Sarayon
Suhestion na mga Pag-atubang sa Paglilingkod sa Langtad
Gamiton an minasunod na mga suhestion tangani na tabangan kamong mag-andam nin mga pag-atubang na itinatampok an alok para sa bulan.
Rumani ki Jehova
“Dakol na tawong nagtutubod sa Dios an gustong magin mas harani sa saiya. Aram daw nindo na iniimbitaran kita nin Dios na rumani sa saiya? [Basahon an Santiago 4:8.] Dinisenyo an publikasyon na ini tangani na tabangan an mga tawo na gamiton an sadiri nindang Biblia sa pagrani sa Dios.” Basahon an parapo 1 sa pahina 16.
“Lakop an inhustisya ngonyan. Siring nanggad iyan kan ilinaladawan digdi. [Basahon an Eclesiastes 8:9b.] Dakol an nag-iisip-isip kun may pagmakolog pa an Dios. [Basahon an enot na duwang sentence kan parapo 4 sa pahina 119.] Ipinapaliwanag kan kapitulong ini kun taano an inhustisya ta tinogotan nin Dios sa laog nin kadikit na panahon.”
Is There a Creator Who Cares About You?
“Saen ta puedeng makua an pinakamarahay na sadol kun paano reresolberan an nakakaribaraw na marhay na mga problema niato? [Pasimbagon. Dangan basahon an Mateo 7:28, 29.] Ilinaladawan kaiyan an nagin reaksion kan mga tawo sa Sermon sa Bukid ni Jesus. Mangnoha an sinabi kan iba. [Itampok an mga komento sa pahina 152.] Tinotokar kan kapitulong ini an buhay asin mga katokdoan ni Jesus.”
“Napag-isip-isip na daw nindo na: ‘Kun may Dios, mahiro pa daw sia tangani na haleon an pagdusa asin inhustisya sa kinaban?’ [Pasimbagon. Dangan basahon an Kapahayagan 21:3, 4.] Ipinapaliwanag kan librong ini kun ano an gigibohon nin Dios tangani na haleon an pagdusa asin haleon an gikanan kaiyan.” Ipaheling an kapitulo 10.
Kaaraman na Minagiya Pasiring sa Buhay na Daing Katapusan
“Kun naimbitaran kamong mag-istar sa magagayon na palibot na arog kaini, aakoon daw nindo an imbitasyon? [Ipaheling an retrato sa pahina 4-5, asin pasimbagon.] Mangnoha kun ano an sinasabi kan Tataramon nin Dios na paagi tangani na kamtan an arog kaining klase nin buhay sagkod lamang. [Basahon an Juan 17:3.] An librong ini makakatabang sa saindo na magkaigwa kan kaaraman na minagiya pasiring sa buhay na daing katapusan.” Iareglo na ipakipag-olay sa saiya an enot na limang parapo kan kapitulo 1 sa masunod na pagdalaw.
Buksan an retrato sa pahina 188-9, asin ginagamit an mga tataramon sa kapsion, hapoton an kagharong: “Linalaoman daw nindong mabuhay sa Paraiso, kun mapano na an daga kan kaaraman nin Dios? [Pasimbagon. Dangan basahon an Isaias 11:9.] An librong ini makakatabang saindo na manodan an sinasabi kan Biblia manongod sa Paraiso asin kun paano kita puedeng magin kabtang kaiyan.” Iareglo na ipakipag-olay an parapo 11-16 kan kapitulo 1 sa masunod na pagdalaw.
Makanood sa Dakulang Paratokdo
“Sa paghona daw nindo an kinaban magigin mas marahay na lugar kun inotob nin mga tawo an kasabihan na ini? [Basahon an Mateo 7:12a. Dangan pasimbagon.] An librong ini igwa nin dakol na leksion hale sa pinakadakulang paratokdo na nabuhay kasuarin man.” Itampok an mga retrato asin kapsion sa kapitulo 17.
“An kadaklan na magurang ngonyan nagmamaigot na itadom sa saindang mga aki an kapakipakinabang na mga pamantayan sa buhay. Sa paghona daw nindo importante ini? [Pasimbagon. Dangan basahon an Talinhaga 22:6.] Mangnoha na ineenkaminar an mga magurang na ponan an pagsasanay sa saindang mga aki sa amay pang edad. Dinisenyo an librong ini tangani na tabangan sindang gibohon iyan.” Itampok an mga retrato asin kapsion sa kapitulo 15 o 18.
