An mga Payunir Nagtatao Asin Nag-aako nin mga Bendisyon
“AN PAGPAPAYUNIR mahalagang gayo kisa sa mapangganang sekular na karera. Mayo na nin mas nakakokontento kisa sa pagtabang sa mga tawo na mamidbid si Jehova asin an saiyang katotoohan.” Siring an sinabi kan sarong Kristiana na pinili an pagpapayunir—pambilog na panahon na paghuhulit kan Kahadean—bilang saiyang karera. Pira pang ibang karera an makatatao nin siring na kaogmahan?
An pagpapayunir kapwa kagalanggalang na pasohan asin mahalagang pribilehiyo. Paano pipilion nin sarong indibiduwal an siring na buhay? Ano an kinakaipuhan tanganing magdanay nin halawig sa pagpapayunir tanganing mag-ani kan mga bendisyon na iinaalok kaiyan?
Duwang bagay an kaipuhan. Enot, an tamang mga kamugtakan. Kadakol kan nabubuhay sa mga kamugtakan na malinaw na ginigibong imposible an pagpapayunir. Asin ikaduwa, an tamang espirituwal na mga kuwalipikasyon asin kaisipan. Siyempre, baga man an presenteng mga kamugtakan nagtotogot sa saro na magpayunir o dai, an gabos puwedeng maghingoa na pataluboon an maygurang na Kristianong mga kuwalidad.
Kun Taano ta Nagpapayunir an Iba
Ano an mga kuwalipikasyon para sa mapangganang pagpapayunir? Bueno, kaipuhan an mga abilidad sa paghuhulit. Kinakaipuhan na an mga payunir tatao kun paano iaatubang an maogmang bareta sa mga estranyo, gumibo nin mga pagdalaw liwat sa mga interesado, asin magkondukta nin mga pag-adal sa Biblia sa harong. An kakulangan sa mga abilidad na ini puwedeng makapaluya sa boot nin payunir. Minsan siring, an ibang bagay mahalaga man.
Halimbawa, an gabos na may labot sa satong pagsamba konektado sa satong relasyon ki Jehova asin sa saiyang organisasyon. Kabale digdi an pagpapayunir. An sarong hoben na payunir na an ngaran Rado nagpaliwanag: “Para sa sarong hoben, mayo na nin mas marahay pa kisa sa paggirumdom ki Jehova asin paglakaw sa dalan nin katotoohan.” Iyo, an pagpapayunir marahay na paagi para sa mga hobenes na ipaheling an saindang pagkamoot ki Jehova asin pagkadayupot sa saiya.—Eclesiastes 12:1.
An kaaraman asin pakasabot kaipuhan man. (Filipos 1:9-11) An mga ini garo an gasolina na padagos na nagpapadalagan sa satong espirituwal na makina. An regular na personal na pag-adal kaipuhan sa paglikay na mapagal sa espirituwal, na nawawaran kan satong entusiasmo asin kombiksion. Siyempre, an kaaraman na inaako niato maninigong makaapektar bako sanang sa intelihensia kundi siring man sa puso. (Talinhaga 2:2) Kun siring, dugang pa sa personal na pag-adal, kaipuhan ta an panahon sa pamibi asin paghorophorop tanganing an kaaraman na nakakamtan niato makaabot sa puso. Dangan, kun itinotogot kan satong mga kamugtakan, bobooton niatong magpayunir.—Ikomparar an Esdras 7:10.
An paglaog sa paglilingkod bilang payunir naghahagad man nin espiritu nin pagsasakripisyo sa sadiri. An sarong solterong an ngaran Ron haman na an gabos niang plano para sa pagpapayunir. Naghahalat na sana sia kan tamang mga kamugtakan tanganing madagos sia. Sa espisipikong pagtaram, gusto nia nin trabaho na matogot saiya na magpayunir asin kadungan kaiyan magkamit nin pirang luho sa buhay. Kan sambiton nia ini sa sarong maygurang na tugang na babae, nakubhanan sia sa simbag kaini. An sabi kan tugang na babae: “Binibendisyonan ni Jehova an mga gibo, bakong an mga panuga.” An soltero nakakua nin trabaho na mas hababa an suweldo na nagtao nin panahon sa pagpapayunir. An pag-aplikar kan Mateo 6:25-34 makatatabang sa saro na manigoan sa sadit na entrada.
