Pagdanayon an Positibong Kaisipan
1 Kanigoan an kaogmahan niato na mabasa an dapit sa makangangalas na mga pag-oswag na nangyayari sa dakol na nasyon! Minsan siring, narerealisar niato na sa nagkapirang lugar an mga parahayag kan Kahadean parateng napapaatubang sa pagkaindiperente o pagtumang pa ngani sa satong paghuhulit. Paano niato mapagdadanay an positibong kaisipan kun ini an kamugtakan sa satong teritoryo? Paano niato maoolang an negatibong kaisipan na maghahale sa sato kan satong kagayagayahan o makakaina kan satong kaigotan sa paggibo nin mga disipulo?
2 Tatabangan kita kan positibong kaisipan na pagdanayon an satong pagkatimbang. Dawa sa irarom nin masakit na mga kamugtakan, kaipuhan na dai niato togotan na dominaron kan negatibong mga kaisipan an satong pagmansay. Itinao ni Jesus para sa sato an sangkap na halimbawa. Kakadikit na tawo an nag-ako saiya. Dakol an nasingkog sa saiyang katokdoan. Plinano kan relihiyosong mga namomoon na gadanon sia. Sia linutaban, pinag-olog-olog, hinampak, asin sa katapustapusi ginadan. Alagad, nakanompong sia nin kagayagayahan sa saiyang gibohon. Taano? Minidbid nia an kahalagahan kan paggibo kan kabotan nin Dios, asin dai sia suminuko.—Juan 4:34; 13:17; Heb. 12:2.
3 Pagdanayon an Tamang Punto-de-vista sa Satong Ministeryo: Tanganing magibo ini, kaipuhan niatong girumdomon na igwa kita nin mensahe na iniignoro o tinutumang kan kadaklan na tawo. (Mat. 13:14, 15) Maski ngani opisyal na pinagbotan an mga apostol na pumondo sa pagtotokdo basado sa ngaran ni Jesus, nagpadagos sindang maghulit, asin an anihon padagos na nag-aabot. (Gibo 5:28, 29; 6:7) Aram niato patienot pa na, sa nagkapirang teritoryo, kakadikit na tawo an maghihinanyog. (Mat. 7:14) Kun siring, igwa kita nin dahelan na maggayagaya kun saro sanang tawo sa satong teritoryo an naghihinanyog sa satong mensahe. Girumdomon man, na minsan idtong mga nagtutumang kaipuhan na tawan nin oportunidad na magdangog. (Ezeq. 33:8) May mga nagtutumang na sa katapustapusi nagbago asin nagin mga parasamba ki Jehova. Kun siring, kun mamansayon nin tama, an satong ministeryo nagtatao sato nin pagkakontento, dawa ngani pipira an naghihinanyog. An sato mismong presensia sa mga pinto na dara an mensahe manongod sa Kahadean nin Dios sarong patotoo.—Ezeq. 2:4, 5.
4 Igwa kita nin marahay na dahelan na magkaigwa nin positibong pagmansay. An prosperidad kan pambilog na kinaban na gibohon asin an kaharanihan kan dakulang kahorasaan maninigong magmotibar sa sato na gibohon an pinakamakakaya niato. (2 Ped. 3:11, 14) Boot man niato na an mga bagohan na nakikiasosyar magin positibo sa paggamit kan saindang nanonodan. Kun an iba sa satong mga estudyante sa Biblia nag-oswag sagkod sa punto na magin bako bautisadong mga parahayag, an Agosto puwedeng marahay na panahon na makapoon sinda.
5 Baga man naglilingkod bilang mga parahayag o payunir, marahay na isaisip na an hinahagad ni Jehova sa sato bakong magabat. (1 Juan 5:3) Nanunuga sia na sususteniran kita. (Heb. 13:5b, 6) Sa ibong kan pagkaindiperente kan publiko, kaipuhan kitang magin positibo asin padagos na maghulit huli ta kabotan nin Dios na gumibo kita kaiyan.—1 Tim. 2:3, 4.