Mga Pasohan Para sa 1988 Taon nin Paglilingkod
1 Sa pagpopoon niato sa bagong taon nin paglilingkod, masasalingoy niato na may pagkakontento an mga bendisyon na itinao sa sato ni Jehova sa nakaaging doseng bulan. Tunay na masasabi niato ki Jehova an arog kan isinabi ni David: “Kinoronahan mo an taon kan saimong karahayan.” (Sal. 65:11) Naabot niato sa enot na pangyayari an 100,000 na parahayag asin 20,000 na auxiliary payunir kan Abril, na may nagreport na 101,735 parahayag asin 21,567 auxiliary payunir. Nagdakol man na gayo an satong mga inaadalan sa Biblia sa taon nin paglilingkod na idto.
2 Pero boot niatong tumanaw sa enotan, na ginigirumdom an mga tataramon ni Pablo sa Filipos 3:16: “Sagkod sa inabot na kan satong pag-oswag, magpadagos kitang maglakaw na husay sa iyo man sanang paagi.” Tanganing matabangan kita na magibo ini, marahay na magkaigwa nin nakararahay na teokratikong mga pasohan na nasa isip sa pagpopoon niato sa bagong taon nin paglilingkod.
NASYONAL NA MGA PASOHAN
3 Tunay na an saro sa satong mga pasohan regular na makareport nin labing 100,000 na parahayag kada bulan. Tanganing magibo ini, bobooton kan kada parahayag kan Kahadean na magin interesadong gayo sa regular na paglilingkod, siring man sa maimbod na pagrereport kan paglilingkod na iyan pagkatapos tolos kan kada bulan. Dai kita magpabaya sa satong paglilingkod kundi magin kitang regular asin mahigos sa gibohon kan Kagurangnan.—1 Cor. 15:58.
4 An saro pang marahay na pasohan na dai pa niato naaabot iyo an pagkaigwa nin sarong inaadalan sa Biblia para sa kada parahayag kan Kahadean digdi sa Pilipinas. Kan Abril kita nagreport nin 84,030 pag-adal sa Biblia, an kaharohalangkawe. Magtarabangan kita na maabot an pasohan na ini sa taon nin paglilingkod na ini.
5 An ikatolong pasohan dugangan an ikinawawaras niatong magasin. Ini nagluya sa nakaaagi pa sanang mga bulan. Kaya seguro marahay na tawan nin orog na atension an bagay na ini, na regular na nagtatagama nin oras para sa pagwaras nin magasin, serosemana kun mapupuwede.
PERSONAL NA MGA PASOHAN
6 Ano an nagkapirang personal na pasohan sa ministeryo sa langtad na puwede niatong pagmaigotan? Bueno, kun kita nagwawaras pa sana nin mga magasin asin dai pa nakagamit kan Topikong Mapag-oolayan, puwede daw niato ining pagmaigotan? Kun dai pa kamo nakadalaw liwat, puwede daw kamong pumoon sa taon na ini? May inaadalan na daw kamo sa Biblia? Kun mayo pa, ini marahayon na pasohan na pag-aaboton sa taon na ini. Kun ginigibo na nindo an gabos na ini, matatabangan daw nindo an saro pang parahayag na nagkakaipo nin tabang?
7 Kumusta man an satong espirituwal na pagtalubo? Kamo daw regular na nag-aatender sa gabos na pagtiripon, kaiba an pag-adal sa libro? Nagkokomento daw kamo sa mga pagtiripon? Nagpalista na daw kamo sa Teokratikong Paadalan sa Pagmiministro? Kun kamo tugang na lalaki, makapagboboluntaryo daw kamong tumabang sa saradit na trabaho sa Kingdom Hall, arog baga kan paglinig o pag-areglar sa mga tukawan? Nadudugangan daw an saindong kaaraman sa Biblia kaya mas madali nindong nasisimbag an mga hapot asin nakapagdedesisyon nin madonong? Nag-ooswag daw kamo sa pagsolog kan Kristianong personalidad?—Col. 3:10.
8 Mantang kita maigot na naghihingoang maabot an mga pasohan na ini, makasisierto kita na tatawan kita nin nagsosopay na bendisyon ni Jehova arog kan ginibo nia sa nakaaging taon nin paglilingkod.