Ihiras sa Iba an Espirituwal na mga Kayamanan
1 Kapareho ni Moises, an modernong mga Saksi ni Jehova nakaaaram na an materyal na mga kayamanan kan kinaban na ini dai makakokomparar sa espirituwal na mga kayamanan kun sa halaga. (Heb. 11:26) An kuwarta nakababakal nin mga harong, kotse, asin iba pang rogaring, pero dai iyan makababakal nin buhay, katoninongan sa isip, o pag-oyon ni Jehova.
2 An kaaraman asin pakasabot sa Tataramon asin katuyohan nin Dios tunay na espirituwal na mga kayamanan. (Col. 2:3) An pambihirang mga kayamanan na ini makatatao nin tunay na kaogmahan ngonyan, kaiba an marigon na paglaom para sa ngapit. Mapalad nanggad kita na kita nag-ako nin siring na espirituwal na kayamanan!
KUN PAANO MAPAYAYAMAN AN IBA
3 Makatatabang kita na mapayaman sa espirituwal an dakol pang iba paagi sa pagpamidbid sa sainda kan satong mga publikasyon, ta ini makagigiya sainda sa ‘natatagong mga kayamanan’ nin diosnon na kadonongan. (Tal. 2:4) Sa Hulyo asin Agosto, iaalok niato an arin man sa mga pulyeto sa kada angay na okasyon. Kun gigirumdomon niato kun paano pinayaman kan mga publikasyon na ini an satong buhay, dai kita mag-aalangan kundi mahanap kita nin mga paagi na ikaalok an mga pulyeto sa pinakadakol na tawong mapupuwede. (Tal. 3:27) Isurat an adres nin nawarasan nin mga magasin, sa katuyohan na songkoon liwat asin ialok an pulyeto, na an pasohan makapoon nin pag-adal sa Biblia.
4 Sa espirituwal na sentido, paano kita makaaarog sa tawong matatakton sa Dios na yaon sa Salmo 112 na iwinaras sa dakol an saiyang mahahalagang bagay? (Sal. 112:1, 3, 9) Kaipuhan na hanapon niato an mga arog-karnero asin tabangan sinda na mapanigoan an saindang espirituwal na pangangaipo. (Mat. 5:3) Ini nagkakaipo na aprobetsaran niato an gabos na oportunidad na makapagpatotoo nin pormal asin impormal.
5 Sa nagkapirang lugar, an paghuhulit sa banggi nagin mabungahon ta mas dakol na tawo an nasa harong. Naprobaran na daw nindong magharongharong mga sarong oras bago an saindong Pag-adal sa Libro kan Kongregasyon? Taano ta dai gumibo nin depinidong mga areglo na gibohon ini?
6 Nakakakua daw kamo nin oras na magpatotoo sa saindong pinagtatrabawohan? An sarong tugang na babae ibinugtak sa saiyang lamesa an pirang magasin tanganing maheling iyan nin iba. Bago natapos an aga, ikinawaras na an gabos na magasin. Dakol sa saiyang mga katrabaho an nagpaheling nin tunay na interes, asin nakakua sia nin 18 suskripsion.
7 An pirak, bulawan, asin gabos pang ibang kayamanan dai makakokomparar sa espirituwal na mga kayamanan nin kaaraman na nakamtan niato paagi sa organisasyon ni Jehova. Paagi sa paghiras kan satong espirituwal na kayamanan sa iba, ipinaheheling niato an pag-apresyar sa satong inako asin nakakamtan niato an padagos na bendisyon ni Jehova.—Tal. 19:17.