An mapakumbabang pagmawot na sumunod sa mararahay na suhestion tibaad makakontribuwir sa satong paglaog sa paglilingkod bilang payunir. Amay pa sa saiyang buhay bilang Kristiano, kinultibar ni Hanna an pagmawot na magpayunir. Alagad dai sia nagpayunir mantang nagpapamilya, asin kan huri naglaog sia sa karerang pagnegosyo. Sa pagdangog sa marahay na sadol kan alistong mga magurang, binayaan nia an saiyang interesanteng sekular na karera asin luminaog sa paglilingkod bilang payunir. Naeeksperyensiahan na ngonyan ni Hanna an dakulang kagayagayahan sa pagdara sa iba pasiring sa pagdusay asin pagtabang sa mga inaktibo.
An pagpasalamat sa ginibo kan katotoohan sa buhay nin saro puwede man na magin pampakosog sa pagpayunir. Horophoropa an kamugtakan nin sarong babae na grabe an depresyon na nalalaglag na an pag-agom. Dramatikong naliwat an situwasyon na ini kan nanodan nia an katotoohan kan Tataramon nin Dios asin iinaplikar iyan. Naogma sa ginibo kan katotoohan sa saiya, nagdesisyon sia na an pinakamarahay na paagi para saiya na ipaheling an pagpapahalaga iyo na magpayunir asin tumabang sa iba. Ini ginibo nia, asin ngonyan naeeksperyensiahan na nia an mga bendisyon kan dakol na pag-adal sa Biblia asin sarong maogmang buhay pampamilya.
Makatatabang an Iba
An mga payunir parateng nagbubunga nin ibang payunir. Si Rado, na sinambit kasubago, sais anyos kan mag-adal sa Biblia an saiyang mga magurang kaiba nin duwang payunir. Kan aki pa, regular siang nag-iba sa ministeryo sa langtad sa pambilog na panahon na mga parahulit na ini. Si Rado mismo nagin regular payunir sa edad na 17. An saro pang solterito, si Arno, pinadakula sa Kristianong harong pero nanluya sa espirituwal. Kan huri, pinonan niang ibalik an saiyang espirituwal na kosog, asin sabi nia ngonyan: “Nag-ako ako nin kadakol na pagpapakosog gikan sa mga payunir. Nakiaasosyar ako sa sainda nangorogna durante kan mga bakasyon sa eskuwelahan asin kun beses nagrereport nin sagkod sa 60 oras kada bulan sa paglilingkod sa langtad. Pakatapos kaiyan, an tangga pasiring sa paglilingkod bilang regular payunir [na naghahagad nin 90 oras bulan-bulan] bako nang gayong halakwat.” An paghorophorop sa sadol sa 1 Corinto 7:29-31 na dai lubos na gamiton an kinaban talagang nakatabang sa siring na mga hobenes.
An espiritu nin pagpapayunir mas madaling makagamot sa harong kun saen inienot an espirituwal na intereses asin pinakokosog kan mga magurang an saindang mga aki na lumaog sa pambilog na panahon na ministeryo. Si Philo, na duminakula sa siring na harong, nagkomento: “Dakol an nagsadol sako na ipadagos an sakuyang edukasyon, na magmaigot para sa sekular na ngapit. Alagad tinabangan ako kan sakong mga magurang na gumibo nin mas madonong na pagpili. Sinabihan ninda ako na kun gusto ko talagang makatogdok para sa ngapit, an sakong enot na pahahalagahan maninigong an pagpatalubo nin relasyon ki Jehova.”
An sarong daragang an ngaran Thamar iinaatribuwir man an saiyang paglilingkod bilang payunir sa halimbawa asin mga paghihingoa kan saiyang mga magurang. Sabi nia: “Dai ko talaga masasabi kun kasuarin ako nakapatalubo nin espirituwal na punto-de-vista sa buhay, pero aram ko na dai ako namundag na igwa nin siring. An ugale kan sakong mga magurang na regular na pakikikabtang sa paglilingkod sa langtad asin pag-atender sa mga pagtiripon, siring man an saindang hararom na pagkamoot sa katotoohan, nakatabang sako nin dakula na pataluboon an sakong espirituwal na pagmansay.”
Pagdadanay sa Saindong Desisyon
Pakalaog nin saro sa paglilingkod bilang payunir, an pagdadanay dian nagpapangyari saiya na anihon an lubos na pakinabang sa madonong na desisyon na iyan. Sa katuyohan na iyan ikatatao an dakol na praktikal na hatol. Halimbawa, an mga payunir marahay na makanood kun paano mag-iiskedyul kan saindang panahon sa paggibo kaiyan na mabunga sagkod na mapupuwede. Minsan siring, an pinakaimportanteng bagay iyo man giraray an relasyon nin indibiduwal ki Jehova asin sa Saiyang organisasyon.
