Magdanay na Makosog sa Espirituwal, Malinig Para sa Paglilingkod ki Jehova

¹ Sa Isaias 60:​22, si Jehova may ginibong panuga na naootob sa atubangan mismo kan satong mga mata: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.” Kun iniisip niato an sarong nasyon, an naiimahinar niato dakulang grupo nin mga tawo na binobogkos nin pararehong interes asin naghihiro sakop kan autoridad nin sarong gobyerno.

² An report sa paglilingkod sa langtad kan 1991 nagpaheling nin sarong peak nin 4,278,820 parahayag kan maogmang bareta sa bilog na kinaban, 6.5 porsiento an ilinangkaw sa nakaaging taon. Talagang tinipon ni Jehova an dakulang kadaklan nin sinserong mga tawo na boot na sumiblag sa mapan-aping palakaw na ini asin magin maimbod na mga sakop kan gobyerno kan Mesiyanikong Kahadean kan saiyang Aki, si Jesu-Cristo. Taon-taon nagdadakol an mga tinitipon. Naggagayagaya kitang magin kabtang kan nasyon na ini na literal na masasabing sosyedad nin bagong kinaban. Sa pagselebrar kan Memorial kan 1991, an total na nag-atender 10,650,158, 7 porsiento an ilinangkaw sa 1990. Ini dakulaon na potensial para sa kadakol pa na umiba sa sato bilang mga sakop kan Kahadean.

³ Siyempre, aram niato na bakong gabos na kabilang sa nag-atender sa Memorial suminiblag na sa kinaban sagkod sa kaipuhan tanganing lubos na akoon bilang banwaan ni Jehova. An mga tawo hale sa gabos na nasyon ‘nagtuturukad sa harong ni Jehova,’ pero kaipuhan sindang lubos na ‘matokdoan dapit sa saiyang mga dalan’ tangani sindang ‘makalakaw sa saiyang mga dana.’ (Isa. 2:​2-4) Labi sa apat na milyon na nag-atender sa Memorial an nag-ako kan pagtotokdo nin Dios, na nagkamit nin espirituwal na kosog na nagmotibar sainda na papagdanayon an malinig na gawe asin makuwalipikar na makikabtang sa paghuhulit kan Kahadean na ginigibo ngonyan. (Mat. 24:14) An mga siring may marahay na kamugtakan sa pagheling ni Jehova asin nagkakamit kan mga pakinabang sa gabos na makangangalas na probisyon nia sa sainda. Ano an dapat na gibohon kan natatada pang labing anom na milyon tangani man sindang kumosog sa espirituwal asin luminig para sa paglilingkod ki Jehova?

⁴ Dapat sindang “makipaglaban nin maigot para sa pagtubod.” (Jud. 3) Oras na pilion nindang lumakaw sa dana ni Jehova, napapairarom sinda sa pangigipit kan Diablo paagi sa mga pagbalo, sugot, asin maraot na mga impluwensia. Arog ni Pablo, dapat sindang maglaom ki Jehova para sa kosog na magtagal. (Fil. 4:13) Nagtatao si Jehova nin kosog sa mga siring paagi sa mga kuminosog na sa pagtubod. Nagsadol si Pablo na “kitang mga makosog maninigong magpasan kan mga kaluyahan kaidtong mga bakong makosog.” (Roma 15:​1, 2) Kun nagkakasaro an makosog asin maluya, may kosog na manindogan nin marigon. “Marahay an duwa sa saro. . . . Kun kaya nin saro na daogon an nagsosolo, an duwa makapaninindogan tumang sa saiya.”​—Ecl. 4:​9, 12.

⁵ Ini nangangahulogan na an mga bagohan tama sanang magsarig sa sato bilang paagi na sinda mag-ako nin kosog gikan ki Jehova. Kita na dusay na mga Kristiano dapat na magdanay na makosog sa espirituwal tangani kitang makatabang sa mga bagohan. An mga Kristiano na makosog nakatatao nin “espirituwal na mga balaog,” na nagbubunga nin “pagriribayan nin pagpakosog.” (Roma 1:​11, 12) Ini saro sa pangenot na mga paagi na ginagamit ni Jehova tanganing pagsararoon kita asin gibohon kita gabos na ‘marigon asin makosog.’​—1 Ped. 5:​9-11.

⁶ Maninigong magin pasohan niato na tabangan an mga bagohan na ini mantang ginigirumdom man an satong espirituwal na mga pangangaipo. (Mat. 5:3) An espirituwalidad iyo an liyabe sa satong kosog. Ini kuwalidad na dapat na pataluboon asin parigonon nin regular na pag-ako nin espirituwal na kakanon. Paagi sa saiyang organisasyon, si Jehova nagtatao nin timbang na mga programa sa pag-adal kan saiyang Tataramon. An limang semanal na pagtiripon kan kongregasyon may mahalagang kabtang sa pagpakosog sa sato, ‘na sinasadol kita sa pagkamoot asin marahay na mga gibo.’​—Heb. 10:24.

