Pag-aatubang kan Maogmang Bareta—Bilang Sarong Pamilya
1 An sarong nagdusay na pamilya na biyong sibot sa banal na paglilingkod kaomawan sa ngaran ni Jehova. Naoogma kita na an dakol na siring na pamilya manonompongan sa mga Saksi ni Jehova sa bilog na daga.
2 Siyempre, an ama igwa kan pangenot na paninimbagan na atamanon an espirituwal na mga pangangaipo kan saiyang pamilya. (1 Cor. 11:3) Sa kooperasyon kan saiyang agom asin mga aki, an saiyang pamilya puwedeng magkaigwa nin makosog na impluwensia sa iba. (Mat. 5:16) Ano an nagkapirang bagay na ikapaheheling an kooperasyon na ini?
NANGENGENOT AN MGA MAGURANG
3 Sa dakol na kaso, an ama tibaad saro sa kamagurangan o ministeryal na lingkod. Ini nangangahulogan na an iba sa saiyang oras asin atension kaipuhan na itao sa mga bagay kan kongregasyon. Maninigong banga-bangaon nin ama an saiyang oras tanganing dai mapabayaan an saiyang pamilya. Huling an saiyang pamilya iyo an saiyang pangenot na paninimbagan, maninigo siang regular na mag-iskedyul nin oras na makaiba an saiyang pamilya sa pag-adal, paglilingkod sa langtad, pagtiripon, asin angay na pag-aling-aling.
4 Kaipuhan an kooperasyon kan agom na babae. Puwede siang magin komplemento kan lalaki paagi sa pagtabang na tokdoan an mga aki sa ministeryo. An saiyang kaigotan asin debosyon dakula an magigibo na maimpluwensiahan an mga aki na tumalubo an apresasyon sa ministeryo.—2 Tim. 3:14, 15.
5 Kadakol kan halimbawa na an sarong magurang pinasan an espirituwal na paninimbagan asin mapangganang tinokdoan an mga aki sa ministeryo. Huli sa ekselenteng halimbawa kan saindang ina o ama, dakol na hobenes an marigon na nanindogan sa katotoohan.
PANINIMBAGAN KAN MGA AKI
6 Minsan an sangkap na Aki nin Dios, si Jesus, kan aki pa, sakop kan paggiya asin pagtotokdo kan saiyang mga magurang. (Lucas 2:51) Kaya, kun iinaareglo kan ama asin ina na mag-iriba sa ministeryo, obligasyon kan mga aki na magpaheling nin diosnon na debosyon paagi sa pagkooperar sa saindang mga aki.—Efe. 6:1-3.
7 An pagsamba nin iriba bilang pamilya nagpapakosog sa pagkamoot asin pagkasararo kan pamilya. An mga magurang asin aki parareho may paninimbagan sa bagay na ini.