Pagpapayunir​—Iyan daw Para sa Saindo?

¹ Sierto na an kadaklan sa saindo nakapaghapot na sa sadiri: “Para daw ta sako an pagpapayunir?” Ini marahay, ta ipinaririsa kaiyan an saindong pagmawot na orog pang makikabtang sa pagpalakop kan maogmang bareta kan Kahadean. Iyan an boot sabihon kan satong pagdusay ki Jehova, bako daw?​—na idusay niato an satong sadiri sa pagsamba ki Jehova na satong Dios sa bilog niatong puso, kalag, isip asin kosog. (Mar. 12:30) Pero bakong kita gabos makakapagpayunir, asin iyan masasabotan. An iba sato may mga obligasyon sa pamilya asin iba pa, asin an iba man maluya an salud o naggugurang na. Alagad sierto na dakol pa an puwedeng makanamit kan dakulang kaogmahan nin paglilingkod sa satong Dakulang Kaglalang bilang payunir. Kaya boot niatong konsideraron sa realistikong paagi an bagay na ini paagi sa pagsimbag sa pirang hapot na ihinahapot nin dakol. An sarong hapot iyo ini:

Hapot 1 “NABARETAAN KO NA AN PAGPAYUNIR BAKONG PARA SA GABOS. PAANO KO MAAARAMAN KUN IYAN PARA SA SAKO O BAKO?”

² Ini dependeng gayo sa saindong kamugtakan asin Makakasuratan na mga paninimbagan. Igwa nin mga dai puwedeng gumamit nin 90 oras kada bulan sa direktang paghuhulit kan Kahadean huli sa saindang kamugtakan sa buhay. Alagad dai boot sabihon kaini na kulang an saindang kaimbodan. Halimbawa, kadakol kan maimbod na mga agom na babae na marahay na mga arogan bilang Kristianong agom asin ina patin naghihingoa na ihiras an maogmang bareta sa gabos na oportunidad. May mga napapahiro na gumamit nin dakol na oras kada bulan sa pagdara kan maogmang bareta sa saindang kataraed. Asin kun may oportunidad ginagamit ninda an sarong bulan sa pag-auxiliary payunir, na nagkakamit kan mga kaogmahan gikan sa paglilingkod na iyan. (Gal. 6:9) Sa presente nindang kamugtakan talagang dai ninda kayang magregular payunir. Alagad dai ini minaolang sainda sa pagpatalubo sa espiritu nin pagpayunir sa kongregasyon. Puwede nindang iiba sa paglilingkod an mga hoben asin bagong parahayag, na tinatabangan sindang magin eksperto sa pagtokdo sa iba, asin dinadagka na mag-auxiliary asin magregular payunir.

³ Pero dakol an mayo nin obligasyon sa pamilya asin puwedeng magpayunir. Kaya marahay na siyasaton niato an satong sadiri sa pana-panahon, na naghahapot, Kaya ko daw na gumibo nin orog pa sa pagbalangibog kan maogmang bareta? Sa pag-adal niato kan Tataramon nin Dios, kita gabos nakakasabot na nasa huring kabtang na kita kan “mga huring aldaw.” Pinagmamaigotan kan kaiwal na lamuson an bilog na banwaan nin Dios sa daing-pagkamoot, materyalistikong kinaban na ini. Alagad ta dai puwede! Kita siblag sa kinaban, asin “ini an kapangganahan na nakadaog sa kinaban, an satong pagtubod.” (1 Juan 5:4) Kaya basado sa pagtubod na ini, maninigo kitang maghingoa na kamtan an gabos na pribilehiyo nin paglilingkod na nasa atubang niato. Kun kita libre na mag-auxiliary asin, tibaad sa huri, magregular payunir, iyan maninigo niatong gibohon. Pinalalataw kaini an hapot na:

Hapot 2 “PAANO KO MASISIERTO NA MASUSUSTENTOHAN KO AN SAKONG SADIRI KUN AKO MAGPAYUNIR?”