⁷ An mga pakinabang sa mga pagtiripon na ini nadodoble kun iyan ipinapadis sa marahay na mga ugale sa personal asin pampamilyang pag-adal. Bilang minimum na pasohan, kita gabos maninigong basahon asin horophoropon an teksto aroaldaw, sundan an programa nin pagbasa sa Biblia na yaon sa Theocratic Ministry School Schedule, asin mag-andam para sa Pag-adal sa Libro kan Kongregasyon asin Pag-adal sa Torrengbantayan. An kada pamilya kaipuhan na magdeterminar kun paano iyan oorganisaron, na sinisierto na iyan gibohon nin regular. Saro pa, maninigong siertohon kan payo nin pamilya na an programa sa pag-adal ibinagay na mapanigoan an espisipikong espirituwal na mga pangangaipo kan pamilya. Sa paaging ini ‘an harong mapatitindog. . . . Iyan magigin masarig.’ (Tal. 24:3) Kun kita maimbod sa satong mga ugale sa pag-adal bilang indibiduwal asin pamilya, makasasarig kita na kita bebendisyonan ni Jehova asin tatabangan kita kan saiyang espiritu na matagalan an laen-laen na pagbalo.​—Sant. 1:​2, 3; 1 Ped. 4:11.

⁸ Pagdadanay na Malinig Asin Daing Katuyawan: Minsan ngani mainit kitang inaagda ni Jehova na rumani sa saiya, kadungan kaiyan, liniliwanag nia na ini ginigibo basado sa satong pagtubod sa pinabolos na dugo ni Jesus, na “naglilinig sato sa gabos na kasalan.” (1 Juan 1:7; helingon man an Hebreo 9:14.) Ikapagpapadagos niatong pakosogon an satong pagtubod paagi sa personal na pag-adal sa Tataramon nin Dios asin pag-aplikar kan satong nanonodan. An iba sa huri nawawaran kaiyan huli ta magsalang dai sinda nag-aako nin espirituwal na kakanon o daing gayo sinda naghihingoa na iaplikar iyan sa saindang buhay. Ginigibo sinda kaining madaling tamaan kan mga pagsalakay ni Satanas. An iba nagin maluya sa espirituwal, na nagbunga nin inaktibidad. Makamomondo, an iba nagpabayang maholog sa grabeng pagkakasala, na dahelan na sinda matiwalag. Si Pablo nagpatanid: “Mag-ingat an siisay man na naghohona na nagtitindog na dai sia mapukan.” (1 Cor. 10:12) Kun tuyo niatong pababayaan an pag-adal, pag-atender sa mga pagtiripon, asin paglilingkod, madali kitang masisiod nin maraot na mga impluwensia asin sugot.​—Heb. 2:1; 2 Ped. 2:​20-22.

⁹ Kaipuhan na papagdanayon niato an satong sadiri na malinig sa gabos na paagi: sa pisikal, mental, espirituwal, asin moral. (2 Cor. 7:1) An kinaban na nasa palibot niato nagigin orog na biko asin marigsok aroaldaw. An Diablo daing ontok na nakaiisip nin mas mapandayang mga paagi na masiod kita. An pagdadanay na makosog sa espirituwal minasierto na kita dai magigin ‘ignorante kan saiyang mga pakana asin maenotan.’ (2 Cor. 2:11) An pagtotokdo asin hatol na inaako niato sa organisasyon ni Jehova nagpapangyari sato na mamidbid asin mapaglabanan an maraot na mga impluwensia.

¹⁰ An mga nangengenot sa kongregasyon may paninimbagan na tumao nin marahay na halimbawa sa iba sa pagdadanay na makosog asin malinig. Idinoon ni Pablo an paninimbagan na ini kan sia magsabi: “Girumdoma nindo idtong mga nangengenot saindo. . . . Mantang pinaghohorophorop nindo an saindang gawe aroga nindo an saindang pagtubod.” (Heb. 13:7) Kaipuhan na an nombradong kamagurangan asin ministeryal na mga lingkod magin arogan sa saindang personal na gawe saka sa pag-asikaso sa saindang mga paninimbagan bilang payo nin pamilya. Maninigo sindang maghingoa na magin arog kan hoben na si Timoteo, na sinadol na “magin kang arogan . . . sa pagtaram, sa gawe, sa pagkamoot, sa pagtubod, sa kalinigan.” (1 Tim. 4:12; 1 Ped. 5:3) Kita gabos igwa kan paninimbagan na ini na magin marahay na mga halimbawa paagi sa pagpapadanay sa kagalang-galang na gawe. Parate na hinuhusgaran nin mga bagohan an katotoohan, saka an organisasyon ni Jehova, basado sa naheheling ninda sa sato. Boot niatong siertohon na an naheheling ninda nakapakokosog sainda na manindogan sa malinig na organisasyon ni Jehova.

¹¹ An pagtitipon para sa pagkaligtas sa “dakulang kahorasaan” nagpapadagos na rumikas. (Kap. 7:14) Solamente an mga minakosog sa espirituwal asin nagdadanay na malinig an makaliligtas. An mga bagay dependeng gayo sa mga puntong ini: (1) pagpapadanay sa marahay na mga ugale sa personal na pag-adal asin paghorophorop sa Tataramon nin Dios; (2) pagpaheling nin tunay na personal na interes sa iba na may pagmawot na magpakosog; asin (3) sararong pagtarabangan na mapagdanay an malinig na gawe na magtataong onra sa ngaran ni Jehova. An paggibo kan mga bagay na ini magarantiya sato kan bendisyon asin proteksion ni Jehova kun matapos na an kinaban na ini. Makasasarig kita na makabibilang kita sa “mga maimbod [na] iniingatan ni Jehova.”​—Sal. 31:23.