Sinasamba si Jehova Bilang Sarong Pamilya
1 Kaidtong mga panahon kan Biblia, iribang ginigibo kan mga miembro nin pamilya an dakol na bagay. Ginigibo ninda an pangaroaldaw na mga trabaho asin sa pangenot sinasamba ninda si Jehova bilang sarong pamilya. (Lev. 10:12-14; Deut. 31:12) Ngonyan, sa dakol na lugar, pira sanang aktibidad an iribang ginigibo kan mga miembro nin pamilya. Minsan siring, minimidbid kan mga Kristiano an kahalagahan nin pakikikabtang sa mga aktibidad bilang sarong pamilya, nangorogna kun mapadapit sa pagsamba. Daing duda na ikinakaogmang marhay kan Kagtugdas kan pamilya na maheling an mga pamilya na may pagkasararong nagsasamba sa saiya!
2 Iribang Naghuhulit: An iribang paghuhulit kan maogmang bareta nagpapakosog sa bogkos kan pamilya. Kun siring, apuera sa pag-iba sa ibang miembro kan kongregasyon tangani na maghulit, an sarong magurang sa kongregasyon regular man na maghuhulit kaiba kan saiyang agom asin mga aki. (1 Tim. 3:4, 5) Sa ibong nin pano na iskedyul, dawa an mga nagbibiaheng paraataman nag-aareglar nin panahon na makaibanan sa ministeryo an saindang agom.
3 An mga magurang na naghuhulit kaiba kan saindang mga aki nakakatabang sa mga ini na umoswag bilang mga ebanghelisador. Bako sanang maoobserbaran nin mga aki an kagayagayahan asin pagkakontento sa ministeryo kan saindang mga magurang kundi maheheling man ninda an saindang mga magurang na nagpapahayag kan sainda mismong pagkamoot ki Jehova asin sa mga kapwa. (Deut. 6:5-7) An kahalagahan kaini dai naiinaan mantang nagdadakula sa harong an mga aki. An sarong mag-agom na may tolong aking lalaki na an mga edad nasa pag-oltanan nin 15 asin 21 padagos na iniibanan sinda nin regular sa ministeryo. An ama nagsabi: “May itinotokdo kami sa sainda kada pag-ibanan niamo. Asin sinisierto niamo na iyan eksperyensia na nakakagayagaya asin nakakaparigon sa boot.”
4 Iribang Nag-aandam: Naeksperyensiahan nin mga pamilya na kapakipakinabang an iribang pag-andam para sa ministeryo. Parateng ikinakaogma nin mga aki an mga pag-ensayo na dian an mga miembro nin pamilya nagsasarosaralida sa paggibo kan presentasyon o pag-akto bilang kagharong. Ginagamit nin nagkapira an pira sanang minuto sa katapusan kan pampamilyang pag-adal tanganing gibohon ini.
5 Nadudugangan an satong kagayagayahan kun nakikikabtang kita sa mahalaga asin nakakakontentong mga aktibidad kaiba kan mga namomotan niato. Nakakagayagaya nanggad para sa mga miembro nin pamilya na mag-iribanan sa ministeryo sa langtad sa harong-harong saka sa mga pagdalaw liwat asin pagtotokdo sa Biblia! Sa siring, mantang nagsasamba kamo ki Jehova kaiba an saindong pamilya, magayagaya nindong ikakapahayag: “Kun para sa sako asin sa sakong kasararo sa harong, kami maglilingkod ki Jehova.”—Jos. 24:15.