⁴ Ini man pagbalo sa saindong pagtubod. Baga man kita parahayag sa kongregasyon, o naghingoang magpayunir, an mga tataramon ni Jesus sa Mateo 6:​30-33 aplikado sa sato gabos: “Ngonyan, kun ginugubingan nin Dios nin siring an mga doot sa oma, na yaon ngonyan asin sa aga isusugba sa horno, kamo pa daw an dai nia paggubingan, kamo na diit an pagtubod? Kaya dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon. Huli ta an saindong langitnon na Ama nakakaaram na kaipuhan nindo an gabos na bagay na ini. Kaya padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” Kaya, iginagarantiya sa sato nin Dios na itatao nia an gabos na kaipuhan sa buhay kun tubudon niato an saiyang isinabi, na ginigibo an saiyang kabotan na may pagtubod. Kun kaya niato na liwaton an mga bagay-bagay tanganing makapagpayunir, asin iyan ginibo niato, si Jehova padagos na magtatagama. Humanap kamo sa bilog na kinaban asin dai kamo makakakua ni sarong maimbod na payunir na napiritan na makilimos!​—Sal. 37:​25, 26.

⁵ Tanganing magin praktikal, taano ta dai nindo kaolayon an pira sa maogmang mga payunir sa saindong kongregasyon o sirkito​—an mga nagkamit na nin kaogmahan sa paglilingkod na ini sa laog nin duwa, tolo asin labi pang taon, tibaad 20 o 30 anyos pa ngani. Makakatabang ini na mahale an pagduda kun baga para sa saindo an pagpayunir. Kaolayon an mga ini na ginibo nang propesyon an pagpayunir, asin padagos na nag-oogma sa paglilingkod na ini. Ikakaesplikar ninda kun paano ninda iyan ginigibo. Asin kun kamo magpoon nang magpayunir, sierto na an mga “beteranong” ini padagos na makakapagtao saindo nin marahay na sadol. Magtubod man kamo na si Jehova makakapagtao nin mga paagi na mapangganahan minsan an garo-bukid na mga kaolangan.​—Mat. 17:20.

⁶ An sarong paraataman sa sirkito na dai pa nahahaloy na nagsongko sa Brooklyn hale sa Oriente nag-estorya dapit sa sarong tugang na babae na parateng nag-o-auxiliary payunir. Ipinaheheling kan saiyang halimbawa an kayang gibohon nin pagtubod. Nag-iistar sia kaidto sa Manchuria kan an Hiroshima laglagon kan bomba atomika, asin nagadan an kadaklan sa saiyang pamilya. Huli sa makangingirhat na baretang ini nanluyang gayo an saiyang pisikal na sistema kaya, dai nahaloy pakapuli nia sa Hapon, sia nagin inbalido, na paralisado an bilog niang hawak. Dangan nanodan nia an katotoohan asin nabautismohan. Gustong-gusto niang isabi sa iba an mamuraway na paglaom na ini! Minsan ngani an nagagamit sana nia iyo an kalamnan kan saiyang lalauogon, nakanood siang sumurat paagi sa lapis o krayola sa saiyang ngoso, asin iilustrar nin magayon an mga surat na ipadadara nia sa mga interesado dapit sa paglaom sa Kahadean. Naghuhulit man sia sa dakol pa na minasongko sa saiyang harong. Kan sumongko an paraataman sa sirkito, saiyang naaraman na an tugang nagpromedyo nin 106 oras sa paglilingkod sa laog kan nakaaging anom na bulan. Ini magayonon nanggad na ilustrasyon kun paano an dai madadaog na pagtubod nakakatabang na mapangganahan an mga olang sa orog na pakikikabtang sa pagpalakop kan maogmang bareta!

⁷ An haloy nang mga payunir makakapag-estorya dapit sa mga kapangganahan ninda huli sa saindang pagtubod. May ikakasaysay sindang mga panahon na madiklom an gabos; minsan siring, sinda nagpadagos, dangan sa dai linalaoman na mga paagi an mga problema parateng nahahale tanganing sinda makapagpadagos sa minamahal nindang paglilingkod bilang payunir. Iyan mga katunayan na, totoo sa saiyang panuga, si Jehova “nagtatao nin kosog sa napapagal; asin sa saro na mayo nin dinamikong kosog saiyang pinadadakol an bilog na puwersa.”​—Isa. 40:29.

