Boot daw Nindong Makagibo nin Pag-adal sa Biblia?
1 Isinugo ni Jesus an mga Kristiano na gumibo nin labi sa paghuhulit sana. Sinadol nia sinda na gumibo nin mga disipulo. 2,726,252 na pag-adal sa Biblia gabos an ginibo bulan-bulan kan nakaaging taon. Nagkaigwa daw kamo nin kabtang sa maogmang gibohon na ini?
2 Sa laog kan Agosto asin Setyembre iinalok niato an mga pulyetong Government asin Divine Name. Puwede daw na makapoon nin pag-adal sa Biblia digdi? Iyo, minsan mayo nin inimprentang mga hapot sa ibaba kan mga pahina. An mga pulyetong ini simple asin pano nin impormasyon. Mantang iyan sadit sana, an kagharong dai nakamamate na sia minagibo nin komplikadong bagay sa pakikipag-olay dian. Sa satong masibot na mga panahon, inaapresyar nin mga tawo an bagay na halipot pero malaog asin diretso sa punto.
3 An The Government That Will Bring Paradise talagang nagpapaliwanag kan mayor na tema kan Biblia—an Kahadean. Iyan nasa kronolohikong pagkasunodsunod, kaya garo baga pinakamarahay na pumoon sa kapinonan asin basahon sanang magkaibanan an haralipot na parapo, na nagkokomento dian sono sa pangangaipo. Kun may nasambitan na teksto, basahon iyan asin iaplikar. Kun mabasa na nindong magkaibanan an bilog na pulyeto, an kagharong magkakaigwa nin pankagabsan na pagmansay sa tema kan Kahadean, na maandam saiya na magpadagos na mag-adal sa saro pang publikasyon. An siring na pagrepaso matabang man saiya na magkaideya sa pagkasunodsunod nin mga pangyayari sa Biblia.
4 An The Divine Name That Endures Forever puwede man na pag-olayan parapo por parapo. Kun bakong gabos na kabtang sa pulyeto aplikado sa kagharong, puwede nindong pilion an kabtang kun saen sia interesado asin pag-olayan ini. An huring kabtang sa pahina 31 minagiya sa pag-alok nin mas detalyadong pag-adal sa Biblia sa saro pang libro.
5 An hoben na mga parahayag na noarin man dai pa nakagibo nin pag-adal, an bagong mga parahayag na an pagmate dai pa ninda kaya huli sa kakulangan nin kabatidan, minsan an mga mas eksperyensiado na ngonyan mayo nin inaadalan tibaad madiskobre na an pagpopoon nin pag-adal sa saro sa mga pulyetong ini mas pasil kisa pagpoon nin pag-adal sa sarong libro.
6 Gumibo nin paghihingoa na makapoon nin pag-adal sa enot na pagsongko. Gamiton an mga ilustrasyon sa pagtotokdo sa kagharong. Girumdomon na an pagtao nin simpleng mga pag-aatubang makatatabang sato na makapoon nin mga pag-adal sa Biblia. Pagmaigotan na mapakapotan sa kagharong an pulyeto tanganing orog niang masundan an saindong orolay.
7 Kun kamo tunay na nagmamawot na makagibo nin pag-adal sa Biblia, gumibo nin odok na paghihingoa asin humagad nin tabang ki Jehova. Bantayan an mga oportunidad na makapoon nin mga pag-adal sa enot na pagsongko. Balikan an gabos na interesado. Bebendisyonan ni Jehova an saindong mga paghihingoa.