Kun Paano Nagpapaheling nin Personal na Interes an mga Paraataman sa Pag-adal sa Libro kan Kongregasyon
1 An Pag-adal sa Libro kan Kongregasyon dinisenyo tangani na magin “posible na ikatao an orog na personal na atension sa espirituwal na pagtalubo kan lambang indibiduwal. . . . Maheheling digdi an mamomoton na kabootan ni Jehova asin an saiyang mapagpadangat na pagmakolog sa saiyang banwaan.” (om-E p. 75; Isa. 40:11) An paraataman sa pag-adal sa libro igwa nin importanteng papel sa pagtao nin siring na personal na atension.
2 Sa Pag-adal sa Libro: Mantang an mga grupo nin pag-adal sa libro tuyong pinagdadanay na sadit, namimidbid na marhay kan paraataman sa pag-adal sa libro an mga kabilang sa saiyang grupo. (Tal. 27:23) Sa parate igwa nin mga oportunidad na makiasosyar bago o pakatapos kan pag-adal kada semana. Sa laog nin sarong bulan, tibaad mahimo niang makaolay an haros lambang saro na nasa grupo. Ini nakakatabang sa mga kabilang sa pag-adal sa libro na makamate na komportable sa pagdolok sa saiya kun sinda napapaatubang sa mga pagbalo o nagkakaipo nin pagparigon sa boot.—Isa. 32:2.
3 Pinagmamaigotan kan paraataman sa pag-adal sa libro na enkaminaron an gabos sa grupo na makikabtang durante kan pag-adal. An sarong paagi na ginigibo nia ini iyo an pamamayo sa pag-adal sa maboot na paagi. (1 Tes. 2:7, 8) Naghahanap sia nin mga paagi na ilabot an gabos sa pag-orolay, kaiba an mga aki. Kun may nagkapira na nasusupog na magkomento, puede siang magtao nin pribadong tabang paagi sa pag-areglo nin patienot na basahon ninda an sarong teksto o komentohan an sarong partikular na parapo. O puede niang ipaheling sa sainda kun paano makomento sa sadiri nindang tataramon.
4 Kun an katabang kan paraataman sa pag-adal sa libro sarong ministeryal na lingkod, iaareglo kan paraataman na pamayohan nia an pag-adal sarong beses kada duwang bulan. Nagpapangyari ini sa paraataman na maobserbaran an katabang asin magtao nin nakakatabang na mga suhestion. Kanigoan karahay na areglo na matabangan an mga tugang na lalaki na paoswagon an saindang teknika sa pagtotokdo!—Tito 1:9.
5 Sa Ministeryo sa Langtad: An saro sa mayor na paninimbagan kan paraataman sa pag-adal sa libro iyo an pangengenot sa pag-ebanghelyo. (Bil. 27:16, 17) Naggigibo sia nin praktikal na mga areglo para sa paghuhulit bilang grupo asin nagmamaigot na tabangan an gabos sa grupo na makanompong nin kagayagayahan sa saindang ministeryo. (Efe. 4:11, 12) Tangani na magibo ini, ginigibo niang pasohan na ibanan sa paglilingkod an lambang kabilang sa grupo. Nakikipagtabangan man sia sa paraataman sa paglilingkod na iareglo na tabangan kan mas eksperyensiadong parahayag idtong mga gustong paoswagon an nagkapirang aspekto kan saindang ministeryo.
6 Bilang Sarong Mamomoton na Pastor: An paraataman sa pag-adal sa libro interesado sa mga tugang na huli sa saindang kamugtakan kadikit sanang kabtang an nagigibo sa paghuhulit. Sinesegurado nia na naaaraman kan mga limitadong marhay an nagigibo huli sa kagurangan o huli sa pagigin nasa harong na dai makaluwas asin kan mga temporaryong limitado an nagigibo huli sa seryosong helang o danyos an dapit sa probisyon na nagtotogot sa sainda na ireport an oras nin paglilingkod sa langtad na tigki-15 minutos kun dai sinda makapagreport nin kompletong sarong oras sa sarong bulan. (Dedeterminaran kan Komite sa Paglilingkod kan Kongregasyon kun siisay an kualipikado sa probisyon na ini.) Sia nagpapaheling man nin interes sa mga nakaasignar sa grupo na tibaad inaktibo, na nagmamaigot na tabangan sinda na ipagpadagos an saindang aktibidad kaiba kan kongregasyon.—Luc. 15:4-7.
7 Kanigoan an pasasalamat niato sa mamomoton na interes na ipinaheheling kan mga paraataman sa pag-adal sa libro! An personal na atension na itinatao ninda nakakatabang sa ‘gabos na makaabot sa pagkasararo sa pagtubod, sa sokol nin pagtalubo na kapareho kan kapanoan kan Cristo.’—Efe. 4:13.