Tabang sa Igong Panahon
1 Huli sa saiyang pagmakolog sa kongregasyon, si Jesus perming magtatao nin ‘tabang sa igong panahon.’ (Heb. 4:16) An kadaklan sa tabang na ini itinatao paagi sa “balaog na mga lalaki,” siring kan ipinanuga sa Efeso 4:8, 11, 12. An saro sa balaog na iyan iyo an paraataman sa paglilingkod sa kada kongregasyon.
2 Sa anong mga paagi na makatatabang sato an paraataman sa paglilingkod? May nagkapira: (1) Sia naghihingoa na permi niatong isaisip an halaga kan paghuhulit asin paggibo nin disipulo. (2) Siniseguro nia na an marahay na organisasyon asin pangengenot itinatao paagi sa mga Pag-adal sa Libro kan Kongregasyon. (3) Nag-aareglo sia nin personal na tabang tanganing mapaoswag an pagkaepektibo niato bilang ministro.
MGA PAGSONGKO KAN PARAATAMAN SA PAGLILINGKOD
3 An paraataman sa paglilingkod parateng naaasignaran na mangenot sa Pag-adal sa Libro kan Kongregasyon, alagad sarong beses kada bulan binabayaan nia an saiyang grupo tanganing makiiba sa saro kan ibang grupo nin pag-adal sa libro sa laog nin sarong semana. An katabang nia an minasalida mantang mayo sia. Patienot niang ipinaiisi sa mga nangengenot sa pag-adal an saiyang pagsongko tanganing ikaplano nindang lubos na makinabang sa mga aktibidad kan semana.
4 Sa espesyal na semanang ini, an pag-adal sa libro ginigibo sa laog nin 45 minutos. Ini nagtatao nin 15 minutos sa paraataman sa paglilingkod na makatao nin nakapakokosog na pahayag na may katuyohan na tabangan kitang umoswag sa satong pag-ebanghelyo.
5 An gabos na parahayag sa grupo maninigong magkaigwa nin lubos na kabtang sa paglilingkod sa espesyal na pagsongkong ini. Kun maninigo, puwedeng mag-organisar nin paghuhulit sa banggi sa semanang iyan. An saro sa mga pasohan kan paraataman sa paglilingkod makaiba sa paglilingkod an pinakadakol na parahayag na mapupuwede. Tibaad puwede niang ibanan an nagkapira sa mga pagdalaw liwat asin pag-adal sa Biblia. An siisay man na nagkakaipo nin tabang o pagpakosog sa ministeryo puwedeng dumolok sa saiya sa paghagad nin tabang.
6 Ipakikipag-olay kan paraataman sa paglilingkod an aktibidad kan grupo sa nangengenot sa pag-adal. Rerepasohon an mga areglo sa paglilingkod tanganing maseguro na iyan praktikal asin kombenyente sa gabos. Puwede niang iareglo na songkoon an iregular na mga parahayag kaiba an nangengenot sa pag-adal. Saro pa, puwede niang repasohon kaiba kan nangengenot sa pag-adal an file nin mga report sa pag-adal sa Biblia. Tibaad puwede nindang ibanan an pirang parahayag sa saindang inaadalan sa Biblia asin tumao nin espirituwal na pagpakosog.
7 Sa mga kongregasyon na dakol an grupo nin pag-adal sa libro, magigin mas bihira an pagsongko kan paraataman sa paglilingkod. Kaya an gabos maninigong gumibo nin ekstrang paghihingoa na lubos na makinabang kun sia minasongko. Sa mga kongregasyon na pira sana an Pag-adal sa Libro kan Kongregasyon, an paraataman sa paglilingkod maghihingoa na songkoon an kada grupo nin kisuerra kada anom na bulan.
8 Paagi sa pagtao nin bilog na pusong pagsuportar sa paraataman sa paglilingkod kun sia minasongko sa satong grupo nin pag-adal sa libro, dudugangan niato an satong pagkaepektibo asin makakanompong kita nin orog na kagayagayahan sa ministeryo.