An Pag-adal sa Libro kan Kongregasyon—Kun Taano ta Kaipuhan Niato Iyan
1. Paano nagpoon kaidto an areglo nin Pag-adal sa Libro kan Kongregasyon?
1 Kan 1895, an mga grupo nin pag-adal kan Mga Estudyante sa Biblia, na apod kaidto sa Mga Saksi ni Jehova, inapod na Dawn Circles for Bible Study. Mga tomo kan Millennial Dawn an ginamit bilang basehan sa pag-adal. Kan huri, an mga pagtiripon na ini inapod na Berean Circles for Bible Study. (Gibo 17:11) Sa parate sarong grupo na tama sana an kadakulaan an nagtitiripon sa sarong pribadong harong sa banggi na kombenyente para sa grupo. An mga pagtiripon na ini an ginikanan kan Pag-adal sa Libro kan Kongregasyon.
2. Paano kita makakakontribwir sa “pagparinigonan sa boot” sa pag-adal sa libro?
2 Pagparigon sa Boot Asin Tabang: Mantang tinuyong papagdanayon na sadit an mga grupo sa pag-adal sa libro, igwa nin orog na oportunidad an mga nag-aatender na magpahayag kan saindang pagtubod. An resulta iyo an “pagparinigonan sa boot . . . , an lambang saro huli sa pagtubod nin iba.”—Roma 1:12.
3, 4. Paano nakakatabang sa sato an areglo nin pag-adal sa libro sa pag-otob kan satong ministeryo?
3 An pag-obserbar sa paagi nin pagtotokdo kan paraataman sa pag-adal sa libro makakatabang sa sato na ‘gamiton an tataramon kan katotoohan sa tamang paagi.’ (2 Tim. 2:15) Obserbaran kun paano nia idinodoon an sono sa Kasuratan na basehan kan pinag-aadalan. Kun angay para sa publikasyon na pinag-oolayan, puede niang idoon an pangenot na mga punto paagi sa pantapos na repaso, na Biblia sana an ginagamit. An marahay na halimbawa nia makakatabang sa sato na paoswagon an satong pagtotokdo sa Kristianong ministeryo.—1 Cor. 11:1.
4 Dugang pa sa pamamayo sa semanal na leksion, an paraataman sa pag-adal sa libro nangengenot sa pag-ebanghelyo. Paagi sa pakipagkooperar sa paraataman sa paglilingkod, naggigibo sia nin praktikal na mga areglo para sa paglilingkod sa langtad. Naghihingoa siang tabangan an gabos na kabilang sa grupo na otobon an saindang Kristianong paninimbagan na ihulit an maogmang bareta asin gumibo nin mga disipulo.—Mat. 28:19, 20; 1 Cor. 9:16.
5. Anong personal na tabang an makukua paagi sa pag-adal sa libro?
5 Interesado an paraataman sa pag-adal sa libro sa espirituwal na ikakarahay kan lambang saro na nasa grupo. Ipinapaheling nia an interes na ini sa mga pagtiripon kan kongregasyon asin mantang iniibanan nia an iba sa paglilingkod sa langtad. Ginagamit man nia sa paghiras nin espirituwal na balaog an mga panahon na dinadalaw nia an mga tugang sa saindang harong. An gabos maninigong dai mag-alangan na dumolok sa paraataman sa pag-adal sa libro para sa espirituwal na tabang kun kaipuhan ninda.—Isa. 32:1, 2.
6. (a) Paano napakosog an satong mga tugang sa nagkapirang nasyon paagi sa pagtiripon sa mas saradit na grupo? (b) Paano kamo personal na nakinabang sa areglo nin pag-adal sa libro?
6 Pakosogon an Lambang Saro: Sa mga nasyon na ipinagbabawal an aktibidad kan banwaan nin Dios, parateng nagtitiripon an mga tugang sa mas saradit na grupo. Nagirumdoman nin sarong tugang na lalaki: “Dawa ngani prohibido an samong Kristianong mga aktibidad, kun posible ginigibo mi an samong semanal na mga pagtiripon sa mga grupo na 10 sagkod 15 katawo. Nakakakua kami nin espirituwal na kosog sa mga pagtiripon, sa samong pag-adal sa Biblia sagkod sa samong pakikiasosyar pagkatapos kan pag-adal. Pinagkokomparar mi an samong mga eksperyensia, asin nakatabang ini sa samo na marealisar na an lambang saro sa samo igwa nin pararehong kadepisilan.” (1 Ped. 5:9) Logod na pakosogon man niato an lambang saro paagi sa lubos na pagsuportar sa areglo nin Pag-adal sa Libro kan Kongregasyon.—Efe. 4:16.