Sarayon
Suhestion na mga Pag-atubang sa Paglilingkod sa Langtad
Kun Paano Gagamiton an Suplementong Ini
An kadaklan sa minasunod na mga pag-atubang nagluwas sa nakaaging mga isyu kan An Satong Ministeryo sa Kahadean. Probaran an pinakadakol na magagamit nindo sa saindong paghuhulit, asin helingon kun anong mga resulta an makakamtan nindo. Sarayon an suplementong ini, asin konsultahon iyan kun nag-aandam para sa ministeryo.
Puede nindong mapukaw an interes nin saro sa Tataramon nin Dios kun kamo maderetso tolos sa punto. Magpalataw nin sarong espesipikong hapot, dangan basahon an halipot na simbag sono sa Kasuratan. Puede nindong probaran an mga suhestion na ini:
“Mantang hinohorophorop nindo an ngapit, kamo daw pano nin paglaom o nagdududa? [Pasimbagon.] Patienot na sinabi kan Biblia an nakapupurisaw na mga pangyayari na naheheling niato ngonyan asin an resulta kaiyan.”—2 Tim. 3:1, 2, 5; Tal. 2:21, 22.
“Kadakol kan nahahadit ngonyan manongod sa pag-asikaso sa salud. Aram daw nindo na nanunuga an Dios na permanente niang reresolberan an gabos na problema sa salud?”—Isa. 33:24; Kap. 21:3, 4.
“Aram daw nindo na ihinuhula kan Biblia na pag-abot nin panahon magkakaigwa nin saro sanang gobyerno na mamamahala sa bilog na kinaban?”—Dan. 2:44; Mat. 6:9, 10.
“Ano sa paghona nindo an magigin mga kamugtakan kun si Jesu-Cristo an namamahala sa daga?”—Sal. 72:7, 8.
“Dakol an apektadong marhay nin diskriminasyon huli sa saindang sekso, relihion, o rasa. Ano sa paghona nindo an saboot nin Dios manongod sa siring na prehuwisyo?”—Gibo 10:34, 35.
“Aram niato na si Jesu-Cristo naggibo nin dakol na milagro kan kaaldawan nia. Kun mahahagad nindo sa saiya na gumibo nin saro pang milagro, ano daw iyan?”—Sal. 72:12-14, 16.
“An kadaklan sawa na sa pagdangog manongod sa mga problema. An gusto nindang madangog mga solusyon. Alagad saen daw kita makanonompong nin tunay na mga solusyon sa satong mga problema?”—2 Tim. 3:16, 17.
“Masasabi daw nindo kun ano an Kahadean na ipinamimibi nindo sa Pamibi kan Kagurangnan (o, Ama Niamo)?”—Kap. 11:15.
Mga Pampoon sa Pakikipag-olay
An lista nin mga hapot sa ibaba, na tinipon hale sa mga topiko sa librong Reasoning, nagpapaheling kan numero kan pahina sa libro kun saen manonompongan an kada simbag:
Taano kita ta naggugurang asin nagagadan? (98; sa Tagalog, 105)
Ano an kamugtakan kan mga gadan? (100; sa Tagalog, 107)
Igwa daw nin marigon na mga dahelan tanganing tumubod sa Dios? (145; sa Tagalog, 126)
An Dios daw talagang may pagmakolog sa nangyayari sa sato na mga tawo? (147; sa Tagalog, 128)
An Dios daw tunay na persona? (147; sa Tagalog, 128)
An gabos daw na marahay na tawo minaduman sa langit? (162; sa Tagalog, 220)
Kaipuhan daw na magduman sa langit an saro tanganing magkaigwa nin totoong maogmang ngapit? (163; sa Tagalog, 221)
Taano ta mahalaga na maaraman asin gamiton an personal na ngaran nin Dios? (196; sa Tagalog, 195)
Si Jesu-Cristo daw talaga an Dios? (212; sa Tagalog, 200)
Ano an gigibohon kan Kahadean nin Dios? (227; sa Tagalog, 88)
Ano an katuyohan kan buhay nin tawo? (243; sa Tagalog, 70)
Ano an makatatabang na mapakarhay an pag-agoman? (253; sa Tagalog, 267)
Inaako daw nin Dios an gabos na relihion? (322; sa Tagalog, 360)
Paano maaaraman nin saro kun arin na relihion an tama? (328; sa Tagalog, 365)
Gurano kamakapangyarihan si Satanas sa presenteng kinaban? (364; sa Tagalog, 398)
Taano ta tinotogotan nin Dios an pagdusa? (393; sa Tagalog, 284)
Taano ta grabe an karatan? (427; sa Tagalog, 83)
Siisay an namamahala sa kinaban na ini—An Dios o si Satanas? (436; sa Tagalog, 388)
Mga Suhestion sa Pag-atubang kan Brosyur na Kahagadan
“Daing duwa-duwa na maoyon kamo na dakol an nagtutubod sa Dios. An gabos na talagang nagtutubod sa saiya minaoyon na may kahagadan an Dios sa sato. An dai pinagkakaoyonan nin mga tawo iyo ini, Ano an kahagadan sa sato nin Dios?” Dangan iatubang an brosyur na Kahagadan, buksan sa leksion 1, asin ipakipag-olay iyan.
