Kun Paano Gagamiton an Brosyur na Maogmang Bareta Hale sa Dios!
Bagong Brosyur na Dinisenyo Para Makatabang sa Sato sa Pagdalaw Liwat Asin Pagpuon nin Pag-adal sa Bibliya
1. Sa “Ingatan an Saimong Puso!” na Pandistritong Kumbensiyon, anong bagong brosyur an ilinuwas na dinisenyo para makatabang sa sato sa pagdalaw liwat asin pagpuon nin pag-adal sa Bibliya?
1 Durante kan “Ingatan an Saimong Puso!” na Pandistritong Kumbensiyon, naugma kitang akuon an bagong brosyur na makakatabang sa sato sa pagdalaw liwat asin pagpuon nin pag-adal sa Bibliya. An Maogmang Bareta Hale sa Dios! kapareho kan sinalidahan kaiyan na brosyur na Kahagadan, huli ta halipot an mga leksiyon kaiyan. Kaya epektibo ta ining magagamit sa pag-adal sa Bibliya sa may pinto nin harong. Minsan siring, kun an tinutukar kan brosyur na Kahagadan mga kahagadan sa Kristiyano, na nasasakitan an bagong mga tinutukduan sa Bibliya na akuon, an bagong brosyur na ini nakakonsentrar sa maugmang bareta na nasa Bibliya.—Gui. 15:35.
2. Taano ta ginibo an brosyur na Maogmang Bareta?
2 Taano ta ginibo iyan? Naghahagad an mga tugang sa bilog na kinaban nin simpleng publikasyon na makakaakit sa mga tawo sa katotoohan asin magigin paagi na ikabalyo an pag-adal sa librong Itinotokdo kan Biblia, an satong panginot na pantabang sa pag-adal sa Bibliya. An mga tawong habong magbasa nin libro parating mas gustong mag-adal kan Bibliya gamit an sarong brosyur. Dugang pa, mas pasil ining itradusir sa dakul na lengguwahe.
3. Paano naiiba an brosyur na ini sa mga publikasyon na ginagamit sa pag-adal sa Bibliya?
3 Kun Paano Iyan Dinisenyo: Isinurat an dakul sa satong mga publikasyon na ginagamit sa pag-adal sa Bibliya tanganing an katotoohan mabasa asin masabutan nin saro, dawa dai nin nagtatabang. Naiiba an publikasyon na ini. Isinurat ini bilang giya para sa pag-adal sa Bibliya na may paratukdo. Kun siring, kun iinaalok ini, an pinakamarahay iyo na pag-ulayan an saro o duwang parapo. Haralipot sana an parapo, kaya puwede iyan pag-ulayan dawa sa may pinto nin harong o sa pinagtatrabahuhan. Minsan ngani marahay na magpuon sa leksiyon 1, puwede kitang magpuon nin pag-adal sa arin man na leksiyon kan brosyur.
4. Paano kita matatabangan kan brosyur na direktang magtukdo gikan sa Bibliya?
4 Sa dakul na publikasyon ta, an simbag sa inimprentang mga hapot yaon sa parapo. Minsan siring, sa publikasyon na ini, an simbag prinsipalmenteng yaon sa Bibliya. An kadaklan na tawo gustong makanuod sa Bibliya imbes na sa literatura niyato. Kaya, haros mayong kinotar na sitadong mga teksto. Dapat na basahon iyan sa Bibliya. Matatabangan kaini an mga tinutukduan sa Bibliya na marealisar na gikan sa Diyos an nanunudan ninda.—Isa. 54:13.
5. Taano ta mahalaga na an paratukdo mag-andam na marhay para sa kada pag-adal?
5 Dai ipinapaliwanag kan brosyur an gabos na teksto. Taano? Dinisenyo iyan para enkaminaron an tinutukduan sa Bibliya na maghapot asin magamit kan paratukdo an abilidad sa pagtutukdo. Kun siring, mahalaga na mag-andam na marhay para sa kada pag-adal. Sarong pagirumdom: Bako kamo an magpaparataram. Gustuhon tang ipaliwanag an Kasuratan. Pero sa parati mas matatabangan ta an tinutukduan sa Bibliya kun siya an mapaliwanag kan naiisip niyang kahulugan kan teksto. Paagi sa paggamit nin mataktikang mga hapot, matatabangan ta siyang ipaliwanag an kahulugan kan kada teksto.—Gui. 17:2.
