Ibalangibog an Maogmang Bareta kan Kahadean na Dara an mga Brochure
1 Abaa kagayagayang manodan an katotoohan asin magin kabilang sa mga maigot na nagbabalangibog kan maogmang bareta! An mga tawo sa luwas kan organisasyon nin Dios nangangaipong gayo na makadangog kan maogmang bareta nin Kahadean. An katotoohan kan Kahadean ipinaliliwanag nin simple sa mga brochure na Enjoy Life on Earth Forever!, “Uya! Ginigibo Kong Bago an Gabos na Bagay,” asin The Government That Will Bring Paradise. Malinaw na ilinaladawan kaiyan an buhay digdi sa daga na sakop kan Kahadean nin Dios, asin ginigiyahan kaiyan an parabasa pasiring sa mga hula manongod sa Kahadean na nasa Tataramon nin Dios. Siempre, an pakapasakamot nin brochure sa interesadong tawo kapinonan sana kan satong gibohon. (1 Cor. 9:23) Tolos-tolos niatong balikan an gabos na napasakamotan, na may katuyohan na alokon nin pag-adal sa librong Kaaraman na Minagiya Pasiring sa Buhay na Daing Katapusan. Paano niato ini magigibo ngonyan na Agosto?
2 An brochure na “Enjoy Life on Earth Forever!” puedeng ialok paagi sa halipoton na pag-atubang. Mantang ipinaheheling nindo an tutob kaiyan, puede nindong sabihon:
◼ “Boot kong ipaheling sa saindo an sarong bagay na igwa nin magayon na mensahe.” Buksan an brochure na Life on Earth, asin basahon an enot na parapo kan introduksion. Dangan magpadagos: “Sinisimbag man kaiyan an hapot na ini [buksan sa tema na nasa itaas kan retrato numero 8]: ‘Taano ta nagagadan an tawo?’ Manonompongan nindong interesanteng pag-adalan an mga retrato asin basahon an mga teksto sa brochure na ini. Saindo na an kopyang ini sa dikit na kontribusyon.”
3 Ano an sasabihon nindo kun dinadalaw liwat an napasakamotan nin brochure na “Life on Earth”? Puede nindong probaran an pag-atubang na ini:
◼ Ipaheling an retrato numero 49 sa brochure na Life on Earth asin hapoton, “Bako daw na magayon na retrato ini? [Pasimbagon.] Yaon iyan sa brochure na iwinalat ko sa saindo kan nakaaging pagsongko. Boot kong ihapot sa saindo an nasa masunod na pahina.” Buksan sa retrato numero 50 asin basahon an hapot: “‘Boot daw nindong mabuhay sagkod lamang sa magayon na paraisong iyan?’ [Pasimbagon.] Kun iyan an minamawot nindo, mangnoha an sinasabi kaiyan na maninigo nindong gibohon: ‘Dangan makanood nin dakol pa dapit sa sinasabi nin Dios.’ [Basahon an Juan 17:3.] Maoogma akong ipakipag-adal sa saindo an Biblia na mayo nin bayad. Gusto daw nindo kaiyan?” Gumibo nin depinidong pag-oolay na madalaw liwat.
4 Kun iinaalok an brochure na “Uya! Ginigibo Kong Bago an Gabos na Bagay,” puede kamong magpoon paagi sa pagpaheling kan bilog na retrato sa tutob asin hapoton:
◼ “Ano sa paghona nindo an kaipuhan tangani na magin arog kaini an bilog na daga?” Pasimbagon. Dangan sabihon: “Kadaklan na tawo naghohona na imposibleng gumibo nin sarong kinaban na arog kaini. Alagad bako iyan imposible para sa Dios na gibohon. [Gamiton an mga punto sa parapo 43; dangan basahon an Isaias 9:6, 7.] Nanuga an Dios na magpangyari nin sarong bagong kinaban na dian an mga tawo gikan sa gabos na nasyon magkakamit nin sarong magayon na paraiso. Ipinaheheling kan brochure na ini kun paano kamo asin an saindong pamilya magkakamit nin sarong makangangalas na ngapit.” Ialok iyan asin iareglong madalaw liwat.
5 Sa pagdalaw liwat, puede nindong gamiton an brochure na “Uya!” tangani na ipaliwanag kun taano ta kaipuhan na dakol pang manodan dapit sa Biblia. Puedeng ipaheling giraray an tutob asin sabihon:
◼ “Kan enot kong ipaheling sa saindo an retratong ini, uminoyon kita na maoogma kitang mabuhay sa siring kagayon na kinaban. Tangani na magin posible ini, kita gabos igwang dapat gibohon.” Buksan an brochure na “Uya!” sa parapo 52; basahon an parapo asin an teksto sa Juan 17:3. Helingon an ilustrasyon sa parapo 53 manongod sa tamang edukasyon sa Biblia, dangan ipaliwanag na nag-aalok an Mga Saksi ni Jehova nin siring na pagtotokdo na mayo nin bayad. Alokon na idemonstrar an satong paagi nin pag-adal, na ginagamit an librong Kaaraman.
6 Kun iinaalok an brochure na “The Government That Will Bring Paradise,” puede nindong probaran na sabihon ini:
◼ “Nadangog ko an dakol na tawo na nagsasabi na boot nindang mabuhay na sakop nin sarong gobyerno na talagang makareresolber kan mga problema na inaatubang niato ngonyan. [Sambiton an lokal na mga problema siring baga kan kadaihan nin trabaho, nagdadakol na krimen, o pag-abuso sa droga.] An mga bagay na ini pinamamate kita na bakong segurado manongod sa ngapit niato mismo asin kan satong mga namomotan. Sa paghona daw nindo magkakaigwa pa nin sarong gobyerno na maresolber kan mga problemang ini? [Pasimbagon.] Puedeng namimibi kamo kan Pamibi kan Kagurangnan. Kun iyo, aram daw nindo na an totoo namimibi kamo para sa sarong matanos na gobyerno?” Buksan sa pahina 3 kan brochure na Government, asin basahon an enot na duwang parapo. Ialok an brochure.
7 Kun nakapasakamot kan brochure na “The Government That Will Bring Paradise,” puede nindong ponan an pag-orolay sa pagdalaw liwat paagi sa pagsabi:
◼ “Kan nakaagi napag-olayan niato an pangangaipo para sa sarong matanos na gobyerno na makareresolber sa mga problema nin tawo. An brochure na iwinalat ko sa saindo itinotokdo an Kahadean nin Dios bilang satong solamenteng paglaom. May mga naghohorophorop kun ano an magigibo kan gobyernong iyan tangani na paoswagon an satong kamugtakan sa buhay. Ipinaheheling kan Biblia na napatunayan na ni Cristo na magigin mapanggana sia kun saen nasudya an mga tawong namomoon.” Buksan an brochure na Government sa pahina 29, asin basahon an huring apat na parapo. Dangan sabihon: “Bako daw na iyan magayon na ngapit? Boot daw nindong maheling iyan?” Pasimbagon. Basahon an Juan 17:3. Parigonon an boot na orog pang makanood paagi sa pag-adal sa Biblia sa harong.
8 Kun ginagamit nindo an iba pang brochure, puede nindong andamon an sadiri nindong mga pag-atubang, na ginagamit an isinuherir sa enotan bilang mga arogan. Mag-andam na marhay asin hagadon an bendisyon ni Jehova mantang ibinabalangibog nindo an maogmang bareta kan Kahadean.