Sarong Espesyal na Aldaw Para sa Pag-alok nin mga Pag-adal sa Biblia
1 Poon sa Enero, mapili an lambang kongregasyon nin sarong katapusan kan semana kada bulan, na tibaad an enot, tanganing magkonsentrar sa pag-alok nin mga pag-adal sa Biblia. Ini magsalang Sabado o Domingo, segun sa pinakamarahay sa lokal na kamugtakan. Sa aldaw na iyan, kun magsayuma an mga kagharong na akoon an alok na iyan, an mga parahayag puede pa man giraray na mag-alok kan librong Itinotokdo kan Biblia o magpasakamot kan pinakabagong mga magasin. Maninigong iareglo nin gabos na magurang sa kongregasyon asin ministeryal na lingkod na lubos sindang makikabtang sa gibohon na ini asin tabangan an mga parahayag na makapoon nin mga pag-adal sa Biblia.
2 An Komite sa Paglilingkod kan Kongregasyon an madeterminar kun arin na katapusan kan semana an itatagama sa pag-alok nin mga pag-adal sa Biblia. Sa panapanahon, maninigong ipagirumdom ini tanganing an mga parahayag makapag-andam asin makagibo nin espesyal na paghihingoa na mag-alok nin mga pag-adal sa Biblia sa harong-harong asin kun nagdadalaw sa mga nagpaheling nin interes kan nakaagi.
3 Kun Paano Maandam: Makakakua kita nin mga suhestion sa pagpoon nin mga pag-adal sa Biblia sa suplemento kan An Satong Ministeryo sa Kahadean na Enero 2006 asin sa pahina 12 kan librong Reasoning (p. 14 sa Tagalog). Tibaad gusto nin nagkapira na gumamit nin pulyeto, arog baga nin Gusto daw Nindong Maaraman an Katotoohan? Siring man, an pahina 4 kan An Satong Ministeryo sa Kahadean na Abril 2007 nagtatao nin mga suhestion sa pagpoon nin mga pag-adal sa Biblia kun nagdadalaw sa mga nag-ako nin mga magasin. An kamagurangan asin ministeryal na mga lingkod iiiskedyul na magkondukta nin 10 sagkod 15 minutos na pagtiripon bago maglingkod sa langtad, na durante kaiyan maninigong tokaron o idemonstrar an saro o duwang praktikal na suhestion sa pagpoon nin mga pag-adal sa Biblia.
4 Siempre, bakong gabos maako nin pag-adal sa Biblia o mapadagos sa pag-adal ninda sa halawig na panahon. Dai ini maninigong magin dahelan na dai na kita mag-aalok nin mga pag-adal sa Biblia, huling si Jehova an nagdadagka sa mga arog-karnero pasiring sa saiyang organisasyon. (Juan 6:44) An paninimbagan niato bako sanang magsabwag nin mga banhi nin katotoohan kundi pataluboon asin baribian man an nakagamot na, asin kaiba dian an pagkondukta nin pag-adal sa Biblia sa mga tama an kamugtakan nin puso. Paagi kaiyan, ginigibo niato an pribilehio nin pagigin mga kapwa trabahador nin Dios.—1 Cor. 3:9.