Pagpopoon nin mga Pag-adal sa Biblia sa Harong
1 An saro sa pinakanakakakontentong mga eksperyensia para sa tunay na mga Kristiano iyo na tokdoan an saro kan katotoohan paagi sa pag-adal sa Biblia sa harong. Pero an nagkapira tibaad dai nagkakamit kan kaogmahan sa kabtang na ini kan ministeryo huli ta may pagmate sinda na dai ninda kayang pumoon asin magkondukta nin pag-adal sa Biblia. Kadakol na parahayag asin payunir an siring an namatean kaidto. Minsan siring, paagi sa pagtiwala ki Jehova asin paagi sa pag-aplikar kan mga suhestion sa An Satong Ministeryo sa Kahadean, nakanood sinda kun paano mapoon asin makondukta nin mga pag-adal sa Biblia. Puwede kamong magkaigwa nin kaparehong pasohan.
2 Paggamit kan Direktang Paagi Asin mga Tract: An saro sa pinakapasil na paagi na makapoon nin pag-adal iyo an direktang paagi. An kaipuhan sana nin ibang tawo iyo an maogmang imbitasyon na mag-adal sa Biblia. Puwede ining gibohon paagi sana sa paghapot sa kagharong: “Gusto daw nindo na magkaigwa nin personal na pag-adal sa Biblia sa harong asin dugangan an saindong kaaraman manongod sa Biblia asin sa katuyohan nin Dios para sa daga?” O puwede nindong sabihon sa kagharong na maoogma kamong idemonstrar an paagi sa pagkondukta nin pag-adal sa Biblia sa harong. Isip-isipa an saindong kagayagayahan sa pakanompong nin saro na inaako iyan!
3 An saro pang paagi na makapoon nin pag-adal sa Biblia iyo an paggamit kan saro sa satong mga tract. Paano puwedeng ponan an pag-adal sa tract? Paagi sana sa pagtao nin sarong tract sa kagharong na naniniwala kamong makaiinteres saiya. Dangan, imbitaran an kagharong na basahon an enot na parapo kaiba nindo. Basahon an sinitar na mga kasuratan, asin ipakipag-olay kun paano iyan minaaplikar sa materyal. Sa enot na pagdalaw, puwede nindong pag-olayan an saro o duwa sanang parapo. Mantang naaapresyar na kan kagharong an saiyang nanonodan, puwede nindong dugangan an panahon na ginagamit nindo sa saindong pag-orolay.
4 Paggamit Sana kan Biblia: Kun minsan an saro minaoyon na pag-olayan an Biblia alagad garo nagduduwaduwa na umako nin pormal na pag-adal o gumamit nin saro sa satong mga publikasyon. Makakapoon asin makakakondukta pa man giraray kamo nin pag-adal sa Biblia paagi sa pag-andam nin interesanteng Makakasuratan na mga pag-orolay basado sa mga kabtang kan librong Mabuhay Sagkod Lamang o kan librong Reasoning alagad an Biblia sana an ginagamit kun dinadalaw an interesadong tawo. An siring na mga pag-orolay puwedeng mga 15 o 20 minutos, o mas halawig, depende sa mga kamugtakan. Kun ginigibo nin regular asin igwa nin progresibong paagi sa pagtokdo kan mga katotoohan sa Biblia, nakapoon na kamo nin pag-adal sa Biblia, asin puwede iyan ireport na siring. Kun tama na sa panahon, iintrodusir an librong Mabuhay Sagkod Lamang, asin magkondukta nin pormal na pag-adal dian.
5 Bilang dugang sa paghanap nin mga oportunidad sa paglilingkod sa langtad, pinagmaigotan na daw nindong makapoon nin mga pag-adal sa Biblia sa mga kataed, kairiba, o mga miembro kan pamilya? Iyan daw haloy na? Prinobaran daw nindo giraray iyan dai pa sana nahaloy? Kun an sarong paagi bakong epektibo, inisip na daw nindong probaran an saro pa?
6 Puwede kamong magin mapanggana sa pagpopoon nin mga pag-adal kun iaaplikar nindo an mga suhestion na itinao, asin magtiwala ki Jehova para sa saiyang bendisyon. Madugangan logod nindo an saindong kagayagayahan paagi sa pagpoon asin pagkondukta nin mga pag-adal sa Biblia sa harong.