⁸ Garo baga may pira na orog na naaapektaran kan mga panggigipit kan materyalistikong kinaban na ini ki sa iba. Minsan siring, maninigo kitang magtubod na an mga panggigipit na ini dai man kaipuhan na makaolang sa satong pagpayunir. Sa mga nasyon na kadakol kan materyalistikong mga pan-akit, kadakol kan satong kapwa mga Kristiano na nagpapayunir. Halimbawa, sa Hapon, 25 porsiento kan gabos na parahayag sa presente nag-oogma sa iba-ibang kabtang nin pagpayunir kada bulan. Ano an nagpangyari sa sainda asin sa iba pa sa bilog na kinaban na makapagpayunir?

⁹ An mapangganang mga payunir may espirituwal na motibo, asin digdi nakakapareho sinda kan gabos na lingkod nin Dios na bilog-na-kalag na naglilingkod. Halimbawa, kita gabos nagtutubod na yaon na kita sa “mga huring aldaw.” Namomotan niato si Jehova asin an saiyang mga areglo para sa satong daing sagkod na kaogmahan. Dai niato ipinamumugtak na ini saro sanang relihiyon na pareho nin iba. Minsan ngani kadakol kan materyal na mga bagay sa palibot, ginigibo niato an gabos na pagmamaigot na dai maoripon kan siring na mga bagay. Pero an mga nagdesisyon na magpayunir parate na nagsiyasat nin panibago sa saindang kamugtakan nin pamumuhay. Napatalubo ninda an ideya sa buhay na mamuhay nin simple, asin sinda mahigos. Sa halipot, pagkatapos na lubos na mapagturotimbang an saindang kamugtakan ini tinawan ninda nin lugar sa saindang buhay.

¹⁰ Sa mga lugar na dakol an nagpapayunir, parate na an mga barobata minalaog sa paglilingkod na ini pagkagraduwar tolos sa haiskul, na parateng huli sa bagay na ini an pasohan na ibinugtak kan saindang mga magurang para sa sainda poon sa pagkaaki. Tibaad nagplano nang magpayunir an mga nag-aadal sa Biblia bago pa sinda mabautismohan. Nadiskobre nin dakol na agom na babae sa Hapon na mga payunir na iyan nakakatabang na mapagdanay an saindang harong na simple asin areglado. Pagkaentra kan mga aki, an mga tugang na babaeng ini listo asin marikas na naglilinig sa harong dangan minaluwas sa paglilingkod. May mga payo nin pamilya na nag-ako nin mga trabahong part-time na hinahaboan nin iba​—mga trabaho na amay an oras o bakong gayong maogma an gibo​—tangani sindang makapagpayunir. An mga tugang na lalaki asin babaeng ini may pagtubod na naghingoa asin benendisyonan kan mga kaogmahan sa pagpayunir. Puwede man daw kamong maghingoa asin makanamit nin siring na mga kaogmahan? Nasa saindo na an pagturotimbang sa saindong kamugtakan, an pagkonsiderar sa mga oportunidad, asin an pagdesisyon. Pero, may naghahapot:

Hapot 3 “AKO TIN-EDYER ASIN DAI KO KAYANG ARAMON KUN ANO AN BOOT KONG GIBOHON PAKALIHIS NIN MGA ANOM NA BULAN, KAYA PAANO KO MAGIGIBONG PARASIEMPRENG KARERA AN PAGPAYUNIR.”

¹¹ An terminong “karera” may sentido nin pagkapermanente na tibaad dai pa nindo napag-andaman, asin iyan natural sana. Tibaad bakong pamilyar saindo an pagpayunir. Tibaad napag-isip-isip na nindong mag-agom asin magpamilya, na siyempre makakaapektar sa kakayahan nindong magdanay sa pagpayunir. Ini balidong personal na mga bagay.

¹² An saindong mga desisyon sa panahon na ini tibaad may dakulang epekto sa magigin direksion kan saindong buhay sa maabot na mga taon. Kaya minsan ngani dai pa segurado an saindong mga pasohan, posible na boot nindong panoon an saindong buhay nin bagay na kapakipakinabang asin nakakakontento. Imbes na panoon an bakanteng panahon pagkagraduwar nindo nin trabaho na pambilog-na-panahon, taano ta dai isipon na gumamit nin pirang bulan sa pag-auxiliary payunir? Kun magustohan nindo iyan, tibaad magdesisyon kamong magregular payunir.