“Huli sa kadakol na problema sa buhay pampamilya ngonyan, napaghorophorop na daw nindo kun ano an sekreto sa pagkaigwa nin kaogmahan sa pamilya?” Pakasimbag, ipaliwanag na sa Biblia, ipinahahayag nin Dios an tunay na sekreto sa kaogmahan nin pamilya. Basahon an Isaias 48:17. Dangan buksan an leksion 8 sa brosyur na Kahagadan, asin itokdo an nagkapirang sitadong bersikulo sa Biblia na nagtatao nin masasarigan na giya para sa lambang miembro kan pamilya. Basahon an lista nin mga hapot sa kapinonan kan leksion. Hapoton sia kun boot niang basahon an simbag.
“An brosyur na ini igwa nin kompletong kurso sa pag-adal na nagtotokar kan pundamental na mga katokdoan sa Biblia. Sa kada pahina, makukua nindo an simbag sa mga hapot na nakapurisaw sa mga tawo sa laog nin dakol na siglo. Halimbawa, Ano an katuyohan nin Dios para sa daga?” Buksan sa leksion 5, asin basahon an mga hapot sa kapinonan kan leksion. Hapoton an kagharong kun arin an pinakainteresante para sa saiya, dangan basahon an katimbang na (mga) parapo, na binubuksan an angay na mga teksto. Ipaliwanag na an nakakokontentong simbag sa ibang mga hapot makukua nin arog kaini kadali. Isuherir na mabalik kamo tangani na pag-olayan an saro pang hapot.
“Ano sa paghona nindo an dahelan kan madahas na mga krimen sa tahaw kan mga hoben ngonyan? Iyan daw resulta nin kadaihan nin pagsasanay kan mga magurang? O iyan daw huli sa ibang dahelan, siring baga kan impluwensia kan Diablo?” Pasimbagon. Kun sabihon nia na iyan huli sa impluwensia kan Diablo, basahon an Kapahayagan 12:9, 12. Sabihon an kabtang kan Diablo sa pagpalakop nin grabeng kariribokan sa kinaban. Dangan buksan an brosyur na Kahagadan sa leksion 4, asin hapoton kun napaghorophorop na nia kun saen gikan an Diablo. Ipadagos na basahon asin ipakipag-olay an enot na duwang parapo. Kun pinili nia an “kadaihan nin pagsasanay kan mga magurang” bilang dahelan kan kadahasan sa tahaw nin mga hoben, basahon an 2 Timoteo 3:1-3 asin sambiton an mga ugale na malinaw na nakakokontribwir sa problemang ini. Dangan buksan an brosyur na Kahagadan sa leksion 8, basahon an parapo 5, asin ipadagos an pag-oolay.
“Sa paghona daw nindo makatanosan na laoman na itatao sa sato kan Kaglalang an kaaraman na kaipuhan niato tangani na makatogdok nin sarong mapangganang buhay pampamilya?” Pakasimbag, iintrodusir an brosyur na Kahagadan. Buksan sa leksion 8, asin ipaliwanag na iyan igwa nin mga prinsipyo hale sa Biblia para sa lambang miembro kan pamilya. Alokon na idemonstrar kun paano gagamiton an brosyur kaiba kan Biblia tangani na makua an pinakadakulang pakinabang.
