Puedeng Mapasaindo an Kayamanan!
1. Taano ta dapat na isip-isipon an pagregular payunir?
1 Naghahanap daw kamo nin orog pang kagayagayahan asin satispaksion sa saindong buhay? Nakakakua daw kamo nin kaogmahan asin pagkakontento sa pagtabang sa iba? Nagmamawot daw kamo na dugangan an saindong paglilingkod ki Jehova? Kun iyo an simbag nindo sa arin man sa mga hapot na ini, kun siring maninigo nindong isip-isipon an pagregular payunir. Siempre, dapat na maingat na pag-isipan an pampamilya asin iba pang sono sa Kasuratan na mga paninimbagan, saka an salud patin pisikal na mga limitasyon.
2. Magsambit nin nagkapira sa espirituwal na kayamanan na nakakamtan nin mga regular payunir.
2 An ipinasabong nin Dios na mga isinurat ni Salomon ikinokonektar an bendisyon ni Jehova sa materyal na kayamanan. (Tal. 10:22) Ngonyan, an bendisyon ni Jehova sa pangenot minaresulta sa espirituwal na kayamanan. Nagsosopay an siring na kayamanan para sa mga regular payunir. Halimbawa, naeeksperyensiahan ninda an orog na kaogmahan sa pagtao sa iba mantang ‘tinutubos ninda an panahon’ hale sa personal na mga aktibidad. (Col. 4:5; Gibo 20:35) An saindang mga ginigibo huli sa pagkamoot naririsa asin inaapresyar ni Jehova. Dai noarin man maiinaan an halaga kan siring na “mga kayamanan sa langit.” (Mat. 6:20; Heb. 6:10) Apuera kaini, mantang pinapagdadanay nin mga payunir an ‘simpleng mata’ asin nagtitiwala na itatao ni Jehova an mga pangangaipo ninda, orog na nagigin makosog an saindang relasyon sa saiya.—Mat. 6:22, 25, 32; Heb. 13:5, 6.
3. Ano an kalaenan kan pagmamaigot na magkaigwa nin espirituwal na kayamanan asin kan pagmamaigot na magkaigwa nin materyal na kayamanan?
3 An pagmamaigot na magkaigwa nin materyal na kayamanan parateng nagbubunga nin “dakol na daing kuenta asin nakakaraot na mawot.” (1 Tim. 6:9, 10; Sant. 5:1-3) Nungkang arog kaini an bendisyon ni Jehova. An paggamit nin dakulang kabtang kan saindang panahon sa ministeryo nakakatabang sa mga regular payunir na mapagdanay an espirituwal na pagkatimbang asin an malinaw na pagkonsentrar sa orog na mahalagang mga bagay. (Fil. 1:10) Tanganing makapagpayunir, binayaan nin sarong tugang na lalaki an saiyang karera bilang inhenyero, na nakakaubos nin dakol na panahon. Sia nagsabi: “Nakakatension an sakong sekular na trabaho. Bakong arog kaiyan an pagpapayunir. Ngonyan natatabangan ko na an mga tawo asin natotokdoan ko na sinda kan katotoohan. Ini mas nakakakontento asin interesante nanggad.”
4. Paano binebendisyonan an mga regular payunir mantang nagdadara sinda nin bendisyon sa iba?
4 Mga Bendisyon sa Iba: Ngonyan, an gabos napapaatubang sa “delikadong mga panahon na masakit pakibagayan.” (2 Tim. 3:1) An mga tawo sa gabos na lugar nangangaipong gayo nin paglaom. An mga parabalangibog kan Kahadean naggagayagaya na maheling mismo na an mga tawong mayo nin paglaom puedeng magin positibo mantang naghihimate an mga ini sa maogmang bareta. Dakulaon nanggad na kagayagayahan iyan para sa mga regular payunir, na nagtatagama nin labing 800 na oras kada taon sa nagliligtas-buhay na gibohon na ini!—1 Tim. 4:16.
5, 6. Ano an puede nindong gibohon tanganing magin regular payunir?
5 Pinag-iisipan na daw nindong marhay an paglilingkod bilang regular payunir? Tibaad kaipuhan dian an ‘pagtubos nin angay na panahon’ hale sa mga aktibidad na bakong gayong mahalaga. (Efe. 5:15, 16) Dakol an naggibo na kaiyan asin pinasimple an saindang buhay, na huli kaiyan nainaan an panahon ninda sa sekular na trabaho tanganing magtagama nin dakol pang panahon para sa intereses kan Kahadean. Ikakaareglo daw nindo an saindong mga aktibidad tanganing umiba sa sainda?
6 Maghagad ki Jehova nin kadonongan tanganing makagibo nin praktikal na iskedyul. (Sant. 1:5) Anong mga bendisyon an malalaoman nindo bilang balos? Abundang espirituwal na kayamanan! Bebendisyonan man kamo ni Jehova nin materyal na mga bagay na kaipuhan nindo. (Mat. 6:33) An mga binabalo si Jehova sa bagay na ini maako nin “bendisyon sagkod na mayo na nin kulang.”—Mal. 3:10.