¹³ Pakatapos nin pirang bulan o sarong taon sa paglilingkod na iyan, tibaad mas klaro na an saindong pagmansay sa kun ano an boot nindong gibohon sa buhay. Minsan pa magdesisyon kamong mag-agom, kadakol kan mag-agom na nakinabang na gayo sa pag-iiba ninda sa pagpayunir sa enot na mga bulan kan saindang pag-agoman​—na parate na an saro o sindang duwa nagpapadagos sa pagpayunir sa bilog na panahon nin saindang pag-agoman.

¹⁴ Ano man an mangyari, baga man may agom o mayo, an saindong pagpayunir makakapaoswag asin makakakompleto sa saindong edukasyon sa paagi na dai ikakatao nin ibang aktibidad o pagsasanay. An eksperyensiang makakamtan nindo sa pakikipag-olay asin pakikiiba sa mga tawo na manlaenlaen an pinaghalean, sa pag-atubang asin pagkaresolber nindo sa mga kaolangan asin sa pakakultibar nin personal na kahusayan asin disiplina-sa-sadiri magigin kapakipakinabang saindo sa ngapit. Asin girumdoma​—iyan dai nindo mapapatunayan kun iyan dai nindo probaran.

¹⁵ Naliliwat an kamugtakan niato gabos sa buhay. Girumdoma na mayo sato nin nakakaaram kun ano an mangyayari sa aga. Kakadikit kan mga bagay sa buhay na talagang permanente. Kaya taano ta dai siyasaton nin seryoso an presente nindong kamugtakan asin maingat na pagturotimbangon an pagpayunir. Kun mayo nin ibang nakakaolang saindo ngonyan kundi an dai pakapagdesisyon, taano ta dai lumakaw sa dalan na aram nindong kaoyon sa kabotan ni Jehova para sa satong panahon? Tibaad iyan magin an pinakamarahay na karera para sa saindo.

Hapot 4 “MAY MGA NAGSASABI NA PUWEDENG MAGIN DAKULANG PROBLEMA AN PAG-ABOT SA MGA KAHAGADAN SA PAYUNIR KUN DAI MO MAABOT AN ORAS HULI SA KAHELANGAN O IBA PANG DARAKULANG PROBLEMA.”

¹⁶ Totoo na kun kamo magregular payunir hahagadon saindo na gumamit nin mga 90 oras kada bulan sa langtad, o 1,000 oras kada taon. Sa normal na mga kamugtakan, ini rasonableng patolodan para sa kadaklan na payunir. Sa promedyo, ini nangangahulogan nin tolo sanang oras sa paglilingkod aroaldaw. Siyempre, pasil sanang lumataw an problema kun bakong tama an pag-iskedyul nindo asin kun kulang kamo nin disiplina-sa-sadiri na otobon iyan.

¹⁷ Minsan siring, puwede man na mawara an dakol na oras para sa Kahadean huli sa grabeng helang o iba pang darakulang pangyayari na dai linalaoman. Tanganing mabawi iyan, tibaad kaipuhan kamong gumamit nin lima, anom o labi pang oras sa paghuhulit aroaldaw sa laog nin pirang bulan. O, tibaad an sarong payunir magkulang nin sanggatos o labi pang oras sa kapinonan kan taon nin paglilingkod huli sa mga pangyayaring dai linalaoman. Dangan sa paghinanapos kan taon, mantang binabawi nia an nawarang panahon, ano kun may maglataw na naman na magabat na problema asin orog pa siang dai makaabot sa patolodan? Ini, pati an paghihingoa na sustentohan an saiyang sadiri sa part-time na trabaho puwedeng maging magabat na pasanon, na nagpapagabat sa maimbod na isip kan payunir. Minalataw na dakol an dai na sana nagpapayunir huli ta nahahadit sinda sa tibaad dai ngani mangyari. May solusyon daw?

¹⁸ Igwa. Boot niamong ipaaram sa saindo na kun kamo may helang, o huli sa ibang mahalagang dahelan dai nindo kayang aboton an kahagadan na oras sa laog nin pirang bulan, puwede nindong pakiolayan an grupo nin mga magurang sa saindong kongregasyon na gumibo nin surat sa Sosyedad na iiiba sa saindong report, na isinasabi sa samo an mga detalye kan saindong problema. Kun pinaghohona kan mga magurang, pakalihis nin lubos na pagkonsiderar, na marahay na kamo togotan na magpadagos sa pagpayunir na dai na pinoproblema an pagbayad sa nawarang mga oras, kun siring iyan maninigo nindang irekomendar sa samo, asin maoogma kaming tawan nin konsiderasyon an saindong kamugtakan.