6. Paano ta gagamiton an brosyur: (a) sa mga nagdududa dapit sa Diyos asin sa Bibliya? (b) sa pagharong-harong? (c) sa direktang pag-alok nin pag-adal sa Bibliya? (d) sa pagdalaw liwat?
6 Arog kan ibang publikasyon na ginagamit sa pagkondukta nin pag-adal sa Bibliya, puwedeng ialok an brosyur na ini ano man na oras, ano man an alok para sa bulan. Dakul an mauugmang gamiton iyan paagi sa direktang pag-alok nin pag-adal sa Bibliya sa may pinto nin harong. Dugang pa, arog kan nasambit sa pandistritong kumbensiyon, an paggamit kaiyan sa pagdalaw liwat sa mga nagpahiling nin interes “talagang makakapaugma sa gibuhon na pagdalaw liwat!”—Hilingon an mga kahon sa pahina 5-7.
7. Paano kamo makakapagkondukta nin pag-adal sa Bibliya gamit an brosyur?
7 Kun Paano an Pagkondukta nin Pag-adal sa Bibliya: Puwede tang punan an pag-uulay paagi sa pagbasa kan may numerong hapot na naka-bold. Sunod, basahon an parapo asin an (mga) tekstong nakaitaliko. Gumamit nin mataktikang mga hapot para tabangan an kagharong na masabutan an kahulugan kan mga teksto. Dangan, bago bumalyo sa sunod na seksiyon, pasimbagon an kagharong sa hapot na naka-bold, tanganing masiyerto na nasabutan niya an pinag-adalan. Sa inot na pirang pagdalaw liwat, an pinakamarahay iyo na pag-ulayan an saro sana sa mga hapot na naka-bold. Pag-abot nin panahon, mapapalawig ta na an pag-uulay paagi sa pagtapos kan bilog na leksiyon.
8. Paano ta maninigong iintrodusir an mga teksto, asin taano?
8 An mga teksto na may nakalaag na “basahon” iyo an pinakadirektang minasimbag sa hapot na naka-bold. Kun iiniintrodusir an sarong teksto, likayan an pagsabing, “Si apostol Pablo nagsurat” o, “Hilinga an ihinula ni Jeremias.” Tibaad isipon kan kagharong na an satong binabasa tataramon sana nin mga tawo. Mas marahay na magsabing, “An Tataramon nin Diyos nagsasabi” o, “Hilinga an ihinula kan Bibliya.”
9. Maninigo daw basahon an gabos na sitadong teksto durante kan pag-adal sa Bibliya?
9 Kaipuhan ta daw basahon an gabos na sitadong teksto o an mga teksto sanang may nakalaag na “basahon”? Depende iyan sa kamugtakan. Dai ilinaag an sitadong mga teksto tangani sanang ipahiling kun sain makukua sa Bibliya an puntong pinag-uulayan. An kada teksto may impormasyon na maninigong pag-ulayan. Pero may mga pagkakataon na kun an tinutukduan sa Bibliya kulang nin panahon, interes, o abilidad sa pagbasa, nagpaparisa iyan na an babasahon ta sana mga tekstong may nakalaag na “basahon.”
