Paglilingkod Bilang Payunir—Iyan daw Para sa Saimo?
1 “Dai na akong ibang maisip na gibohon. Dai na nanggad akong maisip na ano man na magtatao kan iyo man sanang kagayagayahan.” Siisay an nagsabi kaini? Saro sa ginatos na ribong Saksi ni Jehova na ginibo an bilog na panahon na ministeryo na magin saindang magayagayang karera sa buhay. Mapagngayongayo na daw nindong hinorophorop kun baga para sa saindo an paglilingkod bilang payunir? Huling lubos na kitang nagdusay ki Jehova, siertong dapat niatong horophoropon kun baga puede kitang magkaigwa nin mas lubos na pakikikabtang sa pagpalakop kan maogmang bareta kan Kahadean. Sa katuyohan na iyan, konsideraron tabi an nagkapirang ihinahapot nin dakol manongod sa paglilingkod bilang payunir.
HAPOT 1: “May mga nagsasabi na an pagpapayunir bakong para sa gabos. Paano ko maaaraman kun baga iyan para sa sako?”
2 An simbag depende sa saindong mga kamugtakan asin Makakasuratan na mga obligasyon. Igwa nin dakol na an salud o kamugtakan sa buhay sa presente dai nagtotogot sa sainda na gumamit nin 90 oras kada bulan sa ministeryo. An sarong halimbawa iyo an dakol na fiel na tugang na babae na Kristianang mga agom asin ina. Sinda nakikikabtang sa ministeryo sa pinakaparateng mapupuede sagkod sa itinotogot kan saindang mga kamugtakan. Kun may oportunidad, sinda nag-o-auxiliary payunir nin sarong bulan o labi pa kada taon, na inaani an mga kagayagayahan na minagikan sa pagpahiwas kan saindang pakikikabtang sa paglilingkod. (Gal. 6:9) Dawa ngani an saindang mga kamugtakan tibaad dai magtogot sa sainda na maglingkod nin bilog na panahon bilang mga payunir sa presente, sinusuportaran ninda an espiritu nin pagpapayunir asin sinda bendisyon sa kongregasyon bilang maigot na mga parahayag kan maogmang bareta.
3 Sa ibong na lado, an dakol na tugang na lalaki asin babae na medyo daing mga obligasyon nagtaong lugar para sa paglilingkod bilang payunir paagi sa pagliwat kan saindang mga prioridad. Kumusta man kamo? Ika daw sarong hoben na nakatapos na sa saimong sekular na pag-eskuela? Kamo daw agom na babae na an agom nakasusustento nin igo para sa pamilya? Kamo daw may agom na mayong sinusustentohan na mga aki? Kamo daw nagretiro na sa saindong sekular na okupasyon? An pagpayunir o dai pagpayunir desisyon na dapat gibohon kan kada saro para sa saiyang sadiri. An hapot, Puede mo daw na tawan nin lugar sa saimong buhay an pagpapayunir?
4 Ginagamit ni Satanas an saiyang kinabanon na palakaw nin mga bagay tanganing panoon nin mga disturbo an satong buhay asin laomon kita sa paslong pamumuhay. Kun determinado kitang magdanay na bakong kabtang kan kinaban, tatabangan kita ni Jehova na papagdanayon na enot an intereses kan Kahadean asin pag-aaboton patin akoon an gabos na pribilehio nin teokratikong paglilingkod na bukas para sa sato. Kun maliliwat nindo an saindong mga kamugtakan tangani na makapaglingkod bilang payunir, taano ta dai gibohon iyan?
HAPOT 2: “Paano ako makasisierto na may pinansial akong ikasusuportar sa bilog na panahon na paglilingkod?”
5 Totoo na sa dakol na nasyon an oras sa sekular na trabaho na kaipuhan kada semana tanganing makua an ibinibilang na mga pangangaipo sa buhay nadagdagan na pakalihis nin dakol na taon. Minsan siring, dakol an nagpayunir sa laog nin dakol na dekada, asin padagos sindang sinususteniran ni Jehova. Tanganing magin mapanggana bilang payunir, kaipuhan an pagtubod asin espiritu nin pagsakripisyo sa sadiri. (Mat. 17:20) Sinisierto sa sato sa Salmo 34:10 na ‘an mga naghahanap ki Jehova dai magkukulang nin ano man na marahay.’ An siisay man na minalaog sa paglilingkod bilang payunir maninigong gibohon iyan na may lubos na kompiansa na sususteniran sia ni Jehova. Ginigibo nanggad nia iyan sa fiel na mga payunir sa gabos na lugar! (Sal. 37:25) Siempre, kaoyon sa mga prinsipyo sa 2 Tesalonica 3:8, 10, asin 1 Timoteo 5:8, an mga payunir dai naglalaom sa iba na suportaran sinda sa pinansial.
