Tabangan an Saimong Paraataman sa Pag-adal sa Libro kan Kongregasyon
1 An balang saro sa sato nag-aako nin dakol na pakinabang sa Pag-adal sa Libro kan Kongregasyon. Kan nakaaging bulan pinag-olayan niato kun paano inootob kan paraataman sa Pag-adal sa Libro kan Kongregasyon an saiyang kabtang. Alagad ano an magigibo niato tangani na matabangan sia asin sa siring makinabang kita asin an iba?
2 Umatender Kada Semana: Huling pinagdadanay na sadit an mga grupo nin pag-adal sa libro, mahalaga an presensia mo. Gibohon mong pasohan na umatender kada semana. Makakatabang man ika paagi sa pagigin nasa oras, huling nagpapangyari ini sa paraataman na ponan an pagtiripon sa aregladong paagi.—1 Cor. 14:40.
3 Nakaparirigon na mga Komento: An saro pang paagi na puede kang makatabang iyo an pagigin andam na marhay asin pagtao nin nakaparirigon na mga komento. Sa parate pinakamarahay an mga komento na nakakonsentrar sa saro sanang punto, asin nakaeenkaminar man ini sa iba na magkomento. Likayan na komentohan an gabos na punto sa parapo. Kun natudok an saimong puso nin sarong punto sa pinag-aadalan, dugangan an kualidad kan pag-orolay paagi sa paghiras kan saimong ideya sa sarong komento.—1 Ped. 4:10.
4 Kun may pribilehio kang magbasa kan mga parapo para sa kapakinabangan kan grupo, magin mahigos sa pag-otob kan asignasyon na iyan. An marahay na pagbasa nakakokontribwir sa kapangganahan kan pag-adal.—1 Tim. 4:13.
5 Paghuhulit Bilang Grupo: An mga pagtiripon bago lumuwas sa paglilingkod sa langtad ginigibo sa dakol na lugar nin pag-adal sa libro, asin an saimong suporta sa mga areglong ini nakakatabang sa paraataman sa pangengenot nia sa pag-ebanghelyo. Mansayon an mga areglong ini bilang mga oportunidad na magin mas dayupot sa saimong mga tugang asin enkaminaron sinda.
6 Mga Report nin Paglilingkod sa Langtad: An pagsumitir tolos-tolos kan saimong report nin paglilingkod sa langtad sa katapusan kan kada bulan saro pang paagi tangani na matabangan an paraataman. Puede mong itao an saimong report sa saiya mismo o ibugtak iyan sa kahon na para sa mga report nin paglilingkod na nasa Kingdom Hall. Puedeng gamiton kan sekretaryo an kahon na iyan sa pagtipon kan mga report nin paglilingkod sa langtad na kinolekta kan mga paraataman sa pag-adal sa libro.
7 Aapresyaron an saimong pakikipagtabangan sa saimong paraataman sa Pag-adal sa Libro kan Kongregasyon. Orog sa gabos, makakasierto ka na si Jehova ‘mapapasa espiritu na saimong ipinapaheling.’—Fil. 4:23.