Kun Paano Nakikikooperar an mga Miembro kan Pamilya Para sa Lubos na Pakikikabtang—Sa Ministeryo
1 Ano an orog pang nakaoogma kisa sa pakaheling sa mga agom na lalaki asin babae, mga magurang asin aki na magkairiba sa Kristianong ministeryo, na inoomaw sa publiko an ngaran ni Jehova? (Sal. 148:12, 13) An gabos na pamilya maninigong magkaigwa nin marahay na pinagkatodan para sa regular na pakikikabtang sa paglilingkod sa langtad. Igwa daw an saindong pamilya nin itinalaan na aldaw kada semana na gagamiton sa ministeryo? Kun igwa, kun siring aram nanggad kan gabos kun ano an paplanohon asin sinda lubos na makapakikikabtang.—Tal. 21:5a.
2 Bago kan aldaw nin paglilingkod kan pamilya, taano ta dai gibohon na iribang proyekto an pag-andam nin mga pag-atubang na gagamiton kan saindong pamilya? An mga sesyon sa pag-ensayo puedeng makatabang na marhay, asin iyan puedeng magpatalubo nin tunay na espiritu nin kooperasyon sa pamilya. Kanigoan kanakakokontento kun an ministeryo sa langtad sarong pampamilyang aktibidad asin andam na marhay an gabos na miembro!
3 Inibanan nin sarong nagbibiaheng paraataman an sarong bilog na pamilya sa pagmamagasin. Mientras na sia naghaharongharong kaiba kan saro sa mga aking babae, naghapot ini: “Gurano po kalawig na kamo maghuhulit kaiba ko?” Dangan ipinaliwanag kan aking babae na sia maghuhulit kaiba kan saiyang ama pagkatapos. Risang-risa na talagang ikinaoogma nindang mag-ama an saindang paglilingkod na magkaibanan. Kanigoan karahay na espiritu nin pamilya!
4 An nagkapirang pamilya tibaad kaya na iribang mag-auxiliary payunir nin sarong bulan durante kan taon. O tibaad posible na kisuerra an sarong miembro kan pamilya dagos-dagos na maglingkod bilang auxiliary payunir o magpalista pa ngani bilang regular payunir. Paagi sa marahay na pag-organisar asin kooperasyon, tibaad kayang madugangan kan gabos na kasararo sa harong an saindang personal na pakikikabtang sa paglilingkod paagi sa pagsuportar sa saro na nagpapayunir. An pamilya siertong bebendisyonan huli sa dinugangan na aktibidad na ini asin sa marahay na mga eksperyensia sa ministeryo.—Mal. 3:10.
5 An pagkaigwa nin lubos na pakikikabtang sa pag-ebanghelyo makatatabang na papagdanayon an mga pamilya na dayupot, maigot, mabunga, asin maogma sa paglilingkod ki Jehova!—Ikomparar an Filipos 2:1, 2.