6 An siisay man na nagpaplanong maglingkod bilang payunir maninigong gibohon an siring sa sinabi ni Jesus: ‘Tumukaw nguna asin kuentahon an gastos.’ (Luc. 14:28) An paggibo kaini nagpapaheling nin praktikal na kadonongan. Makipag-olay sa mapangganang mga nagpayunir sa laog nin dakol na taon. Hapoton kun paano sinda sinusteniran ni Jehova. An saindong paraataman sa sirkito sarong eksperyensiadong payunir na maoogmang magtao nin mga suhestion sa kun paano magigin mapanggana sa bilog na panahon na ministeryo.
7 An saro tibaad dai noarin man lubos na maeksperyensiahan an katotoohan kan panuga ni Jesus sa Mateo 6:33 sagkod na ipabaya nia an saiyang sadiri sa mga kamot ni Jehova. An sarong fiel na payunir nagsaysay: “Pag-abot mi kan sakong kapadis sa bagong destino bilang mga payunir, igwa sana kami nin pirang gulay, sarong pakete nin mantikilya, asin mayong kuarta. Naubos niamo an pamanggihan asin nagsabi, ‘O mayo na kita para sa aga.’ Ipinamibi niamo iyan, asin nagtorog. Amay pagkaaga an sarong lokal na Saksi nagsongko asin nagpamidbid, na nagsasabi, ‘Namibi ako na logod magpadara si Jehova nin mga payunir. Ngonyan puede akong umiba sa saindo sa bilog na aldaw, alagad huling nag-iistar ako sa puerang lugar, kaipuhan kong mangodto kaiba nindo, kaya dinara ko an kakanon na ini para sa sato gabos.’ Idto kadakol na karneng baka asin gulay.” Bakong makangangalas na sinierto sa sato ni Jesus na ‘dai na kita magparahadit dapit sa satong kalag’! Dangan idinugang nia: “Siisay sa saindo na sa paghadit makadadagdag nin sarong maniko sa lawig kan saiyang buhay?”—Mat. 6:25, 27.
8 An kinaban sa palibot niato paorog nang paorog na nagigin materyalistiko. Paorog nang paorog kitang iniimpluwensiahan na umarog. Minsan siring, an pagkaigwa nin mapakumbabang apresasyon sa bilog na panahon na ministeryo pinangyayari kitang magin kontento sa dikit na materyal. (1 Tim. 6:8) An mga payunir na pinagdadanay na simple asin areglado an saindang buhay igwa nin mas dakol na panahon para sa paglilingkod patin nagkakamit nin orog na kagayagayahan saka espirituwal na kosog sa pagtotokdo sa iba kan katotoohan. Maski ngani dai man naghihingoang mamuhay na nagpapainda sa sadiri, an saindang timbang na aktitud sa saindang situwasyon sa pagbuhay nagpangyari sa saindang magkamit kan mga bendisyon sa pagpapayunir.
9 Kun talagang namamatean nindo na kita nabubuhay na sa huring mga aldaw asin na nauubos na an panahon para sa maraot na kinaban na ini, mamomotibar kamo sa espirituwal na gumibo nin kinakaipuhan na mga pagsasakripisyo tangani na ihulit an maogmang bareta sa gabos na oportunidad. Paagi sa pagsiyasat giraray sa saindong kamugtakan sa pagbuhay asin paagi sa pagpabaya kan bagay na iyan sa mga kamot ni Jehova, tibaad marealisar nindo na puede nindong paglingkodan sia nin bilog na panahon. Dawa kun kaipuhan nindong lingawan nguna an materyal na mga kagustohan tangani na makapagpayunir, makakamtan nindo an mayaman na mga bendisyon ni Jehova.—Sal. 145:16.
HAPOT 3: “Bilang sarong tinedyer, taano ta maninigo kong konsideraron na pilion bilang karera an paglilingkod bilang payunir?”
