Arogon si Jehova Paagi sa Tunay na Pagmakolog sa Iba
1 Si Jehova an pinakadakulang halimbawa nin saro na nagpapaheling nin tunay na pagmakolog sa iba. (1 Ped. 5:7) Pinarigon ni Jesus an boot kan saiyang mga parasunod na ipaheling an mga kualidad kan saiyang Ama. (Mat. 5:45) Puede nindong arogon si Jehova paagi sa pagpaheling nin tunay na pagmakolog sa iba—na andam na ihiras an mensahe kan Kahadean sa gabos na nanonompongan nindo. Paagi sa pagigin pamilyar na gayo sa mga brochure na gagamiton sa ministeryo ngonyan na Hulyo, magigin angay kamo na itao an espirituwal na tabang sa iba. An minasunod na mga suhestion nagtatao nin nagkapirang ideya sa kun paano kamo makapag-aandam para sa enot na pagsongko dangan kultibaron an interes paagi sa napapanahon na mga pagdalaw liwat.
2 Kun iinaalok an brochure na “An Dios daw Talagang May Pagmakolog sa Sato?” puede nindong sabihon:
◼ “Napaghorophorop na daw nindo kun taano ta tinotogotan nin Dios na magsakit an mga tawo kun talagang may pagmakolog sia sainda? [Pasimbagon.] An brochure na ini bako sanang minasimbag kan hapot na ini kundi nagpapaheling man na nanuga an Dios na haleon an gabos na danyos na dinara nin tawo sa saiyang sadiri asin sa saiyang erokan na daga.” Basahon an parapo 23 sa pahina 27. Ipaheling an ilustrasyon sa ibaba kaiyan, asin basahon an Salmo 145:16 sa parapo 22. Ialok an brochure. Kun inako iyan, maghapot na sisimbagon sa masunod na pagsongko, siring baga kan: “Boot daw nindong maaraman kun paano nin Dios ootobon an saiyang katuyohan na bagohon an daga na magin sarong paraiso?”
3 Kun minabalik liwat sa mga napasakamotan kan brochure na “An Dios daw Talagang May Pagmakolog sa Sato?” puede nindong ponan an saro pang orolay nin siring kaini:
◼ “Kan nakaagi kong pagsongko, napag-olayan niato na an Dios tunay nanggad na may pagmakolog sa sato asin na katuyohan niang haleon an gabos na danyos na dinara nin tawo sa saiyang sadiri asin sa saiyang erokan na daga.” Buksan an brochure sa ilustrasyon na nasa pahina 2-3 asin sabihon: “Kan nakaagi naghapot kita, Paano nin Dios ootobon an saiyang katuyohan na bagohon an daga na magin sarong paraiso? Ano sa paghona nindo?” Pasimbagon. Buksan sa pahina 17, asin basahon an parapo 2 asin Daniel 2:44. Pakatapos kaiyan, basahon an parapo 12 sa pahina 18. Kun oyon an kagharong, pag-adalan kaiba nia an kabtang 9 kan brochure.
4 Uya an sarong pag-atubang na puedeng gamiton sa pag-alok kan brochure na “Kun Magadan an Sarong Namomotan.” Ipaheling an tutob kaiyan asin sabihon:
◼ “Ngonyan iinaalok niamo an brochure na ini na nagtao nin karangahan asin paglaom sa minilyon na tawo na nagadanan nin mga namomotan. Napag-isip-isip na daw nindo kun ano an paglaom para sa mga gadan? [Pasimbagon.] Malinaw na sinasabi kan Biblia an panuga nin Dios na pagkabuhay liwat.” Basahon an Juan 5:28, 29. Buksan an brochure asin komentohan an ultimong parapo sa pahina 28 asin an enot na parapo sa pahina 31. Puede nindong andamon an dalan para sa pagdalaw liwat paagi sa paghapot, “Paano kita makasisierto na pag-abot nin panahon an kagadanan lubos nang hahaleon?”
