Makikakabtang daw Kamo sa Impormal na Pagpapatotoo sa Disyembre?
1 Kabale sa satong regular na rutina sa buhay an espisipikong mga panahon na kaolayon an mga tawo manongod ki Jehova. Nagtatagama kita nin panahon sa pormal na pagpapatotoo sa harong-harong, mga pagdalaw liwat, asin pagkondukta nin mga pag-adal sa Biblia. Pero igwa nin dakol na impormal na panahon na puwede kitang makiolay sa mga tawo dapit sa katotoohan. Inaapod ta ining impormal na pagpapatotoo.
2 An ibang mga parahayag nakaheheling nin dakol na oportunidad na gumibo nin siring na klase nin ministeryo. Gabos kita puwedeng magmaigot na magin alisto sa siring na mga okasyon sa Disyembre mientras na kita nagbibiyahe pasiring asin hale sa mga kombension, nagbabakasyon, asin nagsosongko sa mga paryentes. Aaprobetsaran daw nindo an mga oportunidad para sa impormal na pagpapatotoo ngonyan na bulan?
3 Gumibo nin Patienot na mga Plano: Makatatabang sato an pag-andam na epektibong makapatotoo nin impormal. Tanganing matabangan kitang magibo ini, sinangkapan kitang marhay nin laen-laen na publikasyon. Bilang dagdag sa An Torrengbantayan asin Awake!, igwa kita nin nagkapirang tract na nagtatampok nin mga tema na nakapupukaw nin interes. Igwa nin mga brochure na nakaaakit sa mga tawo na may manlaenlaen na pinaghalean asin relihiyon. Igwa man kita nin pambulsang mga libro manongod sa mga temang pinagkakainteresan sa presente. Arin na mga publikasyon an naoogma kamong gamiton? Pag-isipan ini bilang pamilya. Dangan ensayohon an saindong sasabihon kun umabot an angay na panahon.
4 Mantang Nagbabakasyon: An ekselenteng panahon na impormal na makapatotoo iyo an kun nagbabakasyon. Kamo daw nagpaplano na magbiyahe sa tren o awto? Kun siring magdara nin Biblia asin saro sa mga publikasyon na sinambit sa itaas. An pagbasa sa siring na mga publikasyon sa pampublikong mga sakayan parateng nakapupukaw nin pag-orolay. Kun kamo nagbibiyahe sa kotse, horophoropon kun ano an puwede nindong sabihon kun kamo pumondo tanganing magpakarga nin gasolina o sa sarong restawran. Sa siring na mga situwasyon, puwede kamong magdara nin diit na suplay nin tract tanganing itao sa mga interesado. Kun kamo nakapondo sa lugar na may tanawon o sa dagat o parke, tibaad puwede kamong makapoon nin orolay paagi sa pagsabing: “Bako daw marahay kun an bilog na daga magin arog kaini?”
5 Sa mga Pandistritong Kombension: Makakukua man kita nin mga panahon na impormal na makapatotoo sa mga pandistritong kombension. An dakol nagin mapanggana sa pakikiolay sa mga empleyado sa hotel o restawran o sa pakikiolay sa mga tawo sa kalye o mientras na naghahalat nin awto. Siertohon na igwa nin lapel card durante kan kombension. Tibaad magduman kamo sa sarong tindahan asin tibaad hapoton kamo nin mga tawo kun ano an irinirepresentar kan saindong lapel card. Ini puwedeng gumiya saindo na makatao nin marahay na patotoo.
6 Puwedeng magtao sato an mga bakasyon asin kombension nin kaginhawahan asin kapahingaloan, pero dai niato lingawan an mga oportunidad na makatao kita nin impormal na patotoo. Mabunga an paaging ini nin pagpapatotoo, asin kaipuhan na makikabtang dian an mga lingkod ni Jehova. Arog ni Jesus, an sato logod na pagkamoot sa kapwa magpahiro sato na magtaram sa gabos na angay na panahon!—Mat. 5:14-16.