“Magigin Kang Marahay na Payunir!”
1. Ano an saboot nin sarong tugang na babae manongod sa saiyang pagpapayunir?
1 “Mayo nang iba pang gibohon na nakatao sa sako nin siring kadakulang pagkakontento o na nagin kapakipakinabang nanggad sa espirituwal.” Iyan an sinabi ni Kathe B. Palm. Dakol na dekada siang naglingkod bilang mapagsakripisyong payunir, na nagpapatotoo poon sa sarong poro kan Chile, Amerika del Sur, sagkod sa ibong na poro kaiyan. Huling iniisip-isip an nakakakontentong buhay kan mga nasa bilog na panahon na paglilingkod, tibaad may nagsabi na sa saindo: “Magigin kang marahay na payunir!”
2. Ipaliwanag kun taano ta an hararom na pagkakontento nakakamtan paagi sa espirituwal na mga aktibidad.
2 Sarong Nakakakontentong Paagi nin Pamumuhay: An satong Arogan, si Jesus, tunay na narepreskohan sa paggibo kan kabotan kan saiyang Ama. (Juan 4:34) Sa dahelan na iyan, may sinseridad na tinokdoan ni Jesus an saiyang mga parasunod na an tunay na pagkakontento resulta nin pakikikabtang sa mga aktibidad na may koneksion sa pagsamba ki Jehova. Kontento an buhay niato kun dakol kitang gibo na inooyonan ni Jehova. Dugang pa, mantang naggagamit kita nin mas dakol na panahon, kosog, asin rekurso tanganing tabangan an iba, kita nagigin orog na maogma.—Gibo 20:31, 35.
3. Anong kagayagayahan an puede niatong maeksperyensiahan sa paggamit nin mas dakol na panahon sa ministeryo?
3 Kun mas dakol na panahon an ginagamit niato sa ministeryo, mas dakol man kitang oportunidad na maeksperyensiahan an kagayagayahan na makapoon asin makapagkondukta nin mga pag-adal sa Biblia. Dawa kun an dakol na kagharong garo baga indiperente, tibaad madiskobre niato na an satong teritoryo mas mabunga kisa sa enot niatong hinohona mantang kita nagkakaigwa nin eksperyensia asin orog na abilidad sa ministeryo. Magagamit nin mga payunir an abundang edukasyon hale sa Paadalan sa Paglilingkod Bilang Payunir, na puede nindang atenderan pakalihis nin mga sangtaon na pagpapayunir. (2 Tim. 2:15) Mantang kita nagmamaigot, posibleng marhay na kita nagtatanom nin mga banhi nin katotoohan na mabunga pag-abot nin panahon.—Ecl. 11:6.
4. Ano an maninigong pag-isipan nin mga hoben na madali nang maggradwar?
4 Mga Hoben: Mantang tinatapos nindo an saindong pag-eskuela sa haiskul, maingat daw nindong pinag-iisipan an saindong futuro? Sagkod ngonyan, an mga leksion nindo sa eskuelahan an pangenot na nagdedeterminar kan saindong iskedyul. Pagkagradwar, paano nindo gagamiton an panahon na dating ginagamit nindo sa pag-eskuela? Imbes na magmaigot sa sekular na karera, taano ta dai pag-isipan na may pagngayongayo an pasohan na magin regular payunir? An mga abilidad na manonodan nindo—pagpatotoo sa mga tawo na manlaenlaen an pinaghalean, pakapanggana sa personal na mga olang, pagpatalubo nin disiplina sa sadiri, asin pagpaoswag kan abilidad sa pagtotokdo—mapapakinabangan nindo sa bilog nindong buhay.
5. Paano puedeng suportaran kan mga magurang asin kan kongregasyon an pagpapayunir?
5 Mga magurang, ginigibo daw nindo an saindong kabtang sa paggiya sa mga aki nindo na lumaog sa bilog na panahon na paglilingkod? An saindong mga tataramon asin positibong halimbawa makakatabang nin dakula sa sainda na enoton an intereses kan Kahadean. (Mat. 6:33) Si Ray, na nagpoon na magpayunir kan sia patapos na nin haiskul, nagsabi: “Pirmeng naniniwala an sakong ina na an pagpapayunir nagbubunga nin pinakanakakakontentong pamumuhay.” Puedeng suportaran kan gabos sa kongregasyon an pagpapayunir paagi sa saindang mga tataramon asin tabang. Si Jose na taga España, nagsabi: “Minansay kan samong kongregasyon an pagpapayunir bilang an pinakamarahay na karera para sa mga hoben. Nagin mas madali para sa sako an magpoon sa pagpayunir huli sa saindang mga sinabi asin apresasyon sa pagpapayunir kaiba kan saindang praktikal na tabang.”
