Marahay na Ugale—Sarong Karakteristiko nin Diosnon na mga Tawo
1 Bihira an marahay na ugale ngonyan. Taano ta siring? Naghihidaling marhay an mga tawo kaya tibaad bihira na nindang maisip an pundamental na mga kortesiya, siring baga nin pagsabing “Tabi,” “Mabalos,” o “Makitabi ako.” Sa pankagabsan, an kadaihan nin pagmaan asin kadaihan nin konsiderasyon garo baga nangingibabaw sa sosyedad nin tawo. Ihinula kan Tataramon nin Dios an naggagrabeng ugale sa huring mga aldaw kan iyan magsabi na an mga tawo magigin ‘mga mamomoton sa sainda man sana, mga nagpapasikat sa sadiri, mga maabhaw, mga daing utang na boot, mga dai nin natural na kapadangatan, mga mayong pagpopogol sa sadiri, mga mayong pagkamoot sa karahayan, asin mga matagas an payo.’ (2 Tim. 3:1-4) An gabos na siring na karakteristiko nagbubunga nin maraot na ugale. Bilang diosnon na mga tawo, dapat na magmaan an mga Kristiano tangani na dai maarog an kadaihan nin paggalang kan kinaban na ini sa iba.
2 Ano an Ugale? An marahay na ugale masasabi na iyo an alistong pagigin mapagrisa sa mga saboot nin iba, an abilidad na mamuhay nin matoninong sa kaibanan nin iba. An mga aspekto nin marahay na ugale iyo an pagkamakonsiderasyon, pagigin may kortesiya, kabootan, pagigin magalang, pagkamataktika, asin pagigin maginirumdom. An mga karakteristikong ini naggigikan sa pagkamoot sa Dios asin sa kapwa. (Luc. 10:27) Iyan mayong gastos, alagad iyan mahalagang marhay sa pagpaoswag kan satong relasyon sa iba.
3 Itinao ni Jesu-Cristo an sangkap na halimbawa. Sinunod nia an diosnon na mga pamantayan. Ni sarong beses dai sia nasala sa saiyang ugale. Pirme niang ginigibo an Bulawan na Reglamento sa Paggawe: “Kun ano an boot nindong gibohon saindo nin mga tawo, iyo man an gibohon nindo sainda.” (Luc. 6:31) Dai daw kita napapangalas sa pagigin maginirumdom asin sa mamomoton na paagi ni Jesus sa pagtratar sa saiyang mga disipulo? (Mat. 11:28-30) An marahay na ugale nia dai naggikan sa mga reglamento na ibinugtak sa mga libro nin mga reglamento sa marahay na ugale. Iyan naggikan sa sarong sinsero asin matinaong puso. Kinultibar ni Jesus an marahay na ugale poon pa sa saiyang pagkaaki asin paagi sa pag-aplikar sa diosnon na mga prinsipyo. Dapat na hingoahon niato na arogon an saiyang marahay na halimbawa.
4 Noarin kaipuhan nin mga Kristiano an marhay na ugale? Sa espesyal daw na mga okasyon sana, kun gustong magkaigwa nin marahay na impresyon? Iyan daw kaipuhan sana kun pinagmamaigotan na impluwensiahan an iba? Dai! Kaipuhan niatong ipaheling an marahay na ugale sa gabos na panahon. Sa anong partikular na mga paagi niato maninigong isaisip ini sa satong pakikiasosyar sa lambang saro sa kongregasyon?
5 Sa Kingdom Hall: An Kingdom Hall iyo an satong lugar nin pagsamba. Yaon kita duman huli sa imbitasyon ni Jehova Dios. Sa sentidong iyan, kita mga bisita. (Sal. 15:1) Kita daw arogan na mga bisita kun kita nagduduman sa Kingdom Hall? Tinatawan daw niato nin tamang atension an satong gubing asin pag-alinyar? Daing duwa-duwa na maninigo niatong booton na likayan an samno na impormal o sobra. Baga man nag-aatender sa mga kombension o sa satong semanal na mga pagtiripon kan kongregasyon, midbid an banwaan ni Jehova sa saindang marahay na itsura na angay sa mga naghihingako na nagtataong reberensia sa Dios. (1 Tim. 2:9, 10) Sa siring ipinaheheling niato an nanonongod na konsiderasyon asin paggalang sa satong langitnon na Kag-imbitar sagkod sa iba pang mga bisita na inimbitaran.