5 Kun nakapasakamot kamo nin brochure na “Kun Magadan an Sarong Namomotan,” tibaad boot nindong gamiton an pag-atubang na ini sa pagdalaw liwat:
◼ “Kan enot kitang mag-olay, napag-olayan niato an makangangalas na paglaom na pagkabuhay liwat. An brochure na iwinalat ko saindo nagpapaliwanag kun taano kita ta makasisierto na pag-abot nin panahon an kagadanan lubos nang hahaleon. Dai daw nindo nanompongan na an mga panuga nin Dios nakararanga asin nakapakokosog sa boot?” Pasimbagon. Dangan buksan sa pahina 31 kan brochure, asin basahon an ikaduwa asin ikatolong parapo, kaiba kan Kapahayagan 21:1-4. Depende sa ipinaheling na interes, puede kamong mag-alok nin pag-adal sa Biblia sa librong Kaaraman o maghapot nin saro pa tangani na mabuksan an masunod na pagdalaw liwat.
6 Puede nindong sabihon an minasunod kun iinaatubang an brochure na “What Is the Purpose of Life—How Can You Find It?”:
◼ “Dakol na tawo an naghorophorop kun ano talaga an katuyohan nin buhay. Hinapot ninda an saindang sadiri: ‘Taano ta yaon ako digdi? Ano an nakatagama sa sako sa ngapit?’ Saen sa paghona nindo makukua niato an mga simbag? [Pasimbagon.] Mangnoha an sinasabi kan Biblia. [Basahon an Salmo 36:9.] Bako daw na an Kaglalang nin tawo an pinakakualipikadong magpaliwanag kun taano kita ta yaon digdi? [Pasimbagon.] Ipinaheheling kan brochure na ini an dakulang katuyohan na itinagama nin Dios para sa sato.” Buksan sa pahina 20-1, basahon an kapsion, asin komentohan an ilustrasyon; dangan ialok an brochure. Kun akoon, hapoton: “Paano kita makaseseguro na katuyohan pa man giraray nin Dios para sa mga tawo na mabuhay sagkod lamang sa Paraiso digdi sa daga?” Mag-iskedyul nin panahon na dumalaw liwat.
7 Kun ikinapasakamot an brochure na “What Is the Purpose of Life—How Can You Find It?”, puede nindong sabihon an arog kaini sa pagdalaw liwat nindo:
◼ “Kan nakaagi kong pagsongko, naogma talaga ako sa pakipag-olay sa saindo na an buhay nin tawo talagang igwa nin katuyohan.” Ipaheling an ilustrasyon sa pahina 31 asin hapoton, “Paano kita makaseseguro na katuyohan pa man giraray nin Dios na an mga tawo mabuhay sagkod lamang sa Paraiso digdi sa daga?” Basahon an parapo 3 sa pahina 20. Ipakipag-olay an mga punto sa irarom kan subtemang, “Still God’s Purpose,” sa pahina 21. Helingon an likod na tutob kan brochure, asin basahon an alok na daing bayad na pag-adal sa Biblia sa harong. Alokon na idemonstrar an pag-adal sa librong Kaaraman.
8 An satong ministeryo maninigong magpabanaag kan sinserong interes niato sa pagtabang sa mga sadiosan an puso na “makaabot sa tamang kaaraman kan katotoohan.” (1 Tim. 2:4) Kun siring, magkaigwa nin panahon na dumalaw liwat sa kada tawo na napasakamotan nindo nin brochure. An saindong pagpaheling nin tunay na pagmakolog sa sainda puedeng magresulta sa pagtabang sa mga nag-aaragagha asin nag-aaragrangay huli sa makababaldeng mga bagay na ginigibo sa falsong relihion na magin kabilang para sa kaligtasan. (Ezeq. 9:4, 6) Maeeksperyensiahan man nindo an pagkakontento na minagikan sa pag-arog ki Jehova paagi sa tunay na pagmakolog sa iba.—Ikomparar an Filipos 2:20.