¹⁹ Siyempre, sa presenteng areglo nin 1,000 sanang oras para sa sarong taon, dai linalaoman na an mga payunir makua nin panahon sa saindang pagpayunir para sa mga aktibidad na dai kinakaipuhan na huli kaiyan magkukulang an saindang oras sa paglilingkod. O kun an dahelan kan hababang oras iyo an maluyang pag-iskedyul o kakulangan nin disiplina-sa-sadiri, maninigong mamatean kan payunir na kaipuhan niang bayadan an nawarang mga oras. Minsan siring, kun mangyari an haloy na paghelang, o aksidente o magabat na problema sa pamilya, makakalaom kamo na samong kokonsideraron an saindong mga pangangaipo bilang payunir.

²⁰ Dakol na payunir an dakol nang taon na nagin mahigos na mga lingkod ni Jehova asin sa bilog nindang puso boot nindang magpadagos sa pagpayunir, asin boot man niamo iyan. Alagad ano kun marisa nin saro na talagang dai nia kayang aboton an mga kahagadan sa laog nin halawig na panahon? Kun siring, daing duwaduwa na an madonong na gibohon sia bumalik sa paglilingkod bilang parahayag sa kongregasyon asin mag-auxiliary payunir basta mapupuwede.

Hapot 5 “BOOT KONG MAMATEAN NA TALAGANG MAY NAHAHAMAN AKO SA SAKONG GINIGIBO ASIN BOOT KONG MAOGMA SA PAGGIBO KAIYAN. ITATAO DAW SAKO KAN PAGPAYUNIR AN PAGKAKONTENTONG IYAN?”

²¹ Bueno, ano an kaipuhan tangani kamong maogma? An Sermon sa Bukid ni Jesus may sinasabing siyam na paagi tanganing maogma. (Mat. 5:​3-12) Ipinaheheling kaiyan na an presenteng kamugtakan sa buhay nin saro na sakop nin panahon asin dai linalaoman na mga pangyayari asin an humanitaryo sanang mga gibo dai nagtatao nin tunay na kaogmahan.

²² Imbes, itinokdo ni Jesus na an lubos na kaogmahan minagikan sa mga gibo na konektado sa pagsamba ki Jehova asin sa kaotoban kan saiyang mga panuga. Iyan minagikan sa paggibo kan aram niatong tama. Asin madonong na itinokdo ni Jesus an orog na kaogmahan sa pagtatao sa iba kun ikokomparar sa pagkamit sana niato nin mga bagay. Tunay na mayo na nin regalong maorog pa sa paglaom na buhay na daing sagkod na ikakatao niato sa satong kapuwa.​—Gibo 20:35.

²³ Alagad, tibaad ihapot nindo, Paano ipapamate sako kan pagpayunir na ako may nahahaman, mantang aram ko na may mga parahayag na mas mapanggana sa pagtabang sa mga tawong makanood kan katotoohan ki sa ibang payunir?

²⁴ Enot, marahay na aramon niato an tamang kahulogan kan terminong “nahaman.” An kapangganahan dai perming mahuhusgaran basado sa panluwas na mga resulta. May mga tawo na, huli sa saindang personalidad o natural na mga abilidad, mapanggana sa pagkombensir sa iba na akoon an soberaniya ni Jehova asin tunay na benebendisyonan sinda sa saindang gibohon. Alagad bakong mga kabilangan an mahalaga ki Jehova. Imbes, an mahalaga iyo an satong ginigibo nin odok sa puso sa pagpamidbid asin pagpamuraway sa saiyang ngaran.

²⁵ Kun an saindong kaogmahan minagikan sa permanente, kapakipakinabang na mga bagay, imbes na sa temporaryong mga pakinabang na itinatao kan kinaban, asin kun kombensido kamo na an kahadean ni Jehova madali nang magtao nin abundang buhay sa gabos na naglilingkod sa saiya asin itinotogot kan saindong kamugtakan na orog na makikabtang sa pagsabi sa iba dapit kaiyan​—kun siring, iyo, an pagpayunir magtatao saindo nin pakamate na kamo may nahaman asin gigibohon kamong maogma.

