Ponan an mga Pag-adal sa Biblia—Ngonyan Na an Angay na Panahon
1 Kan 1987 an bilang nin ginibong mga pag-adal sa Biblia haros kapantay kan total na mga parahayag sa bilog na kinaban. Nakikikabtang daw kamo sa paggibong ini nin mga disipulo? Angay na panahon ngonyan na magkonsentrar sa pagpoon nin mga pag-adal.—Ikomparar an 2 Corinto 6:2.
2 An librong Our Ministry, pahina 89-91, nagdodoon sato kan pribilehiyo na tabangan an iba sa espirituwal paagi sa mga pag-adal sa Biblia. An pahina 91 nagsasadol: “Sagkod sa mapupuwede, gibohon na pasohan nindo na magkaigwa nin kisuerra sarong regular na pag-adal sa Biblia apuwera sa ano man na pag-adal na ginigibo nindo sa mga aki sa saindong pamilya.” Ini marahay na pasohan na puwedeng pagmaigotan niato gabos paagi sa pag-alok nin pag-adal sa Biblia sa gabos na oportunidad.
SA TABANG KAN LIBRONG REASONING
3 Naprobaran na daw nindong mag-alok nin pag-adal sa Biblia sa enot na pagsongko? Sa pahina 12 sa irarom kan “Home Bible Study,” an librong Reasoning nagsusuherir nin duwang introduksion na ginigibo an direktang pagdolok na ini. Ipinaiisi kaini sa kagharong na an katuyohan niato sa pagsongko mag-alok nin daing bayad na pag-adal sa Biblia. Ano man an gamiton niatong pag-aatubang, ikaoopresir niatong idemonstrar kun paano niato ginigibo an pag-adal. An dakol na kagharong dati nang igwa kan satong mga babasahon na puwedeng gamiton. O puwedeng gumamit nin tract sa pagpopoon nin pag-adal. Magigibo ini dawa kun sinayumahan an alok na libro, kun oyon an kagharong. Halimbawa, kun iinaalok an librong Creation, tibaad sabihon kan tawo na dai sia interesado sa ebolusyon. Dangan puwede niatong iopresir na ipaheling saiya kun paano kita nag-aadal sa Biblia na ginagamit an kapitulo 19 kan librong Creation, “An Earthly Paradise Soon to Come.”
4 An saro pang paagi sa pagpopoon nin pag-adal iyo an paggamit sa librong Reasoning sa mga pagdalaw liwat. Kun iinaareglo na bumalik, palatawon an hapot, “Malalaglag daw an planetang Daga sa sarong guerra nuklear?” Dangan imbes na sabihon sana sa kagharong na itatao nindo an simbag sa pagbalik nindo, ipasurat saiya an tolo o apat na teksto na kinua sa pahina 112 asin 113 kan librong Reasoning. Agdahon an kagharong na basahon an mga tekstong ini bilang pag-andam para sa masunod nindong pagsongko. Bumalik sa pinakamadaling panahon sa laog kan semana asin basahon an mga teksto, na pinag-oolayan iyan na magkaibanan. Dangan palatawon an saro na naman na hapot na sisimbagon sa masunod na pagsongko. Tawan giraray nin pirang tekstong mababasa an kagharong bago an saindong pagbuwelta.
5 Arog kan maheheling nindo, an paaging ini epektibo dawa kun sa primero an kagharong dai umako nin babasahon pero nahahadit manongod sa mga kamugtakan kan kinaban asin manongod sa ngapit.
6 Boot daw nindong magkaigwa nin pag-adal sa Biblia? Dawa kun may saro na kamo, may lugar daw sa iskedyul nindo para sa saro o duwa pa? Ipamibi an pagpopoon nin mga pag-adal mantang saindong ‘tinutubos an panahon.’—Efe. 5:15, 16.