“Huli sa gabos na angat na inaatubang niato sa buhay sa presenteng aldaw, naniniwala daw kamo na an pamibi puedeng magin tunay na tabang para sa sato? [Pasimbagon.] Dakol an nagsasabi na an pamibi nagtatao sa sainda nin panlaog na kosog. [Basahon an Filipos 4:6, 7.] Minsan siring, tibaad mamatean nin saro na an saiyang mga pamibi dai sinisimbag. [Buksan an brosyur na Kahagadan sa leksion 7.] Ipinaliliwanag kan brosyur na ini kun paano an pamibi puedeng magin kapakipakinabang na marhay para sa sato.”
“Nakikipag-olay kami sa samong pagtaraed manongod sa kun taano ta kadakol nin laen-laen na relihion sa kinaban. Pero, saro sana an Biblia. Sa opinyon nindo, taano ta igwa kan karibarawan na ini sa mga relihion? [Pasimbagon. Buksan an brosyur na Kahagadan sa leksion 13, asin basahon an pambukas na mga hapot.] Aakoon nindo an nakakokontentong simbag sa mga hapot na iyan paagi sa pagbasa kan leksion na ini.”
Pakapasakamot kan mga magasin na Torrengbantayan asin Awake! sa saro, hapoton sia kun puede nindong basahon sa saiya an sarong halipot na parapo. Kun togotan kamong gibohon iyan, buksan an brosyur na Kahagadan sa leksion 5. Itokdo an mga hapot na nakalista sa kapinonan kan leksion, asin hagadon sa saiya na hinanyogon an simbag sa enot na hapot mantang binabasa nindo an enot na parapo. Pakabasa kan parapo, basahon an hapot asin pasimbagon sia. Ialok an brosyur, asin kun akoon iyan, iareglo na mabalik tangani na maaraman an simbag nia sa masunod na duwang hapot na nasa lista.
Mga Suhestion sa Pag-atubang kan Librong Kaaraman
Kapot an Biblia, magpoon paagi sa pagsabing: “Ihinihiras mi an sarong teksto sa gabos sa saindong kalye ngonyan. Ini nagsasabi . . .” Basahon an Juan 17:3, dangan maghapot: “Nariparo daw nindo kun ano an ipinanunuga kun kita igwa kan tamang klase nin kaaraman? [Pasimbagon.] Saen makukua nin saro an siring na kaaraman?” Pakasimbag, ipaheling an librong Kaaraman, asin magsabi: “An librong ini nagtotokdo sa kaaraman na minagiya pasiring sa buhay na daing katapusan. Ginigibo iyan kaiyan paagi sa pagsimbag sa pinakalakop na mga hapot nin mga tawo manongod sa Biblia.” Ipaheling an mga laog, asin hapoton sia kun napaghorophorop na nia an manongod sa arin man sa mga temang iyan.
“Napaghorophorop na daw nindo kun an Dios talagang may pagmalasakit sa inhustisya asin pagdusa na naheheling niato sa satong palibot o naeeksperyensiahan pa ngani niato mismo? [Pasimbagon.] Sinisierto sa sato kan Biblia na namomotan kita nin Dios asin na tatabangan nia kita sa mga panahon nin kasakitan.” Basahon an mga kabtang kan Salmo 72:12-17. Buksan an librong Kaaraman sa kapitulo 8, asin sabihon na iyan nagtatao nin nakararangang simbag sa sarong hapot na ihinahapot nin minilyon, Taano daw ta tinotogotan nin Dios an pagdusa? Kun posible, ipakipag-olay an nagkapira sa mga ideya sa Kasuratan na tinokar sa parapo 3 sagkod 5, o gibohon iyan sa pagdalaw liwat.
“An kadaklan sa sato nagadanan na nin mga namomotan. Napaghorophorop na daw nindo kun baga maheheling pa niato sinda giraray? [Pasimbagon.] Pinatunayan ni Jesus na an satong mga namomotan puedeng makalda sa kagadanan. [Basahon an Juan 11:11, 25, 44.] Minsan ngani ini nangyari dakol nang siglo an nakaagi, ipinaheheling kaiyan an ipinanuga nin Dios na gigibohon para sa sato.” Buksan an librong Kaaraman sa retrato na nasa pahina 85, asin basahon an kapsion. Dangan ipaheling an retrato na nasa pahina 86, asin komentohan iyan. Magbugtak nin pundasyon para sa masunod na pagdalaw paagi sa paghapot: “Boot daw nindong maaraman an dahelan kun taano an mga tawo ta naggugurang asin nagagadan?” Bumalik tangani na ipakipag-olay an kapitulo 6.
