Tokdoan an Iba na Pakinabangon an Saindang Sadiri
1 Gusto ni Jehova na an gabos na tawo pakinabangon an saindang sadiri. (Isa. 48:17) Aram nia kun ano an nagtatao sa sato nin tunay na kaogmahan. An saiyang odok na pagmawot iyo na an mga tawo makalikay sa kalamidad asin magkamit nin buhay paagi sa pagtaong atension sa saiyang mga togon. Pinakikinabang niatong marhay an satong sadiri paagi sa pamumuhay sono sa dalan nin Dios. (Sal. 34:8) Paano niato matotokdoan an iba na gibohon man iyan?
2 Ano an pinaghahaditan kan mga kagharong sa saindong lugar? Bako daw na an seguridad sa saindang harong, an karigonan kan saindang pag-agoman, an ngapit kan saindang mga aki, asin an kaagid na mga bagay? Kun sinda may mga problema, saen sinda minahagad nin tabang? Tibaad manarig sinda sa saindang sadiri, sa mga programang giya sa personal na pag-oswag, o sa giya nin iba. Sa paggibo kaiyan, dakol an nariribaraw dahelan sa pabarobago asin impraktikal na mga ideya sa kun paano pakikinabangon an saindang sadiri. Dapat niatong kombensiron sinda na mas marahay nanggad an itinatao kan Tataramon nin Dios kun mapadapit sa giya. (Sal. 119:98) Magigibo niato ini paagi sa pagpaheling sa sainda kun paano ninda mapaooswag an kualidad kan saindang buhay dawa ngonyan kun sinda maghihingoang mag-adal kan Biblia asin iaplikar an sinasabi kaiyan.—2 Tim. 3:16, 17.
3 Napaoswag na Buhay Pampamilya: Pipirang tawo an nakarerealisar kun gurano kaepektibo an sadol na nasa Efeso 5:22–6:4 sa pagresolber nin mga problema sa pamilya. Ini an kamugtakan nin sarong mag-agom na, pakalihis nin sampulong taon nin pag-agoman, nagdesisyon na sinda mabulagan. Minsan siring, naponan an pag-adal sa Biblia sa agom na babae, na natokdoan kan mga prinsipyo sa Kasuratan mapadapit sa buhay may agom. Dai nahaloy nariparo kan agom na lalaki an mga pagbabago nia mantang iinaaplikar nia an mga prinsipyo sa Biblia, asin uminayon sa pag-adal an agom na lalaki. Sinabi nia kan huri: “Ngonyan nanompongan na niamo an basehan para sa talagang maogmang buhay pampamilya.”
4 Tunay na Katuyohan sa Buhay: Kan an sarong hoben na adikto sa droga humagad nin tabang sa mga Saksi, tinokdoan sia na si Jehova nagmamakolog sa saiya personalmente. Sia nagsabi: ‘Nanodan ko na an Kaglalang may katuyohan para sa tawo asin sia nagtatao nin buhay na daing katapusan sa mga inooyonan nia. Dai nindo maiimahinar kun gurano kaogma ko manongod kaini. Ngonyan igwa na ako nin marahay na salud, katoninongan sa isip, asin dayupot na relasyon sa Dios.’
5 Mayo nin dai makikinabang sa praktikal na tabang na makukua sa Tataramon nin Dios. Paagi sa paggamit kaiyan bilang satong giya, pinatutunayan niato na an dalan ni Jehova nakalalabi nanggad sa mga dalan kan kinaban. (Sal. 116:12) Pribilehio niatong ipaabot an mensaheng ini sa iba, na tinotokdoan sinda na pakinabangon an saindang sadiri. Mantang ginigibo niato iyan, maheheling niato an dakol na marahay na resulta.