Gamiton an Tataramon nin Dios sa Tamang Paagi
1 Kan nagpapatotoo sa sarong opisyal, ‘binuka ni Felipe an saiyang ngoso asin, poon sa sarong Kasuratan, ipinahayag nia sa saiya an maogmang bareta manongod ki Jesus.’ (Gibo 8:35) Si Felipe ‘naggamit kan tataramon kan katotoohan sa tamang paagi.’ (2 Tim. 2:15) Minsan siring, ngonyan naobserbaran kan nagbibiaheng mga paraataman na dakol na parahayag an bihira nang gumamit kan Biblia kun naghuhulit. Ginagamit daw nindo an Biblia sa saindong ministeryo?
2 An Tataramon nin Dios iyo an gikanan nin gabos na tinutubod asin itinotokdo niato. (2 Tim. 3:16, 17) Iyan an nagrarani sa mga tawo ki Jehova asin nagtotokdo sa sainda para mabuhay. Iyan an dahelan kun taano ta importante na gamiton niato an Biblia sa satong ministeryo imbes na makipag-olay sana manongod sa mga topiko na pinagkakainteresan niato. (Heb. 4:12) Huling an kadaklan na tawo kadikit an aram manongod sa Biblia, kaipuhan niatong magbasa dian tangani na ikapaheling sa sainda an praktikal na giya na itinatao kaiyan asin an ngapit na itinatagama kaiyan para sa katawohan.
3 Magbasa Direktamente sa Biblia: Puede nindong probaran na maghulit na mayo nin bag. Puede nindong ibugtak an tampok na mga babasahon na boot nindong ialok sa sarong mahimpis na portpolyo asin kapotan an Biblia o ibulsa. Dangan, kun nakikipag-olay na kamo, puede nindong iluwas an Biblia na dai ipinamamate sa tawo na naghihingoa kamong magsermon. Iposisyon an sadiri nindo sa paagi na an naghihinanyog sa saindo makasubaybay sa saindong Biblia. Tibaad puedeng ipabasa sa saiya nin makosog an sarong bersikulo. Mas hararom an nagigin epekto kun naheheling nia an sinasabi kan Biblia imbes na nadadangog sana iyan sa saindo. Siempre, tangani na matabangan siang masabotan an punto kan teksto, idoon an mga tataramon na nagpapahayag kan ideya.
4 Pag-atubang na Saro Sana an Teksto: Pakapamidbid nindo, puede nindong sabihon: “An mga tawo nag-aasa sa manlaenlaen na gikanan nin giya sa saindang buhay. Ano sa paghona nindo an pinakamarahay na gikanan nin praktikal na giya? [Pasimbagon.] Ano an saboot nindo manongod sa mga tataramon na ini? [Basahon an Talinhaga 2:6, 7, asin pasimbagon.] An kadonongan nin tawo grabe an kakulangan, na ikinadedesesperar nin dakol na tawo. Pero an kadonongan nin Dios pirmeng masasarigan asin kapakipakinabang.” Dangan ipaheling an publikasyon na iinaatubang nindo, asin idoon gikan dian an sarong halimbawa kan praktikal na kadonongan nin Dios.
5 Ginamit ni Jesus an Kasuratan tangani na tabangan an mga sadiosan an puso. (Luc. 24:32) Pinatunayan ni Pablo paagi sa Kasuratan an mga bagay na itinokdo nia. (Gibo 17:2, 3) An satong kompiansa asin kagayagayahan sa ministeryo madadagdagan mantang kita nagigin orog na eksperto sa paggamit kan Tataramon nin Dios sa tamang paagi.