Ngonyan Na an Panahon na Maghulit!

1. Taano ta ngonyan na an panahon na maghulit?

¹ “Matakot kamo sa Dios asin pamurawayon sia.” Sa paggiya nin mga anghel, an mensaheng ini ipinapahayag “sa lambang nasyon asin tribo asin tataramon patin banwaan.” Taano? ‘Huli ta nag-abot na an oras kan paghokom nin Dios.’ Ngonyan, kita nabubuhay sa ‘oras kan paghokom’ na iyan, na an magigin kulminasyon iyo an paglaglag kan presenteng sistema nin mga bagay. Mahalagang marhay para sa mga tawo na ‘sambahon an Saro na naggibo kan langit asin daga asin dagat patin mga burabod nin tubig.’ Mayo nang ibang ginigibo ngonyan na ikakakomparar sa halaga o pagkaapurado kan pagbalangibog kan “daing katapusan na maogmang bareta.” Iyo, ngonyan na an panahon na maghulit!—⁠Kap. 14:6, 7.

2. Paano pinapatunayan kan mga lingkod ni Jehova na rinerekonoser ninda an pagkaapurado kan mga panahon?

² Durante kan nakaaging sampulong taon, an mga lingkod ni Jehova naggamit nin haros 12 bilyones na oras sa paghuhulit kan Kahadean asin paggibo nin mga disipulo. An dakol naggibo nin mga pagliliwat sa saindang buhay tanganing makikabtang nin mas lubos sa espirituwal na pag-ani. (Mat. 9:37, 38) Halimbawa, may promedyong labi sa 850,000 na parahayag kada bulan an nagpayunir kan 2004. Para sa mga regular payunir, naghahagad ini nin paggamit nin promedyong 70 oras kada bulan sa paghuhulit. Para sa mga auxiliary payunir, 50 oras an kahagadan.

3. Anong mga pagliliwat an parateng kaipuhan na gibohon kan mga parahayag tanganing makapagpayunir?

³ Kun Paano Makakapagpayunir: Huling rinerekonoser na “nainaan na an panahon na natatada,” an mga payunir nagmamaigot na papagdanayon na simple an saindang buhay. (1 Cor. 7:29, 31) Sinda naghahanap nin mga paagi na mainaan an mga gastos tanganing kadikit sanang panahon an magamit ninda sa sekular na trabaho. Halimbawa, an nagkapira nagbalyo sa mas sadit na mga erokan. An iba hinale an dai kaipuhan na materyal na mga rogaring. (Mat. 6:19-21) Sa parate, kaipuhan man nindang inaan an personal na mga pinag-aaabot. An gabos na ini ginigibo sa pasohan na magdusay nin orog na panahon asin atension sa ministeryo. (Efe. 5:15, 16) Huli sa pagkadesidido, espiritu nin pagsasakripisyo, asin mapagngayongayong pagsarig ki Jehova, dakol na parahayag an nakagibo nin praktikal na iskedyul na nagpapangyari sa sainda na magpayunir.

4. Anong praktikal na mga lakdang an makakatabang sa saindo na maghingoang maabot an pasohan na pagpapayunir?

⁴ Makakapagpayunir daw kamo? Taano ta dai hapoton an mapangganang mga payunir kun paano ninda nagibo iyan? Makiiba sa sainda sa ministeryo sa langtad, asin namitan an saindang kagayagayahan. Estudyaran an mga artikulo manongod sa pagpapayunir na yaon sa satong mga publikasyon. Magbugtak nin praktikal na mga pasohan para sa saindong sadiri na magseserbing mga gapong tongtongan pasiring sa pagpapayunir. Kun may mga balakid na sa presente nakakaolang sa saindo na maglingkod bilang payunir, sambiton iyan ki Jehova sa pamibi, asin hagadon sa saiya na tabangan kamo na resolberan an mga iyan.—⁠Tal. 16:3.

5. Paano an pagpapayunir nakakatabang sa sato na paoswagon an satong mga abilidad sa ministeryo?

⁵ Mga Bendisyon Asin Kagayagayahan: Pinapaoswag kan pagpapayunir an satong mga abilidad sa paggamit kan Tataramon nin Dios, na nagbubunga man nin dugang na kagayagayahan. “Sarong tunay na bendisyon an pagigin kayang gumamit kan Tataramon nin Dios nin katotoohan sa tamang paagi,” an komento nin sarong hoben na tugang na babaeng payunir. “Kun kamo nagpapayunir, parate nindong ginagamit an Biblia. Ngonyan kun ako naghaharongharong, nakakaisip na ako nin mga teksto na angay sa lambang kagharong.”—⁠2 Tim. 2:⁠15.

6. Anong pagsasanay an itinatao kan pagpapayunir?

⁶ An pagpapayunir nagtotokdo man nin dakol na mahalagang kaaraman sa pamumuhay. Makakatabang iyan sa mga hoben na makanood kun paano madonong na babadyeton an panahon, kun paano madonong na kakapotan an kuarta, asin kun paano marahay na makikiiba sa mga tawo. Napapatalubo kan dakol an orog na espirituwal na punto de vista sa buhay bilang resulta nin pagpapayunir. (Efe. 4:13) Apuera kaini, an mga payunir parateng pribilehiadong maheling an kamot ni Jehova na naghihiro sa pagtabang asin pagbalos sa sainda.—⁠Gibo 11:21; Fil. 4:11-13.

7. Paano an pagpapayunir nakakatabang sa sato na rumani ki Jehova?

⁷ Tibaad saro sa pinakadakulang mga bendisyon nin pagpapayunir iyo na natatabangan kita kaiyan na rumani ki Jehova. Makakasustenir ini sa sato sa mga pagbalo. An sarong tugang na babae na sa sarong peryodo nagtagal nin grabeng problema nagsabi: “An dayupot na relasyon ki Jehova na napatalubo ko paagi sa pagpapayunir nakatabang sa sako sa gabos na problemang iyan.” Idinugang nia: “Ogmahon ako na ginamit ko an sakong buhay sa panahon na ako nasa edad na sa paglilingkod ki Jehova nin bilog na panahon. Iyan nagpangyari sa sako na itao an sakong panahon asin kosog para sa iba sa mga paagi na dai ko noarin man naisip na magigibo ko.” (Gibo 20:35) Logod na maeksperyensiahan man niato an nagsosopay na bendisyon mantang ginigibo niato an satong pinakamakakaya para sa pinakaimportanteng gibohon na paghuhulit.—⁠Tal. 10:22.