Konektado digdi an mapagngayongayong kaisipan. “Kan nanompongan ko an katotoohan, gusto kong marhay na magpayunir,” an sabi ni Cor. Pero hinagad kan saiyang ama na tapuson nguna nia an kurso sa Unibersidad nin Agrikultura. Pakatapos kaiyan, pinonan ni Cor na magpayunir. Pag-abot nin panahon nag-agom sia, asin uminiba saiya an saiyang agom sa pagpapayunir. Kan magbados ini, napaatubang sia sa posibilidad na bayaan an pagpapayunir. “Parate akong namimibi ki Jehova asin ipinahahayag sa saiya an pagmawot kan sakong puso na magpadagos sa pagpapayunir,” an sabi ni Cor. Sa katapustapusi nakakua si Cor nin klase nin trabaho na nagpangyari saiya na magpayunir mantang nagpapamilya.
An pagigin naninigoan sa materyal na mga pangangaipo saro pang bagay na parateng nakatatabang sa saro na magdanay sa ministeryong pagpapayunir. Nagsurat si apostol Pablo: “An saindo logod na pamumuhay ligtas sa pagkamoot sa pirak, mantang kamo naninigoan na sa mga bagay na yaon. Huli ta sia nagsabi: ‘Sa ano man na paagi dai taka babayaan ni sa ano man na paagi pababayaan taka.’” (Hebreo 13:5) An pagigin naninigoan na sa mga bagay na yaon nakatabang ki Harry asin Irene na magpadagos sa pagpapayunir. Si Irene, na buta, payunir sa laog nin walong taon na. “Nungka ming minansay na problema an samong pinansial na situwasyon,” an sabi nia. “Nag-ingat sana kami na nungkang kumua nin dai kinakaipuhan na mga pagabat sa pinansial. Permi ming kinukuwenta an gastos. An samong buhay nagin perming simple, pero magayonon, asin mayaman iyan sa mga bendisyon.”
Dakol na Kagayagayahan Asin Bendisyon
Sa pagsalingoy sa labing siyam na taon na pagpapayunir, nagsabi si Thamar: “Nagigin dayupot kang marhay ki Jehova, na garo baga aktuwal niang kinapotan an saimong kamot.” (Salmo 73:23) May mga pagbalong minasabong man sa isip. “An sakong mga pagkabakong sangkap kaiba na an mga pagkabakong sangkap nin iba regular na nakariribok sa sako,” an dugang ni Thamar. “Saro pa, pinagheheling ko an mga tugang na lalaki asin babae na pinili an mas mayaman sa materyal na paagi nin pamumuhay, asin an saindang pinili garo baga nakaaakit kun naglalakaw ako sa luwas na nag-ooran asin malipot. Alagad sa kairairaromi kan sakong puso, nungka kong mamawoton na makibalyo nin kamugtakan. Ano pa apuwera sa pagpapayunir an makatatao nin siring na kagayagayahan, nin siring na espirituwal na pagkakontento, asin nin siring na mga bendisyon?” Pahahalagahan man daw nindong marhay an kaagid na mga kagayagayahan asin bendisyon?
Huling naggagamit nin dakol na panahon an mga payunir sa Kristianong ministeryo, nasa kamugtakan sindang tabangan an pirang indibiduwal na magkamit nin kaaraman sa katotoohan sa Biblia. Si Harry asin Irene, na sinambit sa enotan, nagsasabi: “Kadakol kan pribilehiyo na makakamit sa organisasyon ni Jehova, alagad an pagtabang sa sarong interesadong bagohan na umoswag sagkod sa punto na magin sarong lingkod ni Jehova iyo an pinakadakula sa gabos.”
An saro pang payunir marahay an pagkapahayag sa mga bagay kan sia magsabi: “An mga tataramon sa Talinhaga 10:22 napatunayan na totoo sa sakong kamugtakan: ‘An bendisyon ni Jehova—iyan an nakapayayaman, asin dai nia iyan dinadagdagan nin kakologan.’ Paorootro, an tekstong ini naotob sa sako durante kan mga taon na naglingkod ako ki Jehova.”
Mga magurang, itinatanom daw nindo sa saindong mga aki an pagmawot na magpayunir? Mga payunir, pinagmamaigotan daw nindong palaadon an pagmawot na ini sa iba? Mga magurang, sinusuportaran daw nindo an mga payunir sa saindong kongregasyon asin nagtatabang na magkaigwa nin espiritu nin pagpapayunir an iba? Dumakol pa logod sa banwaan ni Jehova an mapahiro na pag-aaboton an siring na mayaman na mga bendisyon mantang sinda naglilingkod bilang payunir.