Magin Halimbawa sa Pagtaram Asin sa Paggawe
1 Sinadol na marhay ni apostol Pablo si Timoteo na magin halimbawa sa pagtaram asin sa paggawe. (1 Tim. 4:12) Maninigo man kitang magpaheling nin arogan sa pagtaram asin paggawe, nangorogna kun nakikikabtang sa ministeryo, huli ta sa paggibo kaiyan puedeng madeterminaran kun baga natataros niato o dai an puso kan mga nanonompongan niato.
2 Kaipuhan niatong ipaheling an gabos na aspekto nin marahay na ugale, kabale an kortesiya, konsiderasyon, kabootan, asin pagkamataktika. An marahay na ugale sa ministeryo puedeng ikomparar sa mga pantimpla sa satong kakanon. Kun mayo kan mga iyan, an masustansiang kakanon puedeng magin matabang asin dai nakapagpapagana. An dai pakapaheling nin marahay na ugale puedeng magkaigwa nin kaagid na epekto.—Col. 4:6.
3 Magin Halimbawa sa Pagtaram: An makikatood na huyom asin mainit na pagtaratara mahalagang marhay kun iinaatubang an maogmang bareta. Kun tinitimplahan niato an satong introduksion nin init asin sinseridad, tinotogotan niato an kagharong na maaraman na kita tunay na interesado sa saiya. Kun sia nagtataram, maghinanyog nin maingat asin igalang an saiyang opinyon. Kun kamo nagtataram, gibohon iyan na may pagkamataktika asin kabootan.—Ikomparar an Gibo 6:8.
4 Sa panapanahon nakanonompong kita nin indibiduwal na tibaad bakong makikatood, antipatiko pa ngani. Ano an maninigo niatong magin reaksion? Dinagka kita ni Pedro na magtaram na may “mahoyong boot asin hararom na paggalang.” (1 Ped. 3:15; Roma 12:17, 18) Nagsabi si Jesus na kun sinasayumahan nin kagharong an mensahe kan Kahadean, maninigo sana niatong ‘pagpagon an kabokabo sa satong mga bitis.’ (Mat. 10:14) An satong arogan na ugale sa siring na mga kamugtakan tibaad pag-abot nin panahon makapalumoy sa puso kan nagkokontra.
5 Magin Halimbawa sa Paggawe: An paghuhulit kan maogmang bareta sa sibot na mga tinampo asin sa pampublikong mga lugar naghahagad na kita magin makonsiderasyon, nungkang maribok o mapamirit, asin na dai kita nakaoolang sa mga minaagi. Kun nasa harong nin interesadong mga tawo, dapat kitang gumawe bilang maboot na mga bisita. An mga aki na kaibanan niato dapat na magpaheling nin paggalang sa kagharong asin sa saiyang rogaring asin maninigong maghinanyog kun kita nakikipag-olay. Kun makaraw an mga aki, magwawalat ini nin bakong marahay na impresyon.—Tal. 29:15.
6 An satong personal na itsura maninigo na magpaheling sa iba na kita mga ministro kan Tataramon nin Dios. Sa satong paggubing asin pag-alinyar, maninigo na kita dai magin bagla asin gunos ni mapagpasikat asin labi-labi kapusturado. Maninigo na an satong itsura perming magin “angay sa maogmang bareta.” (Ikomparar an Filipos 1:27.) Paagi sa paggibo kaini, dai niato tatawan nin singkogan an iba o makuanan nin sala an satong ministeryo. (2 Cor. 6:3, 4) An satong arogan na pagtaram asin paggawe nakadadagdag nin nakaaakit na kualidad sa mensahe kan Kahadean, na nagtataong onra ki Jehova.—1 Ped. 2:12.