Pagkultibar kan Interes sa Mensahe kan Kahadean
1 Baga man an mga tawo nag-aako o dai nin babasahon sa Biblia, importante na bumalik tanganing makultibar sa pinakaamay na mahihimo an ano man na interes.
2 Repasohon an mga nota na maingat nindong ginibo pakatapos kan enot na pagsongko. Dangan siertohon na magdara nin sarong kopya kan literatura na iwinalat nindo tanganing magamit nindo iyan durante sa pagdalaw liwat.
Kun nakapasakamot kamo kan brochure na “Uya!,” puwede nindong sabihon:
◼ “Kan huri kitang mag-olay, ipinaheling ko saindo an tutob kan brochure na ini, asin nagbasa kita nin kasuratan tanganing patunayan na, paagi sa saiyang Kahadean, magtatao an Dios nin harong asin trabaho para sa gabos. Pero nanuga man an Dios na tatapuson an helang, paggurang, asin minsan kagadanan. Depisil daw iyan na paniwalaan nindo? [Pasimbagon an kagharong.] Mangnoha an puntong ini sa parapo 4 kan brochure na iwinalat ko saindo.” Basahon an parapo, asin pag-olayan an saro o duwang kasuratan na nakasurat sa ibaba kan pahina. Pinoponan na an pag-adal sa Biblia!
3 Tanganing ikaandam an dalan para sa pagsongko sa umaaboton, puwede nindong tapuson an pag-orolay paagi sa pagsabing:
◼ “Siyempre, an gabos na pinag-olayan niato yaon sa Biblia, alagad kadakol na tawo an naghohorophorop kun talagang mapaniniwalaan ninda an sinasabi kan Biblia. Sa sunod na pagdigdi ko, boot ko na ipakipag-olay saindo sa diit na minutos an temang ini.” Sa pagbalik nindo, ponan an pag-orolay sa subtemang “An Libro na Nagpapaliwanag sa Paraiso,” sa parapo 5 kan brochure.
4 Sa mga Teritoryong Kakadikit an Ikinawawalat na Babasahon: Puwedeng gamiton an kaparehong pag-aatubang kun nagsosongko sa mga tawong nagpaheling nin interes alagad dai nag-ako nin babasahon. Puwede nindong sambiton an brochure na iinalok nindo kan enot na pagsongko. Tibaad kinakaipuhan na gumibo nin paorootrong pagdalaw na ginagamit an Biblia asin an saindong personal na kopya kan brochure bago umako nin brochure an kagharong.
5 An marahay na mga pagdalaw liwat sa brochure na Government puwedeng andamon gikan sa materyal sa pahina 154-6 kan librong Reasoning. O an pag-adal sa Biblia puwedeng ponan paagi sa paghapot nin: “Aram daw nindo na an Biblia igwa nin duwang paglaom? An saro mabuhay nin daing sagkod digdi sa daga. Ipinaliliwanag kan brochure na ini kun paano iyan magigin posible.” Dangan helingon an pahina 15 kan brochure, asin basahon an tolong sitadong kasuratan.
6 Kun kamo nakapasakamot nin babasahon o nagkaigwa sana nin interesanteng pakikipag-olay sa Biblia sa saro, igwa kamo nin paninimbagan na kultibaron an interes. Dinadagka mi kamo gabos na magtagama nin panahon sa Agosto tanganing makihiras sa gibohon na ini nin pagliligtas-buhay.—1 Tim. 4:16.