10 Mantang tinatapos mo an huring pirang taon sa pag-eskuela, natural sanang nag-iisip ka dapit kan ngapit. Gusto mo iyan na magin segurado, maogma, asin nakakokontento. Tibaad hingoahon nin mga parakonseho sa eskuelahan na giyahan ka pasiring sa sarong halangkaw an sueldong karera na nagkakaipo nin dakol na taon na edukasyon sa kolehio. An saimong sinanay na marhay na Kristianong konsensia nagsasabi sa saimo na maninigo kang mag-andam na maglingkod ki Jehova sa pinakalubos na mapupuede. (Ecl. 12:1) Tibaad nag-iisip ka man na pag-abot nin panahon ika maagom asin magpapamilya. Ano an gigibohon mo?
11 An mga desisyon na ginigibo nindo sa panahon na ini sa saindong buhay puedeng magdeterminar kan bilog nindong ngapit. Kun kamo saro nang nagdusay, bautisadong Saksi ni Jehova, itinao na nindo nin bilog na kalag an saindong sadiri ki Jehova. (Heb. 10:7) An enot na oportunidad nindo, pagmaigotan na mag-auxiliary payunir sa laog nin sarong bulan o labi pa. Ini magpapanamit sa saindo kan mga kagayagayahan asin paninimbagan na kaiba sa pagregular payunir, asin daing duwa-duwa na magigin mas malinaw an saindong punto de vista sa kun ano an maninigo nindong gibohon sa saindong buhay. Dangan, imbes na panoon nin bilog na panahon na sekular na trabaho an pagkabakante pakatapos nin pag-eskuela, taano ta dai ponan na magregular payunir? An nagkapira na naghalat pa nin haloy na panahon tangani na maglingkod bilang payunir nagbasol na dai tolos sinda nagpoon.
12 Bilang hoben, aprobetsaran an saimong mga oportunidad na magdanay na daing agom, asin kamtan an mga pakinabang na itinatao kaiyan sa bilog na panahon na paghuhulit. Kun mawot mong mag-agom pag-abot nin panahon, mayo nang mas marahay na ikalalaag na pundasyon para sa pag-agom kisa sa paglilingkod nguna bilang regular payunir. Mantang ika nagtatalubo sa pagkamaygurang asin espirituwalidad, tibaad gustohon mong magin karera mo an pagpapayunir kaiba nin agom na may parehong kaisipan. An nagkapirang mag-agom na magkaibang nagpayunir nakapaglingkod sa sirkito o sa langtad nin pagmimisyonero. Tunay na nakakokontentong pamumuhay!
13 Gurano man kamo kahaloy nang nagpapadagos sa pagpapayunir, nakompleto na nindo an saindong edukasyon asin nag-ako kamo nin daing kaagid sa halagang pagsasanay na dai ikatatao nin ibang okupasyon sa daga. An pagpapayunir nagtotokdo nin disiplina, personal na pag-organisar, kun paano makikiiba sa mga tawo, pagdepende ki Jehova, asin kun paano makapatatalubo nin pagpasensia asin kabootan—mga kualidad na nagsasangkap sa saindo na mag-ako nin mas dakula pang mga paninimbagan.
14 An buhay dai pa noarin man na nagin orog na daing kasiertohan para sa katawohan. Pipira sana an bagay na tunay na permanente, apuera sa ipinanuga ni Jehova. Mantang an saindong ngapit bukas na marhay sa atubangan nindo, may mas marahay pa daw na panahon kisa ngonyan na maghorophorop nin odok kun ano an gigibohon nindo sa saindong buhay sa maabot na mga taon? Turotimbangon nin maingat an pribilehiong pagpapayunir. Dai kamo noarin man mabasol sa pagpili sa paglilingkod bilang payunir bilang saindong karera.
HAPOT 4: “Bako daw na pirmeng masakit aboton an kahagadan na oras? Kumusta kun magkulang an oras ko?”
15 Sa pagllenar nindo sa aplikasyon para sa regular payunir, dapat nindong simbagon an hapot na: “Inorganisar na daw nindo an saindong personal na mga aktibidad tangani na rasonableng malaoman nindo na maabot an taonan na kahagadan na 1,000 oras?” Tangani na maabot iyan, kaipuhan nindong magpromedyo nin mga tolong oras kada aldaw sa paglilingkod. Siempre pa, ini nagkakaipo nin marahay na pag-iskedyul asin disiplina sa sadiri. An kadaklan na payunir naggigibo nin praktikal, epektibong kaugalean sa laog nin pirang bulan.
16 Minsan siring, sadiosan na nagsasabi an Eclesiastes 9:11, ‘An panahon asin pagkanorongod nangyayari sa sato gabos.’ An seryosong helang o iba pang mga pagkanorongod puedeng magin dahelan na dai maabot kan payunir an oras. Kun an problema bako man na halawig asin nangyari sa pagpopoon kan taon nin paglilingkod, tibaad kaipuhan sanang dugangan an iskedyul tangani na mabawi an nawarang oras. Alagad kumusta kun lumataw an sarong magabat na problema na pira na sanang bulan an natatada sa taon nin paglilingkod asin dai na makakabawi an payunir?
