Kun Paano Kita Natatabangan kan Areglo na Pag-adal sa Libro kan Kongregasyon
1. Paano kita natatabangan kan satong limang semanal na pagtiripon?
1 An kada saro sa satong limang semanal na pagtiripon napapalaen an pagkaareglar asin katuyohan. Pero, gabos iyan mahalaga sa pagtabang sa sato na ‘konsideraron an lambang saro tanganing mandagka sa pagkamoot asin sa marahay na mga gibo.’ (Heb. 10:24, 25) Ano an nagkapirang napapalaen asin kapakipakinabang na aspekto kan areglo na Pag-adal sa Libro kan Kongregasyon?
2. Ano an mga pakinabang sa pakikipagtipon sa mas sadit na grupo sa pag-adal sa libro?
2 Tabang Tanganing Umoswag sa Espirituwal: Sa pangkagabsan, mas dikit na gayo an mga nag-aatender sa pag-adal sa libro kisa sa mga nag-aatender sa iba pang mga pagtiripon kan kongregasyon. Huli kaini, mas pasil na makapatalubo nin mga pakikikatood na ginigikanan nin espirituwal na suporta. (Tal. 18:24) Naghingoa na daw kamo na mamidbid an gabos na nasa saindong grupo nin pag-adal sa libro, na tibaad iniimbitaran an kada saro na ibanan kamo sa ministeryo? An areglo na pag-adal sa libro nagpapangyari man na maaraman kan paraataman sa pag-adal sa libro an napapalaen na mga kamugtakan nin lambang saro na nasa grupo asin na magtao sia sa sainda nin personal na pagparigon sa boot.—Tal. 27:23.
3. Sa paanong paagi na an areglo na pag-adal sa libro nagpapakosog sa boot kan mga inaadalan sa Biblia na magkomento saka mag-atender sa pagtiripon na iyan?
3 Inimbitaran na daw nindo an saindong mga inaadalan sa Biblia na umatender sa pag-adal sa libro kaiba nindo? An mga interesado na nag-aalangan na umatender sa mas darakula niatong pagtiripon tibaad daing gayo masupog na umatender sa mas sadit na pagtiripon, nangorogna sa pribadong harong. Huli sa mamomoton na pag-iribanan, nagigin mas pasil para sa mga hoben asin bagong kaasosyar na makikabtang sa pagkomento. Asin huling mas sadit an grupo, mas dakol an satong oportunidad na magkomento asin mag-omaw ki Jehova.—Sal. 111:1.
4. Sa anong mga paagi puedeng magin kombenyente an areglo na pag-adal sa libro?
4 Sa pangkagabsan an mga pag-adal sa libro ginigibo sa kombenyenteng mga lugar sa bilog na teritoryo. Minsan ngani bakong posible na an gabos ikakaasignar sa lugar na pinakaharani sa sainda, an pag-atender niato sa pag-adal sa libro na dian kita iinasignar tibaad mas dikit na pagbiahe an kaipuhan kisa sa pag-atender niato sa ibang mga pagtiripon kan kongregasyon. An lugar sa pag-adal sa libro puede man na gamiton bilang kombenyenteng tiriponan bago maglingkod sa langtad.
5. Paano kita puedeng matabangan sa ministeryo kan satong paraataman sa pag-adal sa libro?
5 Tabang Para sa Ministeryo: An paraataman sa pag-adal sa libro interesado sa pagtabang sa lambang saro na magkaigwa nin regular, mabunga, asin magayagayang kabtang sa ministeryo. Huli kaini, hinihingoa niang makaibanan sa gibohon an gabos na nasa grupo, na nagtatao nin personal na tabang sa manlaenlaen na aspekto kan ministeryo. Kun nadedepisilan kamo sa sarong partikular na aspekto kan ministeryo, arog baga nin mga pagdalaw liwat, ipaaram iyan sa saindong paraataman sa pag-adal sa libro. Tibaad puede niang iareglo na makaibanan nindo an sarong eksperyensiadong parahayag na yaon sa grupo. Maoswag an saindong kakayahan na magtokdo sa mga pag-adal sa Biblia paagi sa pagtao nindo nin maingat na atension sa marahay na mga paagi nin pagtotokdo kan paraataman sa pag-adal sa libro mantang pinapamayohan nia an pag-adal sa libro.—1 Cor. 4:17.
6. Taano ta maninigo kitang maghingoa na makinabang nin lubos sa areglo na pag-adal sa libro?
6 Sarong bendisyon nanggad an Pag-adal sa Libro kan Kongregasyon! An mamomoton na areglong ini hale ki Jehova nakakatabang sa sato na mapagdanay an satong seguradong espirituwal na pundasyon sa masakit na mga panahon na kinabubuhayan niato.—Sal. 26:12.