Paano Sinda Makakadangog Kun Dai Kita Dumalaw Liwat?
1 “Paano . . . sinda makakadangog kun mayo nin parahulit?” (Roma 10:14) Tunay nanggad, paano sinda makakasabot kan katotoohan kun dai kita gumibo nin epektibong mga pagdalaw liwat? Ngonyan na bulan puwedeng balikan niato an satong enot na pakikipag-olay paagi sa dagdag na Makakasuratan na mga punto hale sa arin man na brochure na ikinapasakamot niato, asin iyan puwedeng gumiya sa pag-adal sa Biblia.
2 Kun ikinapasakamot nindo an brochure na “What Is the Purpose of Life?,” puwede kamong magiyahan sa pag-adal sa Biblia sa paaging ini. Puwede nindong ihapot:
◼ “Boot daw nindo asin kan saindong pamilya na mabuhay sa sarong kinaban na arog kaining ilustrasyon sa pahina 31 kan brochure na iwinalat ko saindo? [Ipaheling an ilustrasyon asin pasimbagon.] Kita gabos igwa kan pagmawot na ini, dawa ngani dakol an nagdududa na iyan magigin posible pa. Para sa Dios, iyan bakong imposible.” Buksan sa pahina 29 asin basahon an Salmo 145:16 sa parapo 1. Padagos na pag-olayan an sunod na pirang parapo, asin iintrodusir an pag-adal sa Biblia. Iareglo an pagdalaw liwat sa dai mahaloy tanganing ikapadagos an pag-orolay.
3 Kun bumalik kamo pakapasakamot kan brochure na “An Dios daw Talagang May Pagmakolog sa Sato?,” tibaad magigin epektibo an arog kaini:
◼ “Kan nakaagi kong pagdalaw, pinag-olayan niato an hapot na, An Dios daw talagang may pagmakolog sa sato? Sa paghona daw nindo an Dios igong nagmamakolog sa sato na tatapuson an kasakitan asin kadahasan? [Pasimbagon. Dangan buksan sa kabtang 10 kan brochure sa pahina 22, asin ipadagos.] Nanuga an Dios na sasalidahan an maraot na kinaban na ini nin sarong bago na iistaran kan mararahay na tawo na makakapamuhay sa katoninongan. [Basahon an Salmo 37:11.] Kamo asin ako puwede man na magkamit nin buhay sa bagong kinaban na iyan kun kita naniniwala sa Biblia asin iinaaplikar an sadol kaiyan.” Ipaliwanag an satong programa nin pag-adal sa Biblia.
4 Kun kamo dumalaw liwat pakapasakamot kan brochure na “Uya! Ginigibo Kong Bago an Gabos na Bagay,” puwede kamong magpoon paagi sa pagpaheling kan retrato sa tutob dangan maghapot:
◼ “Ano sa paghona nindo an magigin pamumuhay sa sarong sangkap na kinaban? [Pakomentohon an kagharong.] An saindong naheheling sa retratong ini bako sanang imahinasyon; iyan basado sa seguradong mga panuga na sinasabi sa Biblia. [Basahon an Kapahayagan 21:4 asin Salmo 37:11, 29.] Boot kong ipaliwanag kun paano kamo asin an saindong pamilya puwedeng magkamit kaining bendisyon.” Kun nagpapaheling nin interes an kagharong, ipadagos an pag-orolay, asin mag-alok nin pag-adal sa Biblia.
5 Kun makanompong kita nin mga tawo na naghahanap kan katotoohan, nagpapaheling kita nin tunay na pagkamoot paagi sa pagdalaw liwat tanganing orog pa sindang tabangan. An ipinaniwala satong mga katotoohan kun siring ililigtas kita asin an mga naghihinanyog sa sato.—1 Tim. 4:16.