6. Ano an puede niatong gibohon kun mayo kitang pagmawot na magpayunir sa presente?
6 Pakapanggana sa mga Olang: Alagad paano kun sabihon nindo, ‘Mayo ako kan pagmawot na magpayunir.’ Kun iyan an pagmate nindo sa primero, ipamibi iyan ki Jehova asin sabihon sa saiya, ‘Dai ko po aram kun para sa sako an pagpapayunir, alagad boot ko pong gibohon kun ano an nakakapaogma sa saimo.’ (Sal. 62:8; Tal. 23:26) Dangan mag-asa sa paggiya nia paagi sa saiyang Tataramon asin organisasyon. Dakol na regular payunir an ‘nagnamit’ nguna kan pagpapayunir bilang mga auxiliary payunir, asin an kagayagayahan na naeksperyensiahan ninda nagpahiro sa sainda na aboton an karera sa bilog na panahon na paglilingkod.—Sal. 34:8.
7. Paano niato puedeng mapangganahan an mga pagduwaduwa kun baga kaya niatong aboton an kahagadan na 70 oras kada bulan?
7 Kumusta kun dai nindo segurado na maaabot nindo an kahagadan na 70 oras kada bulan? Taano ta dai makipag-olay sa mga payunir na kapareho nindo an kamugtakan? (Tal. 15:22) Dangan isurat an nagkapirang posibleng iskedyul nindo. Tibaad manompongan nindo na an pagbakal nin panahon para sa ministeryo hale sa dai kaipuhan na mga aktibidad mas madali kisa sa pinaghona nindo kan enot.—Efe. 5:15, 16.
8. Taano ta maninigo niatong pag-adalan giraray an satong mga kamugtakan sa panapanahon?
8 Siyasaton Liwat an mga Kamugtakan: Parateng nagbabago an personal na mga kamugtakan. Marahay na pag-adalan giraray nindo an saindong situwasyon sa panapanahon. Halimbawa, madali na daw kamong magretiro sa sekular na trabaho? Si Randy, na nagretiro nin amay, nagsabi: “Huli sa desisyon na ini, nakapoon akong magregular payunir kaiba kan sakong agom, asin nagtao iyan sa samo nin oportunidad na bumalyo asin maglingkod sa lugar na mas dakula an pangangaipo. Nag-ako ako nin dai mabilang na mga bendisyon huli sa desisyon ko, alagad an pinakadakulang bendisyon sa gabos iyo an malinig na konsensia.”
9. Ano an maninigong pag-isipan nin mga mag-agom?
9 Nadiskobre nin nagkapirang mag-agom pagkatapos nin maingat na pagsiyasat na dai man ninda kaipuhan na parehong magtrabaho nin bilog na panahon. Totoo, tibaad kaipuhan na pasimplehon kan pamilya an saindang pamumuhay, alagad bawi man an sakripisyo. Si John, na an agom huminale sa bilog na panahon na trabaho tanganing pahiwason an saiyang ministeryo, nagsaysay: “Mayo na nin mas marahay na pagmate kisa sa pakaaram na an sakong agom sibot sa espirituwal na mga bagay sa bilog na aldaw.”
10. Ano an nagmomotibar sa mga Kristiano na pag-isipan an pagpapayunir?
10 Sarong Prueba nin Pagkamoot Asin Pagtubod: An paghuhulit an ginibo ni Jehova na pinakamahalagang gibohon nin siisay man sa sato. An daan na sistemang ini madali nang laglagon, asin an mga nag-aapod sana sa ngaran ni Jehova an maliligtas. (Roma 10:13) An pusong pano nin pagkamoot sa saiya asin pagpasalamat sa gabos na ginibo nia para sa sato mamotibar sa sato na kuyogon an sugo kan saiyang Aki na maigot na maghulit. (Mat. 28:19, 20; 1 Juan 5:3) Dugang pa, an satong pagtubod na kita talagang nabubuhay na sa huring mga aldaw mapahiro sa sato na gibohon an bilog niatong makakaya sa ministeryo mantang may panahon pa, imbes na lubos na gamiton an kinaban.—1 Cor. 7:29-31.
11. Kun may magsabi sa sato na kita magigin marahay na payunir, paano niato maninigong mansayon iyan?
11 An pagpapayunir bako sanang reaksion sa sarong areglo kan organisasyon; iyan kapahayagan kan satong debosyon sa Dios. Kaya kun may magsabi sa saindo na kamo magigin marahay na payunir, mansayon iyan bilang komendasyon. Asin mapagngayongayong pag-isipan na magin kabilang sa mga naggigibo kan nakakakontentong paglilingkod na ini.
[Blurb sa pahina 4]
Mga Magurang, ginigibo daw nindo an saindong kabtang sa paggiya sa mga aki nindo na lumaog sa bilog na panahon na paglilingkod?
[Blurb sa pahina 5]
An paghuhulit an ginibo ni Jehova na pinakamahalagang gibohon nin siisay man sa sato.