Naghahagad daw Kamo nin mga Referral?

Kun sa presente nagkokondukta kamo nin pag-adal sa Biblia, taano ta dai hapoton an inaadalan sa Biblia kun may siisay man sa saiyang mga katood, paryente, o kamidbid na maoogma man na mag-adal kan itinotokdo kan Biblia? Sa parate masambit sia nin nagkapirang ngaran. Kun itinotogot kan inaadalan sa Biblia, puede nindong sambiton an ngaran nia pagdalaw nindo sa mga indibiduwal na iyan tangani na mag-alok nin pag-adal sa Biblia. Puede nindong sabihon, “Ikinakaogma ni [ngaran kan inaadalan sa Biblia] an pag-adal sa Biblia, asin iniisip nia na kamo man tibaad gustong makinabang sa samong programa nin pag-adal sa Biblia na mayo nin bayad.” Dangan idemonstrar sa halipot kun paano kinokonduktahan an pag-adal, na ginagamit an librong Itinotokdo kan Biblia.

Kun may inaadalan kamo sa Biblia na marahay an pag-oswag, puede nindo siang enkaminaron na sabihon an areglo nin pag-adal sa mga katood asin kapamilya na tibaad interesado. Puede nia sindang imbitaran na makiiba sa saiyang pag-adal. O kun iyan bakong kombenyente, puede niang iareglo na makipaghelingan kamo sa sainda tangani na idemonstrar an areglo nin pag-adal. An paggibo kaini maenkaminar sa inaadalan sa Biblia na ponan na sabihon sa iba an saiyang kaaraman sa Biblia.

An mga dinadalaw nindo nin regular tibaad magtao man saindo nin mga referral, dawa kun sinda mismo dai pa minaako nin regular na pag-adal sa Biblia. Sa pag-alok nindo sa sainda nin kopya kan librong Itinotokdo kan Biblia, puede sanang ihapot nindo, “May midbid daw kamo na maoogmang magkaigwa man nin kopya kan publikasyon na ini?”

Huli sa pagkaapurado kan mga panahon, gusto niatong gamiton an gabos na paaging mapupuede tangani na tabangan an mga tawo na madangog asin akoon an maogmang bareta. Naghahagad daw kamo nin mga referral?