Hapot

◼ Anong impormasyon an maninigong iatubang sa mga pagtiripon bago lumuwas sa paglilingkod sa langtad?

An katuyohan kan pagtiripon bago lumuwas sa paglilingkod sa langtad iyo na tabangan kitang magkonsentrar sa aktibidad na masunod​​—an ministeryo. Kun siring, an konduktor maninigo na magin andam na marhay na makatao nin sarong bagay na nakaparirigon sa boot, espesipiko, asin praktikal. Kun an teksto kan aldaw direktang may koneksion sa aktibidad na paghuhulit, iyan puedeng basahon asin pag-olayan sa halipot. Minsan siring, an pagtiripon maninigong pangenot na magkonsentrar sa pagtabang sa gabos na maluwas sa gibohon na pagpatotoo na magin mas andam na marhay na otobon an ministeryo sa aldaw na iyan.​​—2 Tim. 4:5.

Puedeng ipakipag-olay an aplikadong mga punto sa An Satong Ministeryo sa Kahadean tangani na an gabos makaaram kan presenteng alok asin kun paano iyan iaatubang. Sa Aldaw nin Pagmamagasin puedeng idemonstrar an sarong pag-atubang basado sa “Kun Ano an Sasabihon Manongod sa mga Magasin.” Para sa iba pang kampanya, puedeng itampok an saro o duwang introduksion sa librong Reasoning na angay para sa lokal na teritoryo. Puedeng pag-olayan o idemonstrar an sarong aspekto kan ministeryo, siring baga kan kun paano gagamiton an Biblia sa mga harong, kun paano aatubangon an habong makipag-olay, kun paano maalok nin pag-adal sa Biblia, o kun paano kukultibaron an interes.

An mga pagtiripon bago lumuwas sa paglilingkod maninigong dai sumobra sa 10 sagkod 15 minutos, na kabale an pag-organisar kan mga grupo, pag-asignar nin teritoryo, asin pamibi. Kun tapos na, an gabos na presente maninigo na aram kun siisay an makakapadis ninda asin kun saen sinda maghuhulit, patin maninigo sindang humale tolos-tolos pasiring sa teritoryo. Huling halipot an pagtiripon, importante na an gabos umabot na nasa oras. Kun an pagtiripon bago lumuwas sa paglilingkod kasunod nin pagtiripon kan kongregasyon, siring baga kan Pag-adal sa Torrengbantayan, iyan maninigong mas halipot. Dai kaipuhan na pag-olayan an teksto kan aldaw, huling nagkaigwa na nin marahayon na pagtokar sa Kasuratan.

Maninigong iasignar antes pa an kualipikadong bautisadong mga tugang na lalaki na mamamayo sa kada pagtiripon bago lumuwas sa paglilingkod. Kun mayo nin mangengenot sa sarong partikular na aldaw, an kamagurangan maninigo na pumili kun sairisay na bautisadong tugang na babae an makakagibo kaiyan kun kinakaipuhan. Mantang nakatukaw, puedeng ponan kan tugang na babae an pag-orolay kan grupo sa teksto kan aldaw o iba pang punto na konektado sa paglilingkod sa langtad, na pinagdadanay na halipot an saiyang mga komento. Sia maninigong magkolbong.

An mga pagtiripon bago lumuwas sa paglilingkod sa langtad ekselenteng mga oportunidad tangani na maparigon an boot niato asin andamon kita sa pakikikabtang sa ministeryo. Mientras na mas andam na marhay an namamayo, orog man na makikinabang an gabos.