An Kooperasyon kan Pamilya Nagdadara nin mga Pakinabang
1 Sa panahon kan Biblia, an ama igwa nin pangenot na paninimbagan na siertohon na an saiyang pamilya lubos na teokratiko. Siring man kaiyan ngonyan. (Jos. 24:15; Efe. 6:1-4) Sarong angat an pangangataman kan gabos na bagay sa pamilya. Paano ini puwedeng magibo? Paagi sa kooperasyon asin organisasyon kan pamilya.—1 Cor. 14:40.
BILANG AN PAYO, MANGENOT
2 An panpamilyang pag-adal maninigong isagibo nin regular asin iangay sa mga pangangaipo kan pamilya. Totoo man ini manongod sa teksto kan aldaw. Marahay nanggad na bagay na poonan an aldaw paagi sa pag-orolay sa Tataramon nin Dios! An paghorophorop kaini durante kan aldaw makatatabang sa sato na ‘horophoropon an mga bagay na malinig, makawiwili, asin ano man na marahay an dangog.’ (Fil. 4:8) Puwede daw kamong mag-oswag sa bagay na ini?
3 Dugang pa sa panpamilyang pag-adal, mahalaga an programa nin personal na pag-adal. An mga tataramon sa Josue 1:8 minaaplikar na igwa nin kaparehong puwersa sa lambang saro sa sato bilang indibiduwal: “An librong ini kan katogonan dai dapat sumuhay sa saimong ngoso, asin maingat na basahon mo iyan sa aldaw asin sa banggi, tanganing ika makapag-ingat na gumibo oyon sa gabos na nasusurat dian.”
4 An pagigin nasa oras para sa mga pagtiripon sarong angat asin nangangaipo nin kooperasyon. An paggiya kan padre de pamilya an makasisierto na ikatao an tabang kun kaipuhan. Ini an magpapagin posible sa gabos na mag-abot na nasa oras tanganing makikabtang sa panbukas na kanta asin pamibi.
5 Mahalaga na an padre de pamilya an mangenot sa pamibi. “Magmaigot kamo sa pamibi” an sadol ni Pablo sa Roma 12:12. An paggibo kaini sa regular na paagi puwedeng makatabang na pagdanayon na sararo an pamilya. An pamibing ini maninigong dugang pa sa indibiduwal na mga pamibi kan mga miembro kan pamilya.
MAG-ANDAM
6 An panpamilyang mga sesyon sa pag-ensayo makatatabang sa gabos na magin andam para sa ministeryo. An mga introduksion puwedeng pilion hale sa pahina 9-15 kan librong Reasoning na angay sa Topikong Mapag-oolayan. An mga suhestion para sa pag-oswag puwedeng itao kan padre de pamilya.
7 Posible daw para sa saro o orog pang miembro kan pamilya na lumaog sa panbilog na panahon na paglilingkod? (1 Cor. 16:9) Maghahagad ini nin marahay na kooperasyon sa kabtang kan gabos sa pamilya. Paagi sa pagpagin simple kan saindang estilo nin buhay asin pagigin maabilidad, kadakol na pamilya an nagkaigwa kan kagayagayahan asin pribilehiyong ini.
8 Kun an padre de pamilya asin an gabos na miembro kan pamilya magkooperar na iriba asin mangnohon an mga interes kan gabos, sarong maogma asin nagkakasararong pamilya an magigin resulta.