Hapot 6 “BAGA MAN AKO MAGPAYUNIR O DAI​—BAKO DAW NA SAKO NA SANA IYAN, MANTANG BAKO MAN IYAN NA KAHAGADAN PARA SA BUHAY NA DAING SAGKOD?”

²⁶ Totoo, an pagpayunir bakong kahagadan para sa buhay na daing sagkod. Pero an paglilingkod sa Dios sa bilog na puso asin sa bilog niatong kalag iyo. Asin pag-abot sa pagpayunir, angay an prinsipyo kan 2 Corinto 9:​7 (The New English Bible): “An lambang saro maninigong magtao sono sa napagdesisyonan nia; dai maninigong magkaigwa nin pag-urong-sulong, dai napipiritan; an Dios namomoot sa maogmang paratao.” Kaya kun an iba an madesisyon kun baga kamo maninigong magpayunir, iyan magigin nang paghusgar sa saindong kamugtakan asin sa saindong puso, bagay na mayo kita nin katanosan na gibohon bilang tawo.

²⁷ Malinaw na bahala na an lambang saro na magdeterminar kun ano an gigibohon, sono sa saiyang puso asin kamugtakan. “Patunayan nia an saiyang gibo,” an surat ni Pablo, “dangan may dahelan na siang mag-ogma dapit sa saiya sana, asin bakong sa pagkomparar sa ibang tawo.”​—Gal. 6:4.

²⁸ Kaya, sa hapot kun baga siisay an maninigong magpayunir, kaipuhan na umoyon kita na kamo sana an makakasimbag. Alagad linalaom niamo na an impormasyon na itinao digdi matabang saindo na pagturotimbangon an mahalagang bagay na ini sa tamang liwanag. May mga tanda na makakatabang saindo na makaabot sa tamang desisyon.

²⁹ Halimbawa, kun kamo mahilig na gayo sa “masiram na buhay” asin gusto nindong palibotan an saindong sadiri nin materyal na mga rogaring, posible na daing gayo kamo maaakit sa pagpayunir. An paggamit nin 90 oras bulan-bulan sa paggibo nin mga disipulo asin pag-asikaso sa iba pang mga paninimbagan sa palakaw na ini nin mga bagay nangangaipo nin espiritu nin pagsakripisyo sa sadiri.

³⁰ An saro pang bagay na maninigo nindong pag-isipan na gayo iyo na kun baga kamo nagpaplanong magpayunir huli sa tamang mga dahelan, espirituwal na mga dahelan. An mga minalaog sa paglilingkod na ini sa mga dahelan na bakong espirituwal parate na nawawaran nin gana. Kun marisa na ninda na iyan talagang trabaho nawawaran na sinda nin interes. Halimbawa, kun an saro nagpayunir huli sana ta ginigibo iyan kan saiyang mga amigo, tibaad mayo sia nin marigon na basihan sa pagpadagos.

³¹ An pagpayunir dai man maninigong magin paagi nin iba na makamate na sinda superyor sa mga dai naggigibo kaiyan. An siring na pagheling sa sadiri magigin pag-isip na sia bilog na kalag na naglilingkod sa Dios asin an iba dai. Ini magigin peligrosong kaisipan, arog kan sabi ni Pablo: “Siisay ka na naghohokom sa oripon nin iba? Sa saiyang kagurangnan sia nagtitindog o napupukan.”​—Roma 14:4.

³² Kun kamo nag-aalangan ta pinagdududahan nindo an saindong kakayahan o dai kamo nakakaseguro sa mangyayari sa ngapit, kun siring an solamenteng ikakarekomendar niamo iyo an isinadol ni Jehova sa mga andam na magsarig sa saiya paagi sa paggibo kan saindang kabtang: “Baloa nindo ako . . . asin helinga kun baga dai ko bukasan an mga gaha sa langit asin ulaan ko kamo nin bendisyon sagkod na may pangangaipo.”​—Mal. 3:​10, The New English Bible.

Kaya, para sa saindo daw an pagpayunir? Mag-oogma kami kaiba nindo kun huli sa impormasyon na ini nakapagsabi kamong​—“Iyo, para sa sako!” Asin kun desisyon nindong magpayunir, tunay na makakalaom kamo sa maogmahon na pribilehiyo.