“Napag-isip-isip na daw nindo kun taano an mga tawo ta naghihimuyawot nin mas halawig na buhay?” Pakasimbag, buksan an librong Kaaraman sa kapitulo 6, asin basahon an parapo 3. Mangatanosan sa sitadong mga teksto. Itinotokdo an duwang hapot sa poro kan parapo, hapoton sia kun boot niang maaraman an mga simbag. Kun paborable an simbag, ipakipag-olay an masunod na pirang parapo.
“Hinahapot mi an mga tawo kun sinda nagtutubod digdi . . .” Basahon an Genesis 1:1, dangan ihapot: “Minaoyon daw kamo sa mga tataramon na iyan?” Kun umoyon sia, dangan sabihon: “Iyo man ako. Minsan siring, sa paghona daw nindo kun an Dios an naglalang kan gabos na bagay, sia man an responsable sa karatan?” Pakapasalamat sa simbag nia, basahon an Eclesiastes 7:29. Buksan an librong Kaaraman sa kapitulo 8, asin basahon an parapo 2. Kun sia dai minaoyon sa Genesis 1:1, sadolon sia na siyasaton an ebidensia na igwa nin Kaglalang.—Helingon an librong Reasoning, pahina 84-6 (sa Tagalog, 291-2).
“Maoyon daw kamo na huli sa marikas na marhay na pagbago kan moral na pamantayan sa buhay ngonyan, kaipuhan niato nin masasarigan na giya sa buhay? [Pasimbagon.] Dawa ngani iyan an pinakadaan sa mga libro, an Biblia nagtatao nin praktikal na hatol para sa pamumuhay sa presenteng panahon asin sa maogmang buhay pampamilya.” Dangan buksan sa kapitulo 2 sa librong Kaaraman, asin basahon an parapo 10 asin an enot na sentence kan parapo 11, kaiba an 2 Timoteo 3:16, 17.
“Boot daw nindong maaraman kun ano an nakatagama sa ngapit para sa sato asin sa daga? [Pasimbagon.] Sinusumaryo kan Biblia an ngapit sa sarong termino—Paraiso! Dian ibinugtak nin Dios an enot na tawong mag-agom kan lalangon nia sinda. Mangnoha an paglaladawan na ini kun ano an nagin kamugtakan kaidto.” Buksan an librong Kaaraman sa pahina 8, asin basahon an parapo 9, sa irarom kan subtemang “Buhay sa Paraiso.” Dangan ipakipag-olay an mga punto sa parapo 10, asin basahon an sitadong teksto, an Isaias 55:10, 11. Alokon na ipadagos an pag-oolay kun ano an magigin kamugtakan nin buhay sa ibinalik na Paraiso, na tinotokar sa parapo 11-16.
Kun nagdadalaw liwat sa mga napasakamotan nindo kan magasin na Torrengbantayan asin Awake!, puede nindong sabihon ini:
“Kan nakaaging nagsongko ako, naogma akong iwalat sa saindo an sarong kopya kan magasin na Torrengbantayan. Tibaad nariparo nindo na an bilog na titulo kan magasin iyo An Torrengbantayan Nagpapahayag kan Kahadean ni Jehova. Ngonyan gusto kong ipaliwanag kun ano an Kahadean na ini asin kun ano an puedeng magin kahulogan kaiyan para sa saindo asin sa saindong pamilya.” Dangan buksan an brosyur na Kahagadan sa leksion 6, asin basahon patin pag-olayan sagkod na igwa sia nin panahon.
“Nagdalaw ako sa saindo kasuarin pa sana asin nagwalat nin mga kopya kan mga magasin na Torrengbantayan asin Awake! An mga magasin na ini nagpapatalubo nin paggalang para sa Biblia asin sa moral na giya kaiyan. Huling namamatean ko na mahalagang marhay na an gabos makasabot kan Tataramon nin Dios, nagbalik ako tangani na ipaheling sa saindo an sarong bagay na makatatabang sa saindo na gibohon iyan.” Iintrodusir an brosyur na Kahagadan o an librong Kaaraman, asin mag-alok nin pag-adal sa Biblia.