10. Nuarin ta ibabalyo an pag-adal sa librong Itinotokdo kan Biblia?
10 Kun Nuarin Ibabalyo sa Librong Itinotokdo kan Biblia: Pakalihis nin nagkapirang pag-uulay asin pag regular na an pag-adal sa Bibliya, puwede ta nang ibalyo sa librong Itinotokdo kan Biblia o magpadagos sa brosyur na Maogmang Bareta sagkod matapos iyan. An mga parahayag an madesisyon kun nuarin mabalyo diyan. Kun mabalyo na kita sa librong Itinotokdo kan Biblia, dapat daw na punan niyato sa kapinunan kaiyan? Mayo nin reglamento digdi. Magkakalain an lambang tawo. Minsan siring, makikinabang an kadaklan na tinutukduan sa Bibliya paagi sa mas detalyadong pag-adal giraray kan kaparehong mga tema sa librong Itinotokdo kan Biblia.
11. Taano ta maninigo tang gamiton na marhay an bagong brosyur na ini?
11 Sa kinaban na bihira an maugmang bareta, dakulaon an pribilehiyo tang ipahayag an pinakamarahay nanggad na bareta—na namamahala na an Kahadian nin Diyos asin dai na mahahaloy ipapaabot na kaiyan an bagong kinaban na magdadanay an katanusan! (Mat. 24:14; 2 Ped. 3:13) May kumpiyansa kita na dakul sa nagdadangog kan mensaheng iyan an mauyon sa ipinasabong na mga tataramon na ini: ‘Abaang gayon sa ibabaw kan kabukidan an mga bitis kan may darang maugmang bareta, kan nagbabalangibog kan katuninungan, kan nagdadara nin mga bareta nin karahayan, kan nagbabalangibog nin kaligtasan, kan nagsasabi sa Sion, “An Diyos mo naghahadi [na]!”’ (Isa. 52:7) Lugod na gamiton ta an bagong brosyur na ini sa pagpaabot kan maugmang bareta gikan sa Diyos sa mga napapaha na nasa satong teritoryo!
[Kahon sa pahina 5]
Sa mga Nagdududa Dapit sa Diyos Asin sa Bibliya:
● Sa nagkapirang lugar, naeksperyensiyahan nin mga parahayag na habong makipag-ulay an mga tawo pag nadadangog ninda an terminong “Diyos” asin “Bibliya.” Kaya sa inot na pakikipag-ulay, mas marahay na ipakipag-ulay an mga temang ikinakahadit nin dakul sa lugar nindo, arog kan pangangaipo para sa marahay na gobyerno, kun sain makakakua nin praktikal na tabang para sa pamilya, asin kun ano an mangyayari sa maabot na panahon. Puwede tang iintrodusir an brosyur na Maogmang Bareta pakalihis nin nagkapirang pag-uulay dapit sa kun paano niyato naaraman na may Diyos asin kun taano ta mapagtitiwalaan an Bibliya.
[Kahon sa pahina 6]
Kun Naghaharong-harong:
● “Nagdadalaw ako para ipahiling sa saindo na madalion sanang aramon an katuyuhan nin Diyos sa katawuhan sa maabot na panahon. Naisip-isip na daw nindo kun baga papaginhawahon kita nin Diyos sa kasakitan? [Pasimbagon.] Ipapahiling kan brosyur na ini kun sain sa Bibliya makukua nindo an simbag sa hapot na iyan. [Itao sa saiya an brosyur, asin basahon an inot na parapo sa leksiyon 1, saka an Jeremias 29:11.] Uyon digdi, bako daw na rasonable sanang isipon nindo na gusto nin Diyos na kita magkaigwa nin mas marahay na puturo? [Pasimbagon.] Kun gusto nindo, saindo na an kopyang ini. Sa sunod, puwede tang pag-ulayan an ikaduwang parapo para maaraman an simbag kan Bibliya sa hapot na ini, ‘Paano papaginhawahon nin Diyos an katawuhan hali sa mga kawsa nin kasakitan?’” Kun may panahon pa an kagharong sa inot na pakikipag-ulay, puwede nindong basahon asin pag-ulayan an ikaduwang parapo saka an tulong teksto diyan. Iareglo an pagdalaw liwat para pag-ulayan an ikaduwang hapot sa leksiyon na iyan.
