang ireport an oras.—Helingon an Marso 2009 na An Satong Ministeryo sa Kahadean, pahina 2.

Mahalaga para sa mga bagohan na magkaigwa nin matibay na pundasyon sa katotoohan bago pondohon an pagkondukta nin pag-adal. Sinda kaipuhan na magin “nakagamot” ki Cristo asin ‘marigon sa pagtubod’ tanganing matagalan an mga pagbalo na siertong mapapaatubang sa sainda. (Col. 2:6, 7; 2 Tim. 3:12; 1 Ped. 5:8, 9) Saro pa, tanganing epektibong makatokdo sa iba, sinda dapat na igwa nin “tamang kaaraman dapit sa katotoohan.” (1 Tim. 2:4) Paagi sa pagtapos sa duwang libro, tinatabangan niato an mga tinotokdoan sa Biblia na magin marigon sa paglakaw sa “dalan na pasiring sa buhay.”—Mat. 7:14.

Bago an saro aprobaran para sa bautismo, maninigong siertohon kan mga magurang sa kongregasyon na malinaw niang nasasabotan an pangenot na katokdoan sa Biblia asin na sia namumuhay kaoyon kaiyan. Sinda maninigo na magin nangorognang maingat kun rinerepaso an sarong tinotokdoan sa Biblia na dai pa tapos sa enot na pinag-aadalan na libro. Kun an saro dai pa kualipikado sa bautismo, sisiertohon ninda na sia matawan nin kinakaipuhan na personal na tabang tanganing makualipikar sia sa bautismo sa maabot na panahon.—Helingon an Organisado sa Paggibo kan Kabotan ni Jehova, pahina 217-218.

[Blurb sa pahina 2]

Mahalaga para sa mga bagohan na magkaigwa nin matibay na pundasyon sa katotoohan