Tabangan an Iba na Manodan an Katotoohan
1 Nagdigdi si Jesus sa daga sa pagpatotoo sa katotoohan. Sinanay nia an saiyang mga disipulo na magin mga paratokdo. Iinagid nia sinda sa ‘mga paratokdo sa publiko’ na igwa nin mahiwas na lalagan nin kayamanan na mapagkukuanan. (Mat. 13:52) An mga disipulo ni Jesus ngonyan naggagamit nin inimprentang mga publikasyon sa pagparikas kan gibohon na paghuhulit kan Kahadean. Halimbawa, igwa kita nin manlaenlaen na brochure tanganing tabangan an iba na magin mga disipulo. Paano niato magagamit an mahalagang mga instrumentong ini?
2 Sa pagpoon nin sarong pag-orolay na minagiya sa pag-alok kan brochure na “Uya! Ginigibo Kong Bago an Gabos na Bagay,” puwede kamong maghapot:
◼ “Napag-isip-isip na daw nindo kun taano ta sa ibong kan gabos na paghihingoa nin tawo, an mga paglaom para sa ngapit garo baga biyong marumarom? [Pasimbagon.] Ipinaliliwanag kan Biblia kun taano ta dakol na paghihingoa an nasudya.” Basahon an Salmo 146:3, 4. Buksan sa parapo 43 kan brochure asin basahon an enot na tolong sentence. Dangan pag-olayan an gobyerno nin Dios na may katoninongan sa parapo 43 asin 44, na iiniilustrar sa atubangan asin sa likod na tutob kan brochure na Uya!
3 Uya an sarong paagi na puwede nindong gamiton an brochure na “An Dios daw Talagang May Pagmakolog sa Sato?”:
◼ “Dakol na tawo an naghapot kan nasa tutob kaining brochure. [Basahon an mga hapot.] Mantang an mamomoton na Dios dai mapalakop na magkadungan kapwa kan marahay asin maraot, ano an paghona nindo manongod sa saiyang panuga digdi sa Isaias 65:21, 22?” Kun ipinaheling an interes, buksan sa pahina 26 asin 27, parapo 19-22, asin ipaliwanag kun ano an gigibohon kan Kahadean nin Dios.
4 Kun iinaalok an brochure na “What Is the Purpose of Life?,” puwede nindong sabihon:
◼ “Para sa dakol, an buhay garo baga mayong katuyohan. Ano sa paghona nindo an kaipuhan tanganing magin mas makahulogan an buhay? [Pakomentohon an kagharong.] Ipinaheheling kan Biblia na an Dios nag-andam nin mas mararahay na bagay para sa sato. Helinga an sinasabi nia sa Kapahayagan 21:4, 5.” Kun angay, ipadagos an pag-orolay sa mga punto sa kabtang 8 kan brochure sa pahina 29 asin 30.
5 Ginagamit an brochure na “Enjoy Life on Earth Forever!,” an mas hoben na parahayag puwedeng maghapot:
◼ “Boot daw nindong mag-istar sa sarong paraisong daga na arog kaini? [Ipaheling an sa atubangan asin sa likod na tutob, asin pakomentohon.] An sakong pamilya asin ako naglalaom na mabuhay dian huli sa sinasabi kan Biblia digdi sa Juan 17:3.” Dangan puwedeng ialok an brochure.
6 Kun ginagamit nindo an iba pang brochure sa saindong ministeryo ngonyan na bulan, puwede nindong iangay an saindong mga pag-atubang sa mga suhestion sa enotan. Girumdomon na magin halipot asin positibo tanganing mapukaw an interes kan mga kagharong.
7 Itinao ni Jehova sa sato an katotoohan. Maninigong ihiras niato iyan sa iba, kapwa paagi sa inimprenta asin sa satong mga pakikipag-olay. Sa paaging ini mapapatunayan niato na kita mga paratokdo sa publiko para sa kapakinabangan kan iba.—Mat. 28:19, 20.