17 Kun kamo temporaryong nagkahelang sa laog nin pirang bulan o huli sa sarong apuradong dahelan na dai nindo kontrolado dai nindo kayang aboton an kahagadan na oras, puede nindong dolokon an sarong miembro kan Komite sa Paglilingkod kan Kongregasyon asin ipaliwanag an problema. Kun iniisip kan kamagurangan na ini na marahay na togotan kamong magpadagos sa paglilingkod bilang payunir na dai na pinoproblema an paghipno sa nawarang oras, puede nindang gibohon an desisyon na iyan. Mamarkahan kan sekretaryo an Congregation’s Publisher Record card na nagpapaheling na dai kamo hinahagadan na hipnoan an nawarang oras. Ini bakong bakasyon kundi, imbes, espesyal na konsiderasyon sa saindong mga kamugtakan.—Helingon an Setyembre 1986 na suplemento kan An Satong Ministeryo sa Kahadean, parapo 18.
18 An eksperyensiadong mga payunir nagtitipon nin reserbang oras sa pagpopoon pa sana kan taon nin paglilingkod. Ipinaoorog ninda an saindang paglilingkod bilang payunir, kaya kun beses nanonompongan nindang kaipuhan na inaan an bakong mahalagang mga aktibidad. Kun dai maabot kan payunir an oras huli sa maluyang iskedyul o kawaran nin disiplina sa sadiri sa estriktong pagsunod dian, maninigo niang mamatean na paninimbagan niang hipnoan an nawarang oras asin dai maglaom nin espesyal na konsiderasyon.
19 Kun beses nakaeeksperyensia an sarong payunir nin dai malilikayan na pagbabago sa saiyang mga kamugtakan. Tibaad manompongan nia na dai nia kayang maabot an kahagadan na oras sa laog nin halawig na panahon huli sa nagpapadagos na problema sa salud, nadugangan na paninimbagan sa pamilya, asin iba pa. Sa situwasyon na ini, an madonong na gibohon iyo na bumalik sa pagigin parahayag asin makikabtang kun posible sa paglilingkod bilang auxiliary payunir. Mayo nin regular na probisyon na togotan an saro na magdanay sa lista nin mga payunir kun an mga kamugtakan nia dai na nagtotogot sa saiya na maabot an kahagadan na oras.
20 Linalaoman mi na an probisyon na pagtao nin espesyal na konsiderasyon sa mga kualipikado maenkaminar sa dakol pa na magpalista sa paglilingkod bilang payunir na dai naghahadit nin labi-labi. Maninigo man iyan na makaenkaminar sa mga nasa bilog na panahon na paglilingkod na padagos na magpayunir. Gusto ming magin mapanggana an mga payunir sa saindang bilog na panahon na paglilingkod.
HAPOT 5: “Gusto kong may magibo asin magin maogma sa paggibo kaiyan. Mapapanigoan daw ako kan paglilingkod bilang payunir?”
21 An tunay na kaogmahan sa kadaklan depende sa pagkaigwa nin dayupot, personal na relasyon ki Jehova asin sa kombiksion na kita fiel na naglilingkod sa saiya. Tinios ni Jesus an hariging pasakitan “huli kan kagayagayahan na ibinugtak sa atubangan nia.” (Heb. 12:2) An saiyang kaogmahan gikan sa paggibo kan kabotan nin Dios. (Sal. 40:8) Sa presenteng palakaw nin mga bagay, makakamtan niato an tunay na kaogmahan kun an kadaklan sa mga aktibidad kan satong buhay konektado sa satong pagsamba ki Jehova. An espirituwal na mga pinag-aaabot nagtatao sa sato nin katuyohan huli ta sa satong puso aram niato na ginigibo ta an tama. An kaogmahan minagikan sa pagtao, asin aram niato na mayo nang mas marahay na paagi na itao niato an panahon asin kosog para sa iba kisa sa pagtokdo sa iba kun paano magkakamit nin buhay na daing katapusan sa bagong kinaban nin Dios.—Gibo 20:35.
