Pag-aatubang kan Maogmang Bareta—Pag-alok nin mga Pag-adal sa Biblia
1 An suplemento sa Agosto 1991 An Satong Ministeryo sa Kahadean nagpagirumdom sato kan satong paninimbagan na magtanom asin magbaribi para sa paggibo nin mga disipulo ni Cristo. Ipinaliwanag kaiyan sato na kita maninigong mapahirong man-adal sa Biblia huli sa satong pagkamoot sa mga tawo asin tanganing maotob an isinugo sato na gumibo nin mga disipulo.—Mat. 28:19, 20.
2 Marahay na maheling na pinonan na kan kadaklan sato na gibohon an itinaong pagpakosog. An bilang nin mga pag-adal sa Biblia na irinireport digdi sa Pilipinas luminangkaw nin 12 porsiento ngonyan na 1991 kisa 1990 taon nin paglilingkod. Tunay na an mga nagpoon na mangenot sa pag-adal sa enot na pangyayari naggagayagaya sa nagigin kabtang ninda sa paggibo nin disipulo. Pero paano makakapakikabtang an dakol pa sa nagtatao nin balos na kabtang na ini kan satong ministeryo?
3 Gamiton an Alok sa Bulan: An Enero angay na bulan na maghingoang makapoon nin bagong pag-adal sa Biblia. An iaalok niato mas daan na mga publikasyon, na an kadaklan may hapot sa ibaba kan mga parapo na magagamit sa pagdemonstrar nin pag-adal sa Biblia. An marahay na paagi na mapatalubo an interes kan kagharong gamiton an mga suhestion na yaon sa librong Reasoning.
4 Puwede niatong itampok an temang pankinaban na katoninongan paagi sa paggamit kan mga introduksion na isinusuherir sa pahina 14 kan librong Reasoning sa irarom kan “War/Peace.” May nalilistang tolong laen-laen na paagi na maponan an pakikipag-olay sa temang ini. An pagdagka sa mga tawo na hanapon an simbag kan Biblia sa hapot na “Katoninongan sa Kinaban—Harani Na daw Iyan?” tibaad magbukas kan dalan para sa pag-adal sa Biblia.
5 Sa subtemang “Home Bible Study” sa pahina 12 kan librong Reasoning, may duwang suhestion na magagamit sa pagdara kan atension sa iinaalok na publikasyon. Iyan pareho nagsasadol na gamiton an libro sa sistematikong pag-adal. Kun ginagamit nindo an direktang pagdolok sa pagpoon nin pag-adal sa Biblia, puwede nindong sunodon an marahay na mga suhestion na yaon sa Oktubre 1991 na An Satong Ministeryo sa Kahadean.
6 Manarig ki Jehova: Tanganing magin mapanggana sa pag-adal sa Biblia, kaipuhan na girumdomon niato na magigibo sana an kapangganahan sa tabang ni Jehova. Sia an may pangenot na kabtang sa satong mga paghihingoa na tabangan an mga tawo. (1 Cor. 3:6) Kun siring, an maninigong ipamibi niato bako sanang an pakanompong nin maaadalan kundi siring man an pag-oswag nin mga interesado na nanompongan niato. (Juan 16:23) Dapat niatong girumdomon na kita “mga katabang nin Dios.”—1 Cor. 3:9.