6 An saro pang paagi na ikapaheheling niato an marahay na ugale may koneksion sa mga pagtiripon iyo an pagigin nasa oras. Totoo, ini bako pirmeng pasil. An iba tibaad medyo harayo an istaran o tibaad may darakulang pamilya na aandamon. An saindang paghihingoa na regular na umatender sa Kristianong mga pagtiripon talagang kaomaw-omaw. Minsan siring, nariparo sa nagkapirang kongregasyon na sagkod sa 25 porsiento kan mga parahayag an ugale nang mag-abot pakatapos kan pambukas na kanta asin pamibi. Ini seryosong bagay. Marahay na girumdomon na an ugale may koneksion sa satong pagigin mapagrisa sa mga saboot nin iba. Si Jehova, an satong maugayon na Kag-imbitar, an nag-areglo kan espirituwal na mga bangketeng ini para sa satong kapakinabangan. Ipinaheheling niato an satong pagpahalaga asin pagmalasakit sa saiyang mga saboot paagi sa pagigin nasa oras. Saro pa, an pag-abot nin huri sa mga pagtiripon nakadidisturbo asin nagpapaheling nin dai paggalang sa mga naghihinanyog na.
7 Kun kita nagtitiripon, rinirisa daw niato an mga bagohan na nag-atender? An maogmang pag-ako sa sainda kabtang nin marahay na ugale. (Mat. 5:47; Roma 15:7) An magalang na pagtaratara, mainit na pag-abrasa, maboot na huyom—gabos saradit na bagay, alagad iyan nakadadagdag sa midbidan sa sato bilang tunay na mga Kristiano. (Juan 13:35) Pakaduman sa sarong Kingdom Hall sa kaenot-enote, an sarong lalaki nagsabi: “Mas dakol akong nakamidbid na tunay na mamomoton na mga tawo, biyong mga dai kamidbid, sa laog nin saro sanang aldaw kisa nakamidbid ko sa iglesia na dinakulaan ko. Malinaw na nanompongan ko na an katotoohan.” Bilang resulta, binago nia an saiyang pamumuhay, asin pakalihis nin pitong bulan sia nabautismohan. Iyo, an marahay na ugale puedeng magkaigwa nin halawig na mga epekto!
8 Dai paglingawan an mga gurang na asin maluya an hawak na nasa tahaw niato. Kun marahay an ugale niato sa mga dai kamidbid na nanonompongan niato, bako daw na maninigo na magin siring man kita “orog na sa mga may relasyon sa sato sa pagtubod”? (Gal. 6:10) Aplikado an prinsipyo: “Magtao ka nin konsiderasyon sa persona nin gurang.” (Lev. 19:32) An mga siring maninigo na dai noarin man paglingawan sa satong mga pagtiripon.
9 Pagtao nin Maingat na Atension: An marahay na ugale nagkakaipo na kita maghinanyog nin atento kun itinatao an espirituwal na pagtotokdo. Durante kan mga pagtiripon kan kongregasyon, an Kristianong mga ministro nin Dios nagtataram tangani na magtao nin espirituwal na balaog sa pagparigon sa sato. (Roma 1:11) Tunay nanggad na magpapaheling nin bako nanggad na marahay na ugale kun kita napapatorog, maribok na nagngungutanguta nin gum, paorootrong naghihinghing sa kataed niato, nagpaparaduman sa kasilyasan na dai man kaipuhan, nagbabasa nin materyal na mayong koneksion, o nag-aasikaso nin iba pang bagay durante kan pagtiripon. Maninigong magin arogan sa bagay na ini an kamagurangan. An marahay na Kristianong ugale pahihiroon kita na magpaheling nin tamang paggalang sa ispiker asin sa saiyang basado sa Bibliang mensahe paagi sa pagtao sa saiya kan satong dai nababangang atension.