22 An payunir na kinotar sa enot na parapo arog kaini an pagkapaliwanag: “May maorog pa daw na kagayagayahan kisa sa pakaheling sa saro na saindong inaadalan na magin aktibong paraomaw ki Jehova? Nakaoogma asin nakapakokosog sa pagtubod na maheling kun gurano kapuersa kan Tataramon nin Dios sa pagmotibar sa mga tawo na gumibo nin mga pagbabago sa saindang buhay tanganing paogmahon si Jehova.” (Helingon an Oktubre 15, 1997 Torrengbantayan, pahina 18-23.) Kaya, ano an nagtatao sa saindo nin kaogmahan? Kun an pinahahalagahan nindo an permanente, kapakipakinabang na mga paghihingoa, imbes na an temporaryong kaogmahan na itinatao kan kinaban, an pagpapayunir magtatao sa saindo nin makangangalas na pakamate nin pagigin may naginibo na tunay na magpapaogma sa saindo.
HAPOT 6: “Kun iyan bakong kahagadan para sa buhay na daing katapusan, bako daw na nasa sako na kun baga ako mapayunir o dai?”
23 Totoo, an desisyon na magpayunir dapat na saindo. Solamente si Jehova an makapaghuhusgar kan personal nindong mga kamugtakan sa buhay. (Roma 14:4) Tama sanang laoman nia na kamo maglingkod sa saiya nin bilog nindong puso, kalag, isip, asin kosog. (Mar. 12:30; Gal. 6:4, 5) Namomotan nia an maogmang paratao, saro na naglilingkod sa saiya nin magayagaya, bakong sa maraot na boot o sa kapiritan. (2 Cor. 9:7; Col. 3:23) An saindong dahelan sa paglilingkod nin bilog na panahon dapat na namomotan nindo si Jehova asin an mga tawo sa teritoryo. (Mat. 9:36-38; Mar. 12:30, 31) Kun ini an saindong saboot, kun siring an paglilingkod bilang payunir angay na odok nindong horophoropon.
24 Linalaoman mi na an sinabi digdi makatatabang sa saindo na turotimbangon an saindong mga posibilidad na makapagpayunir. Puede daw nindong liwaton an saindong mga kamugtakan tangani na makapagregular payunir? Nasa ibaba an sarong kalendaryo na may titulong “An Sakong Semanal na Iskedyul sa Paglilingkod Bilang Payunir.” Helingon kun matatawan nindo nin praktikal na iskedyul an saindong sadiri na matogot sa saindo na magpromedyo nin mga 23 na oras kada semana sa ministeryo. Dangan, ibugtak an saindong lubos na pagtubod asin pagtitiwala ki Jehova. Paagi sa saiyang tabang puede kamong magin mapanggana! Sia nanuga: ‘Iuula ko sa saindo an bendisyon sagkod na mayo na nin kulang.’—Mal. 3:10.
25 Kaya ihinahapot niamo, “Paglilingkod bilang payunir—iyan daw para sa saimo?” Kun makasisimbag ka nin “Iyo,” magtalaan nin petsa na pumoon tolos-tolos na magregular payunir asin laoman nindo na bebendisyonan kamo ni Jehova nin magayagayang buhay!
[Tsart sa pahina 6]
An Sakong Semanal na Iskedyul sa Paglilingkod Bilang Payunir
LUNES Aga paglilingkod sa langtad
MARTES Aga paglilingkod sa langtad
MIERKOLES Aga paglilingkod sa langtad
HUEBES Aga paglilingkod sa langtad
BIERNES Aga paglilingkod sa langtad
SABADO Aga paglilingkod sa langtad
DOMINGO Aga paglilingkod sa langtad
LUNES Hapon paglilingkod sa langtad
MARTES Hapon paglilingkod sa langtad
MIERKOLES Hapon paglilingkod sa langtad
HUEBES Hapon paglilingkod sa langtad
BIERNES Hapon paglilingkod sa langtad
SABADO Hapon paglilingkod sa langtad
DOMINGO Hapon paglilingkod sa langtad
LUNES Banggi paglilingkod sa langtad
MARTES Banggi paglilingkod sa langtad
MIERKOLES Banggi paglilingkod sa langtad
HUEBES Banggi paglilingkod sa langtad
BIERNES Banggi paglilingkod sa langtad
SABADO Banggi paglilingkod sa langtad
DOMINGO Banggi paglilingkod sa langtad
Gumamit nin lapis sa pagrekord kan saindong iskedyul sa kada aldaw kan semana.
Mag-iskedyul nin total na mga 23 na oras kada semana sa paglilingkod sa langtad.
Total nin nakaiskedyul na semanal na oras ․․․․․․․․․․․․․․․․․․․․