● “Dakul an gustong mamibi, lalo na kun sinda may mga problema. Namimibi man daw kamo paminsan-minsan? [Pasimbagon.] Sa paghuna nindo, hinihinanyog daw nin Diyos an gabos na pamibi, o posible daw na may mga pamibi na dai nakakapaugma sa saiya? [Pasimbagon.] May brosyur ako digdi na nagpapahiling kun paano makukua an simbag kan Bibliya sa mga hapot na iyan. [Itao sa saiya an kopya, asin pag-ulayan an inot na parapo kan leksiyon 12 saka an mga teksto na may nakalaag na “basahon.”] Bako daw na marahayon na an Diyos andam na maghinanyog sa sato? Pero tanganing magin makahulugan an pamibi, kaipuhan tang mamidbid na marhay an Diyos. [Buksan an leksiyon 2 asin itukdo an mga subtema.] Kun gusto nindo, puwede kong iwalat sa saindo an brosyur na ini, asin sa sunod puwede tang basahon an simbag kan Bibliya sa interesanteng mga hapot na ini.”
● “Nagdigdi ako huli ta an mga tawo nahahadit sa kaaabtan kan kinaban na ini. Sa paghuna nindo, magigin marahay pa daw an mga kamugtakan? [Pasimbagon.] Dakul an nagngangalas pag naaaraman ninda na an Bibliya may maugmang bareta na makakatao sa sato nin paglaom. Uni an nagkapira sa mga hapot na sinisimbag kan Bibliya.” Itao sa saiya an brosyur asin papilion nin hapot, sa likod na cover, na pinakainteresante sa saiya. Dangan buksan an leksiyon, asin idemonstrar an pag-adal. Iareglo an pagdalaw liwat para pag-ulayan an sunod na hapot sa leksiyon na iyan.
[Kahon sa pahina 7]
Pagmaigutan an Direktang Pag-alok:
● “Nagdigdi ako para sabihon sa saindo an dapit sa bagong pamamaagi nin pag-adal sa Bibliya. An brosyur na ini may 15 leksiyon na nagpapahiling kun sain sa Bibliya makukua nindo an simbag sa mahahalagang marhay na hapot. [Ipahiling sa saiya an atubangan asin likod na cover kan brosyur.] Napurbaran na daw nindong sabuton an Bibliya? [Pasimbagon.] Ipapahiling ko sa saindo kun gurano kapasil an mga leksiyon. [Pag-ulayan an inot na parapo kan hapot 3 sa leksiyon 3, asin basahon an Kapahayagan 21:4, 5. Kun angay, pag-ulayan an sunod na parapo asin an mga teksto na may nakalaag na “basahon.”] Kun gusto nindo, puwede kong iwalat sa saindo an brosyur na ini. Irinerekomendar mi na purbaran nindong pag-adalan an Bibliya nin kisiyera sarong beses. Kun magustuhan nindo, puwede nindong ipadagos. Sa sunod, puwede tang pag-ulayan an inot na leksiyon. Hilinga ta sarong pahina sana ini.”
[Kahon sa pahina 7]
Iintrodusir Iyan sa Pagdalaw Liwat:
● “Nauugma akong mahiling giraray kamo. Dinarahan ko kamo kan brosyur na ini na nagtatao kan simbag kan Bibliya sa dakul na interesanteng hapot. [Itao sa saiya an brosyur, asin ipahiling an likod na cover.] Arin sa mga temang ini an pinakainteresante sa saindo? [Pasimbagon. Dangan buksan an leksiyon na napili niya.] Ipapahiling ko sa saindo kun paano gagamiton an brosyur na ini para makua an simbag kan Bibliya.” Idemonstrar an pag-adal paagi sa pag-uulay sa saro o duwang parapo asin sa mga teksto na may nakalaag na “basahon.” Nakapuon na kamo nin pag-adal sa Bibliya! Iwalat an brosyur sa kagharong, asin iareglo an pagdalaw liwat. Pag tapos na an leksiyon, puwede nindong pag-ulayan an saro pang leksiyon na napili kan kagharong o magpuon sa kapinunan kan brosyur.