Kun itinatampok an arin man kan haloy nang mga libro na 192 pahinas, puede nindong probaran an pag-atubang na ini:
“Idinodoon na marhay kaidto pa an pangangaipo para sa de kalidad na edukasyon. Sa opinyon nindo, anong klaseng edukasyon an maninigong pag-aaboton nin saro tangani na seguradohon an pinakadakulang kaogmahan asin kapangganahan sa buhay? [Pasimbagon. Dangan basahon an Talinhaga 9:10, 11.] An sadit na librong ini [sabihon an titulo kan libro na iinaalok nindo] basado sa Biblia. Iyan nagtotokdo sa solamenteng gikanan nin kaaraman na puedeng gumiya pasiring sa buhay na daing katapusan.” Ipaheling an sarong espesipikong halimbawa sa libro, asin enkaminaron sia na basahon iyan.
Iba Pang mga Publikasyon
An suhestion na mga pag-atubang para sa dagdag pang mga libro asin brosyur makukua sa Watch Tower Publications Index sa irarom kan:
Presentations
List by Publication
An Direktang Pagdolok
Sa pagpoon nin pag-adal sa Biblia, pagmaigotan na gamiton an saro sa direktang mga pagdolok na ini:
“Aram daw nindo na sa pira sanang minuto, manonompongan nindo an simbag sa sarong importanteng hapot sa Biblia? Halimbawa, . . .” Dangan, iatubang an sarong hapot na yaon sa kapinonan kan saro sa mga leksion sa brosyur na Kahagadan asin na iniisip nindo na makaaakit sa indibiduwal.
“Naghapit ako tangani na ipaheling sa saindo an samong daing bayad na programa nin pag-adal sa Biblia. Mga limang minuto an kaipuhan tanganing idemonstrar iyan. Ano, may limang minuto kamo?” Kun iyo an simbag, gamiton an leksion 1 sa brosyur na Kahagadan sa pagdemonstrar kan pag-adal, na binabasa sana an saro o duwang piniling teksto. Pagkatapos, ihapot: “Noarin kamo may mga 15 minutos tanganing mapag-olayan niato an masunod na leksion?”
“Dakol an may Biblia, alagad dai ninda narerealisar na iyan igwa nin simbag sa importanteng mga hapot niato gabos manongod sa satong ngapit. Ginagamit an pantabang na ini sa pag-adal [an brosyur na Kahagadan o an librong Kaaraman] sa laog nin sarong oras o labi pa sa sarong semana, magkakamit kamo nin pundamental na pakasabot manongod sa Biblia sa laog nin pira sanang bulan. Maoogma akong ipaheling sa saindo kun paano ginigibo an programa.”
“Nagsosongko ako tangani na mag-alok nin daing bayad na kurso sa Biblia. Kun puede, boot kong gumamit nin pira sanang minuto tangani na idemonstrar kun paano an mga tawo sa mga 200 na kadagaan pinag-oolayan an Biblia sa harong bilang pamilya. Puede niatong gamiton an arin man sa mga topikong ini bilang basehan sa pag-orolay. [Ipaheling an mga laog sa librong Kaaraman.] Arin an nangorognang interesante para sa saindo?’’ Halaton sia na makapili. Buksan an kapitulo na pinili, asin ponan an pag-adal sa enot na parapo.
“Nagtatao ako nin mga leksion sa Biblia na daing bayad asin may mga bakante pa sa sakong iskedyul para sa dugang pang mga estudyante. An pantabang na ini sa Biblia an ginagamit niamo. [Ipaheling an librong Kaaraman.] An kurso malawig nin pira sanang bulan asin nagtatao nin simbag sa mga hapot na arog kan: Taano ta tinotogotan nin Dios an pagdusa? Taano ta kita naggugurang asin nagagadan? Ano an nangyayari sa satong nagadan nang mga namomotan? Asin paano kita magigin dayupot sa Dios? Puede daw na idemonstrar ko an sarong leksion?”
Kun nakakua na kamo nin epektibong pag-atubang na nakakapagkultibar nin interes, sige padagos na gamiton iyan! Ibagay sana iyan sa alok para sa presenteng bulan.