“Sa parate napapangalas an mga magurang sa mga ihinahapot kan saindang mga aki. An nagkapira sa mga hapot na iyan masakit simbagon, bako daw? [Pasimbagon. Dangan basahon an Efeso 6:4.] An librong ini makakatabang sa mga magurang na simbagon an mga hapot para sa saindang mga aki ngonyan.” Itampok an nagkapira sa mga retrato asin kapsion sa kapitulo 11 asin 12 o 34 sagkod 36.
Life—How Did It Get Here? By Evolution or by Creation?
“Kita gabos nahahadit sa krimen asin kadahasan sa satong lugar. Sa paghona daw nindo igwa nin siisay man na may tunay na solusyon sa problemang iyan? [Pasimbagon.] An Dios may solusyon.” Buksan sa pahina 196; basahon asin komentohan an Talinhaga 2:21, 22 sa parapo 19. Ipaheling an titulo kan kapitulo 16, asin ialok an libro.
Buksan sa pahina 6, asin magsabi: “Dakol na tawo an naghohona na resulta sana nin aksidente an satong magayon na daga asin an mga nabubuhay dian. Ano an ibinibilang nindong rasonableng paliwanag sa kun paano nangyari an gabos na ini? [Pasimbagon.] An kadakoldakol na ebidensia nagpapatunay sa pagkasaysay kan Biblia na igwa nin Kaglalang na makapangyarihan na marhay asin na namomotan man kitang marhay. Sia an tunay na Dios, asin an ngaran nia Jehova.” Basahon an Salmo 83:18, asin ipaliwanag sa halipot kun paanong katuyohan nia na bagohon an bilog na daga na magin sarong paraiso.
Mankind’s Search for God
“Huli sa kadakol na laen-laen na relihion ngonyan, napag-isip-isip na daw nindo kun paano niato madedeterminaran kun arin an inooyonan nin Dios?” Pakasimbag, buksan sa pahina 377. Itampok an punto numero 7, asin hapoton kun minaoyon an kagharong na an tunay na relihion maninigong mapagkasararo an gabos na rasa nin katawohan. Helingon an saro sa sitadong mga teksto, asin sagkod na may oras, tokaron an nagkapira sa iba pang punto na nasa lista. Kun tunay na interesado, ialok an libro. Bago maghale, puede nindong ihapot, “Ano an maninigo na magin epekto kan tunay na relihion sa paggawe nin saro?” Iareglo an pagdalaw liwat tangani na simbagon an hapot na iyan.
Kun an saro magpamidbid na sia miembro nin sarong mayor na relihion, puede nindong sabihon: “Interesanteng makaolay an mga tawo sa manlaenlaen na relihion. Hinahanap nin katawohan an Dios sa dakol na laen-laen na direksion. [Kun angay, basahon an Gibo 17:26, 27.] Sa parate, an sinusunod nin mga tawo iyo an relihion kan saindang mga magurang. [Basahon an parapo 12 sa pahina 8.] An pakanood nin orog pa manongod sa ibang mga relihion nakakapagpaliwanag asin nakakapagtokdo. Ipinapaliwanag kan librong ini an ginikanan, mga kaugalean, asin katokdoan kan mayor na mga relihion sa kinaban.” Ipaheling an sarong halimbawa nin impormasyon na yaon sa libro manongod sa relihion nia, siring kan yaon sa minasunod na mga pahina: Sikismo (100-1); Hinduismo (116-17); Budismo (141); Taoismo (164-6); Confucianismo (177); Sintoismo (190-5); Judaismo (220-1); asin Islam (289).
Revelation—Its Grand Climax At Hand!
“Tibaad nabaretaan nindo an manongod sa [sambiton an sarong bareta]. Kun an mga tawo nagagadan sa makamomondong marhay na paagi, dakol an nag-iisip-isip kun anong karangahan an ikakatao sa mga pamilya kan mga biktima. Ano sa paghona nindo?” Pasimbagon. Dangan buksan sa pahina 299, asin ipaheling an eksena nin pagkabuhay liwat na inilustrar. Magpadagos paagi sa pagsabing: “Dakol an nagngangalas na manodan na an mga matanos sagkod bakong matanos bubuhayon liwat sa Paraiso sa daga. [Basahon an Gibo 24:15 na kinotar sa parapo 9 na nasa pahina 297, dangan itao an paliwanag na yaon sa parapo 10.] Tinotokar kan librong ini an dakol na iba pang interesanteng detalye manongod sa katuyohan nin Dios para sa ngapit.”
The Bible—God’s Word or Man’s?
