Nakikinabang sa mga Pagtiripon an mga Hoben

¹ An sarong daragita nagsabi: “Kun beses naiisip-isip ko na an mga hoben an pinakanadedepisilan sa buhay. Kami napalilibotan nin mga tawo na nakikisaro, nagdodroga, asin nag-iinom.” Iyan man daw an saboot mo? Kun iyo, ano sa paghona mo an makakatabang sa saimo na labanan an maraot na mga impluwensiang ini? Kaipuhan mo an pagtubod, makosog na pagtubod sa pagigin tanos kan mga dalan ni Jehova, huli ta kun mayo kaiyan “imposible na mapanigoan sia nin marhay.” (Heb. 11:6) An pag-atender sa mga pagtiripon kan kongregasyon makatatabang sa saimo na pakosogon an saimong Kristianong mga kombiksion asin determinasyon na likayan an maraot.

² Dakol an Ikatatao sa Saimo kan mga Pagtiripon: Ano an nagpapangyaring magin nakagagayagaya an masiram na pagkakan kaiba kan dayupot na mga katood? Bako daw na an kombinasyon nin masustansiang kakanon asin nakaoogmang pag-iriba sa sarong mahayahay na kamugtakan? Bueno, an satong mga pagtiripon nagtatao nin kaparehong nakaoogmang eksperyensia, alagad sa espirituwal na sentido.

³ An mga bagay na pinag-oolayan sa mga pagtiripon nakaparirigon, magpoon sa mga bagay na nagta­tratar manongod sa pan-aroaldaw na mga problema sa buhay sagkod sa mga pag-adal kan kawiliwiling mga hula sa Biblia. May iinaatubang na praktikal na instruksion na nagtotokdo sa saimo kun paano mamumuhay sa pinakamarahay na dalan nin buhay asin makakayanan an mga angat na napapaatubang sa saimo. An mga kaibaiba na manonompongan sa mga pagtiripon iyo an pinakamarahay saen man na lugar, asin an espirituwal na kamugtakan nakaoogma asin daing peligro. (Sal. 133:1) Bakong makangangalas na nagsabi an sarong hoben: “Nag-eeskuela ako sa bilog na aldaw, asin pinapanluluya ako kaiyan. Alagad an mga pagtiripon arog sa sarong oasis sa desierto, kun saen ako narerepreskohan na makayanan an masunod na aldaw sa eskuelahan.” Nagsabi an saro pa: “Nanompongan ko na an dayupot na pakikiasosyar sa iba na namomoot ki Jehova nakatatabang sa sako na magdanay na dayupot sa saiya.”

⁴ Paagi sa pagigin nakalista sa Teokratikong Paadalan sa Pagmiministro, nakanonood kang magtipon nin impormasyon hale sa Biblia, gibohon iyan na sarong pa­hayag, dangan ipresentar iyan sa garo nakikipag-olay na paagi sa atubangan kan mga nagdadangog sa Kingdom Hall. Imahinara an pakinabang sa pagigin sinanay na magtokdo kan panligtas-buhay na mga katotoohan sa Tataramon nin Dios sa ekspertong paagi! Saen pa makakukua an mga hoben nin siring kahalagang pagsasanay?

⁵ Kun Paano Makukua an Pinakadakulang Pakinabang sa mga Pagtiripon: Tangani na makua an pinakadakulang pakinabang sa mga pagtiripon, igwa nin kalabot na tolong mahalagang marhay na bagay. Ini an pag-andam, pakikikabtang, asin pagsagibo.

⁶ Mag-andam Para Dian: Mag-iskedyul nin regular na oras sa pag-andam para sa mga pagtiripon. Dai pagtogotan an mga leksion, por orang trabaho, o pag-aling-aling na agawon sa saimo an oras na kaipuhan mo sa pagrepaso nin patienot kan materyal na pag-oolayan sa balang pagtiripon. Kapakipakinabang an pagkaigwa nin marahay na pinagkatodan. Enot sa gabos, subaybayan an semanal na iskedyul nin babasahon sa Biblia para sa Teokratikong Paadalan sa Pagmiministro. Kaipuhan sana nin nagkapirang minuto kada aldaw na basahon asin horophoropon an asignadong mga kapitulo. Magtagama nin oras sa pag-andam para sa Pag-adal sa Libro kan Kongregasyon asin Pag-adal sa Torrengbantayan. May mga naggigibo kaini kisuerra saro o duwang aldaw bago an mga pagtiripon na ini. Sagkod sa mapupuede, gibohon man iyan para sa mga kabtang na nakaiskedyul sa Pagtiripon sa Paglilingkod kada semana.

⁷ Makikabtang Dian: Sinasabi kan Biblia na sa edad na 12, si Jesus nakua sa templo, na naghihinanyog, naghahapot, asin nagsisimbag. (Luc. 2:​46, 47) Sa ibang pagtaram, sia biyong nakiayon. Orog kang makikinabang sa mga pagtiripon kun ika naghihingoang makikabtang dian.​​—Tal. 15:23.

⁸ Kaipuhan na ika aktibong magkonsentrar sa itinotokdo sa mga pagtiripon. Kun beses, an paghinanyog sa sarong pahayag mas depisil kisa pagpahayag. Taano? Tibaad maglagawlagaw an saimong isip kun iba an nagtataram. Paano mo daw lalabanan ini? Paagi sa pagkua nin mga nota. Isurat an importanteng mga punto na boot mong helingon pagkatapos. An pagkua nin nota makatatabang sa saimo na ikonsentrar an saimong isip sa programa. Siring man, helingon an mga teksto, asin sundan mantang iyan binabasa kan ispiker.

⁹ Saro pa, gibohon na pasohan na makikabtang sa balang hapot-simbagan na kabtang sa mga pag­tiripon. Orog pa ngani ikang ma­kikinabang kun maingat mong pag-iisipan an boot mong sabihon. Nagsasabi an Talinhaga 15:​28: “An puso kan matanos naghohorophorop tanganing makasimbag.”

¹⁰ Isagibo an Saimong Nanonodan: An ultimong lakdang iyo na seguradohon na an saimong nanonodan ‘naggigibo saimo.’ (1 Tes. 2:13) Mantang iinaaplikar mo an marahay na mga punto na nanonodan mo sa balang pagtiripon, ika magigin orog na dayupot ki Jehova Dios. Sia magigin tunay para sa saimo, asin ika makaeeksperyensia nin dakulang kagayagayahan asin satispaksion mantang ika “padagos na naglalakaw sa katotoohan,” na isinasapuso iyan.​—3 Juan 4.

¹¹ Mga hoben na tugang na lalaki asin babae, mantang regular kamong nag-aandam para sa mga pagtiripon, nakikikabtang dian, asin isinasagibo an saindong nanonodan, lubos kamong maoogma sa mga pagtiripon. Kadungan kaiyan, mapapasaindo an gabos na pakinabang na makukua nindo gikan dian. An saindong pagtubod mapakokosog, siring man an saindong desisyon na magdanay na maimbod sa saindong langitnon na Ama, si Jehova.​—Sal. 145:18.