Gumamit nin Manlaenlaen na Brochure sa Saindong Ministeryo
1 Interesado an mga tawo ngonyan sa manlaenlaen na tema. Mantang kamo nakikikabtang sa paglilingkod sa langtad durante kan Hulyo, puede kamong magdara nin nagkapirang laen-laen na brochure, na espisipikong ginagamit an saro na nakadadagka sa mga tawo sa teritoryo. Tibaad mawot nindong probaran an saro sa mga pag-atubang na ini:
2 Sa pag-alok kan brochure na “The Government That Will Bring Paradise,” puede nindong ihapot:
◼ “Ano sa paghona nindo an magigin kamugtakan kan kinaban kun an Dios an solamenteng namamahala? [Pasimbagon.] Iyan an mismong hinahagad niato kun kita namimibi kan pamibing Ama Niamo. [Buksan sa pahina 3, asin basahon an enot na parapo, na kinokotar an Mateo 6:10.] Kun mawot nindong mabuhay sa kinaban na arog kaiyan, maninigong basahon nindo an brochure na ini.” Ialok na iwawalat iyan.
3 An “Kun Magadan an Sarong Namomotan” puedeng itampok sa paaging ini:
◼ “Sa paghona nindo maabot pa daw an panahon na mayo na sa satong mawawaran nin sarong namomotan sa kagadanan? [Pasimbagon.] Minilyon an rinanga na kan brochure na ini paagi sa panuga kan Biblia na an siring na panahon madali nang umabot. [Buksan sa pahina 5, asin basahon an ikaapat na parapo, kabale an 1 Corinto 15:21, 22. Dangan buksan an ilustrasyon sa pahina 30.] Ipinaheheling digdi an kagayagayahan na puedeng maeksperyensiahan niato sa pagsabat sa satong nagadan nang mga namomotan sa pagkabuhay liwat. Alagad saen iyan mangyayari? Ipaheheling saindo kan brochure na ini an simbag kan Biblia.” Kun akoon an brochure, puede nindong idagdag: “Gusto kong dumalaw liwat asin ipakipag-olay nin orog pa an temang ini.”
4 Puede nindong itampok an brochure na “Uya! Ginigibo Kong Bago an Gabos na Bagay,” na ginagamit an direktang paaging ini sa pagpopoon nin pag-adal sa Biblia:
◼ “Hinahapot ko an sakong kataraed kun igwa sindang mga hapot manongod sa Biblia. Nakalista sa publikasyon na ini an nagkapirang hapot na pinalataw. [Darahon an atension sa pahina 30.] An huring hapot na ini nakapukaw sa interes kan dakol: ‘Paano kamo makapag-aandam para sa buhay na daing katapusan sa Paraiso?’” Ipakipag-olay an parapo 57-8 sa pahina 29-30 asin basahon an Kapahayagan 21:3, 4. Ialok an brochure asin iareglo an pagdalaw liwat tanganing ipakipag-olay an nagkapirang iba pang hapot.
5 Tibaad mawot nindong probaran an simpleng pag-atubang na ini sa brochure na “The Divine Name That Will Endure Forever”:
◼ “An saro sa mga enot na nanodan ko sa Biblia iyo an ngaran nin Dios. Aram daw nindo kun ano iyan? [Pasimbagon.] Yaon iyan digdi sa Biblia sa Salmo 83:18. [Basahon.] Ipinaheheling kan brochure na ini kun paano an ngaran nin Dios, na Jehova, minalataw sa dakol na laen-laen na lenguahe. [Ipaheling an kahon sa pahina 8.] Kun mawot nindong makanood nin orog pa manongod ki Jehova asin sa saiyang mga katuyohan, maninigong basahon nindo an brochure na ini.” labot an brochure sa kagharong.
6 Mantang may magagamit kitang manlaenlaen na marahay na brochure, tunay na sinangkapan nanggad kita na “magsabi kan maogmang bareta sa mga mahoyo.”—Isa.61:1.