“Nabubuhay kita sa panahon na haros gabos napapaatubang sa magabat na mga problema. Dakol an minadolok sa gabos na klase nin parakonseho para sa paggiya. An nagkapira nagdodolok sa mga espiritista para sa tabang. Sa paghona nindo saen daw kita makakakua nin marahay na sadol na talagang mapapakinabangan niato? [Pasimbagon.] An Biblia may mahalagang sinasabi na kaipuhan niato gabos na masabotan. [Basahon an 2 Timoteo 3:16. Dangan buksan sa pahina 187, asin basahon an parapo 9.] An librong ini makakatabang sa saindo na masabotan kun paanong an pagsunod sa sinasabi kan Biblia an pirmeng may pinakamarahay na ibinubunga.”
The Greatest Man Who Ever Lived
“Durante kan kapanahonan na ini dakol na tawo an nag-iisip manongod ki Jesus. Minsan siring, huling kadakol kan maraot na nangyayari sa bilog na kinaban, an nagkapira tibaad mag-isip-isip kun si Jesus talagang may pagmakolog sa sato. Ano an saboot nindo manongod kaiyan?” Pasimbagon. Buksan sa pahina 24, asin tokaron sa halipot kun taano si Jesus ta nagdigdi sa daga. Dangan basahon an Juan 15:13, na idinodoon an odok sa pusong pagkamoot ni Jesus para sa iba.
“Kun sinasambit nin saro si Jesu-Cristo, dakol na tawo an nag-iisip na sia magsalang sarong omboy o sarong tawong nagdudusa na magagadan na. An kalabot sana sa ideya ninda manongod ki Jesus iyo an pagkamundag asin kagadanan nia. Sa parate, dai aram an makangangalas na mga bagay na sinabi asin ginibo nia durante kan sia nabubuhay. An nagibo nia may epekto sa lambang tawo na nabuhay sa dagang ini. Iyan an dahelan kun taano ta mahalagang marhay na manodan niato sagkod sa makakaya niato an manongod sa makangangalas na mga bagay na ginibo nia para sa sato.” Basahon an Juan 17:3. Buksan sa enot na pahina kan introduksion, asin basahon an ikaapat na parapo.
Ano an Kahagadan sa Sato nin Dios?
“Sa paghona nindo katuyohan daw nin Dios na kita mabuhay na napapalibotan nin mga problema arog kan mga inaatubang niato ngonyan? [Pasimbagon. Dangan basahon an Mateo 6:10.] Napag-isip-isip na daw nindo kun ano talaga an boot sabihon kan Kahadean nin Dios?” Buksan sa leksion 6, asin basahon an mga hapot na yaon sa kapinonan kan leksion. Ponan na tokaron an leksion, o iareglo na gibohon iyan sa masunod na pagdalaw.
“Sa ibong kan mga pag-oswag sa sosyedad sa presenteng panahon, an helang asin kagadanan padagos na nagigin dahelan nin grabeng pagdusa asin pagmondo para sa katawohan. Aram daw nindo kun ano an gigibohon ni Jesus para sa mga may helang, may edad na, asin pati sa mga gadan?” Pasimbagon. Kun boot niang maaraman an simbag, buksan sa leksion 5, asin basahon an mga hapot para sa parapo 5-6. Pag-olayan an mga parapo, o iareglo na gibohon iyan sa masunod na pagdalaw.
Worship the Only True God
“Saen daw kita sa paghona nindo makakadolok para sa tabang sa pag-atubang sa mga kasakitan sa buhay? [Pasimbagon. Dangan basahon an Roma 15:4.] Mangnoha na an ipinasabong na Kasuratan nagtatao sa sato nin instruksion, karangahan, asin paglaom, na makakapakosog sa sato na tagalan an mga kadepisilan. An librong ini nagtatao nin nakakatabang na mga suhestion kun paano kita lubos na makikinabang sa pagbasa sa Biblia.” Itampok an itinaong apat na punto sa pahina 30.
“Poon kan mga aldaw na si Jesus maglakaw digdi sa daga, dakol na tawo an haloy nang namimibi na dumatong logod an Kahadean nin Dios. Napag-isip-isip na daw nindo kun ano an magigin kahulogan para sa katawohan kan pagdatong kan Kahadean na iyan? [Pasimbagon. Dangan basahon an Daniel 2:44.] Ipinapaliwanag kan librong ini kun ano an Kahadean nin Dios, kun ano an gigibohon kaiyan, asin kun paano kita makikinabang sa matanos na pamamahala kaiyan.” Itampok an ilustrasyon sa pahina 92-3.