Lumakaw Paagi sa Pagtubod
1 An minilyon na tawo isinesentro an saindang buhay sa materyal na mga rogaring, na may kamangmangan na nagtitiwala sa mapandayang kapangyarihan nin kayamanan. (Mat. 13:22) Dinadagka kita na padagos na mamuhay nin mas madonong, na naghihingoa para sa espirituwal na kayamanan. (Mat. 6:19, 20) Ini nangangahulogan nin ‘paglakaw paagi sa pagtubod.’—2 Cor. 5:7.
2 An tataramon sa Griego na “pagtubod” nagpapaabot kan ideya nin kompiansa, tiwala, marigon na pagkakombensido. An paglakaw paagi sa pagtubod nangangahulogan na atubangon an masakit na mga kamugtakan na may kompiansa sa Dios, na nagtitiwala sa saiyang abilidad na giyahan an satong mga lakad. Nagtao si Jesus nin sangkap na halimbawa; danay na isinentro nia an atension sa kun ano talaga an importante. (Heb. 12:2) Kaagid kaiyan, kaipuhan niatong padagos na isentro an satong puso sa dai naheheling, espirituwal na mga bagay.—2 Cor. 4:18.
3 Dapat man kitang marigon na kombensido na pinangengenotan ni Jehova an saiyang naheheling na organisasyon sa paggiya kan “fiel asin madonong na oripon.” (Mat. 24:45-47) Ipinaheheling niato an satong pagtubod kun kita “makinuyog duman sa mga nangengenot” sa kongregasyon. (Heb. 13:17) An mapakumbabang pakikokooperar sa teokratikong areglo nagpapaheling kan satong pagtitiwala ki Jehova. (1 Ped. 5:6) Maninigo kitang magtao nin bilog na pusong pagsuportar sa trabahong itinao sa organisasyon tangani na gibohon. Orog kitang irarani kaini sa satong mga tugang sa makosog na bogkos nin pagkamoot asin pagkasararo.—1 Cor. 1:10.
4 Kun Paano Maparirigon an Pagtubod: Dai niato dapat pagtogotan an satong pagtubod na magin dai naghihiro. Kaipuhan kitang maigot na makipaglaban na parigonon iyan. An pagigin regular sa pag-adal, pamimibi, asin pag-atender sa pagtiripon matabang sa sato na maparigon an satong pagtubod tangani na, sa tabang ni Jehova, malabanan kaiyan an ano man na pagbalo. (Efe. 6:16) Nakaestablisar na daw kamo nin sarong marahay na rutina para sa aroaldaw na pagbasa sa Biblia asin pag-andam para sa mga pagtiripon? Parate daw kamong naghohorophorop sa saindong nanonodan, asin minarani daw kamo ki Jehova paagi sa pamibi? Ugale daw nindong umatender sa gabos na pagtiripon asin magpartisipar sa mga iyan?—Heb. 10:23-25.
5 An marigon na pagtubod napatutunayan paagi sa marahay na mga gibo. (Sant. 2:26) Naghahanap daw kamo nin mga oportunidad na ikahiras an maogmang bareta? Puede daw liwaton an saindong mga kamugtakan na magpapangyari sa saindo na makagibo nin mas dakol sa ministeryo? Iinaaplikar daw nindo an mga suhestion na inaako niato tangani na mapaoswag an kualidad asin pagigin epektibo kan satong ministeryo?
6 Nagpatanid si Jesus dapit sa pagigin sobra kasibot sa aroaldaw na mga aktibidad sa buhay asin pagtogot sa materyalistiko o paslong mga interes na magpadiklom sa satong espirituwal na pagmansay. (Luc. 21:34-36) Dapat na papagdanayon niato an estriktong pag-iingat kun paano kita naglalakaw tangani na malikayan an pagkalunod mapadapit sa satong pagtubod. (Efe. 5:15; 1 Tim. 1:19) Kita gabos naglalaom na sa katapustapusi makapahahayag kita na kita ‘nakipaglaban kan marahay na pakilaban, natapos an paorumbasan, asin naingatan an pagtubod.’—2 Tim. 4:7.