10 Saro pa, bilang konsiderasyon sa ispiker sagkod sa mga nagdadangog, maninigo na dai niato pagtogotan an mga electronic pager asin cellular telephone na makadisturbo sa satong mga pagtiripon.
11 Ugale Asin mga Aki: Maninigo na an mga magurang pirmeng listo sa gawe-gawe kan saindang mga aki sa Kingdom Hall. Kun may aking maghibi o magin marawraw durante kan pagtiripon asin ini nakadidisturbo na sa iba, marahay na iluwas tolos sa tiriponan an aki tangani na paalohon sia. Ini tibaad depisil kun beses, alagad girumdomon, ini nagpapaheling na kamo mapagmato sa mga saboot nin iba. An mga magurang na may sadit na mga aki na posibleng magin marawraw parateng pinipili an pagtukaw sa likod kan tiriponan tangani na pira sana an madisturbo kun kaipuhan na sinda tumindog durante kan pagtiripon. Siempre, an iba sa mga nag-aatender makapaheheling nin nanonongod na konsiderasyon para sa mga pamilya paagi sa pagbakante sa mga raya nin tukawan sa likod para magamit ninda, kun gusto.
12 Maninigo man na an mga magurang magin mapagrisa sa gawe-gawe kan saindang mga aki bago asin pakatapos nin mga pagtiripon. An mga aki dai maninigong magparadarodalagan sa laog kan edipisyo, ta tibaad magin dahelan ini nin mga aksidente. An pagparadarodalagan sa luwas kan Kingdom Hall puede man na magin peligroso, partikularmente sa mga banggi na limitado an naheheling. An makosog na orolay sa luwas puede man na makadisturbo sa mga pagtaraed asin magtao nin negatibong impresyon sa satong pagsamba. An mga magurang na maingat na naghihingoang bantayan an saindang mga aki sa laog sagkod luwas kan Kingdom Hall dapat na komendaran huli ta ini nakadudugang sa pagigin nakagagayagaya kan satong pag-ontok na sararo.—Sal. 133:1.
13 Sa Pag-adal sa Libro: Inaapresyar niato an pagigin mapagpasakat kan satong mga tugang na ipinagagamit an saindang harong para sa mga pagtiripon kan kongregasyon. Tibaad kalabot digdi an darudakulang preparasyon asin molestia para sa sainda. Kun nag-aatender, kaipuhan niatong magpaheling nin marahay na ugale asin magpaheling nin paggalang patin konsiderasyon sa rogaring ninda. Bago lumaog, maninigo na maingat kitang magnusnos kan satong mga sapatos tanganing malikayan na maatian an salog o alpombra. Maninigo na bantayan nin mga magurang an saindang mga aki, na sinesegurado na sinda magdanay sa lugar kan harong na ginagamit para sa pag-adal sa libro. Minsan ngani tibaad sadit an grupo asin medyo impormal an kamugtakan sa palibot, maninigo na kita dai magin sobra kapamilyar sa harong nin iba. Maninigong ibanan nin magurang an sadit niang aki kun ini magamit kan banyo. Dugang pa, mantang an pag-adal sa libro sarong pagtiripon kan kongregasyon, maninigo na kita magbulos arog kun kita maduman sa Kingdom Hall.
14 Mahalagang Marhay an Marahay na Ugale: An pagsagibo nin Kristianong ugale bako sanang nagtatao nin marahay na impresyon sa satong ministeryo kundi pinaooswag man an marahay na relasyon sa iba. (2 Cor. 6:3, 4, 6) Bilang mga nagsasamba sa maogmang Dios, maninigo na magin natural sa sato an maghuyom, magin madaling pakiibanan, asin an paggibo pa ngani nin saradit, maboot na mga bagay na nagtatao nin kagayagayahan sa iba. Sasamnohan kan marahay na mga karakteristikong ini an satong buhay bilang diosnon na mga tawo.