Ipabanaag an Nasa Isip na Aktitud ni Cristo
“Itogot logod sa saindo kan Dios na nagtatao nin pakatagal asin karangahan na magkaigwa dian sa tahaw nindo kan kaparehong nasa isip na aktitud na yaon ki Cristo Jesus.”—ROMA 15:5.
1. Ano an puedeng magin epekto sa buhay nin saro kan aktitud nia?
AN AKTITUD dakula an epekto sa buhay. An indiperente o mahigos na aktitud, an positibo o negatibong aktitud, an makinontra o mapagkooperar na aktitud, an mapagreklamo o mapagpasalamat na aktitud nakaiimpluwensiang marhay sa kun paano inaatubang nin saro an mga situwasyon asin kun ano an nagigin reaksion sa saiya kan ibang tawo. Kun igwa nin marahay na aktitud, an saro puedeng magin maogma dawa sa medyo masakit na mga situwasyon. Para sa saro na igwa nin maraot na aktitud, garo baga mayo na nin tama, dawa kun—basado sa katunayan—marahay an buhay.
2. Paano nanonodan nin saro an mga aktitud?
2 An mga aktitud—marahay o maraot—puedeng manodan. An totoo, kaipuhan na manodan iyan. Sa pagtaram dapit sa bagong mamundag na aki, an Collier’s Encyclopedia nagsasabi: “Kun ano an magigin mga aktitud nia pag-abot nin panahon dapat niang makua o manodan, na garo baga kun paanong dapat niang makua o manodan an sarong lenguahe o ano man na iba pang abilidad.” Paano niato nanonodan an mga aktitud? Minsan ngani dakol an nakakokontribwir dian, an kamugtakan nin palibot asin kairiba nakaiimpluwensiang marhay. An nasambitan kasubagong ensiklopedya nagsasabi: “Satuyang nanonodan o inaako, na garo baga paagi sa pagsarumsom, an mga aktitud kan haraning kairiba niato.” Kaidtong rinibong taon na an nakaagi, an Biblia may kaagid na sinabi: “Sia na naglalakaw na kaiba nin mga madonong magigin madonong, alagad sia na nakiiiba sa mga lolong maraot an aabotan.”—Talinhaga 13:20; 1 Corinto 15:33.
Sarong Arogan Para sa Tamang Aktitud
3. Siisay an arogan kun dapit sa saiyang aktitud, asin paano niato sia maaarog?
3 Siring sa gabos na iba pang bagay, iyo man kun dapit sa aktitud, itinao ni Jesu-Cristo an pinakamarahay na arogan. Sinabi nia: “Ako nagtao sa saindo nin arogan, tanganing, kun ano an ginibo ko sa saindo, iyo man an gibohon nindo.” (Juan 13:15) Tanganing magin arog ki Jesus, dapat nguna kitang makanood manongod sa saiya.a Pinag-aadalan ta an buhay ni Jesus huli sa intension na gibohon an irinekomendar ni apostol Pedro: “Sa dalan na ini kamo inapod, huli ta minsan si Cristo nagtios para sa saindo, na winalatan kamo nin modelo tanganing sunodon nindo nin estrikto an saiyang mga lakad.” (1 Pedro 2:21) An pasohan ta magin arog nanggad ki Jesus sagkod sa mapupuede. Kabale dian an pagpatalubo kan nasa isip na aktitud nia.
4, 5. Anong aspekto kan nasa isip na aktitud ni Jesus an itinatampok sa Roma 15:1-3, asin paano sia maaarog kan mga Kristiano?
4 Ano an kalabot sa pagkaigwa kan nasa isip na aktitud ni Cristo Jesus? An kapitulo 15 kan surat ni Pablo sa mga taga Roma tinatabangan kita na masimbag an hapot na iyan. Sa enot na pirang bersikulo kan kapitulong ini, sinasambit ni Pablo an pambihirang kualidad ni Jesus kan sabihon nia: “Kaya, kitang mga makosog maninigong magpasan kan mga kaluyahan kaidtong mga bakong makosog, asin bakong magpaoyon sa sato man sana. An lambang saro sa sato magpaogma sa saiyang kataed sa karahayan para sa pagpakosog sa saiya. Huli ta minsan si Cristo dai nagpaoyon sa saiya man sana; kundi siring sa nasusurat: ‘An mga pag-olog-olog kan mga nag-oolog-olog sa saimo napasasakuya.’”—Roma 15:1-3.
5 Inaarog an aktitud ni Jesus, an mga Kristiano dinadagka na magin andam na maglingkod sa mga pangangaipo kan iba na may kapakumbabaan imbes na booton na paogmahon an sainda sanang sadiri. Sa katunayan, an siring na mapakumbabang pagigin andam na maglingkod sa iba sarong karakteristiko kan “mga makosog.” Si Jesus, na mas makosog sa espirituwal kisa siisay man na tawo na nabuhay kasuarin man, nagsabi dapit sa saiyang sadiri: “An Aki nin tawo nagdigdi, bakong tanganing paglingkodan, kundi tanganing maglingkod asin itao an saiyang kalag bilang pantubos na karibay nin dakol.” (Mateo 20:28) Bilang mga Kristiano, boot man niatong maghingoa na maglingkod sa iba, kabale an “mga bakong makosog.”
6. Sa anong paagi niato maaarog an nagin reaksion ni Jesus sa pagtumang asin pag-olog-olog?
6 An saro pang marahayon na karakteristiko na ipinaheling ni Jesus iyo an kaisipan asin paghiro na pirmeng positibo. Nungka niang tinogotan an negatibong aktitud nin iba na makaimpluwensia sa saiya mismong marahayon na aktitud dapit sa paglilingkod sa Dios; maninigong iyo man kita. Kan inoolog-olog asin linalamag huli sa fiel na pagsamba sa Dios, si Jesus mapasensiang nagtios na dai nagrereklamo. Aram nia na an pagtumang nin daing pagtubod asin an dai nakakaintinding kinaban puedeng laoman kan mga naghihingoang paogmahon an saindang kataed “sa karahayan para sa pagpakosog sa saiya.”
7. Paano si Jesus nagpaheling nin pagpapasensia, asin taano ta maninigo niatong arogon iyan?
7 Nagpaheling si Jesus nin tamang aktitud sa iba pang paagi. Nungka siang nagpahayag nin kadaihan nin pasensia ki Jehova kundi mapasensiang hinalat an paghaman kan Saiyang mga katuyohan. (Salmo 110:1; Mateo 24:36; Gibo 2:32-36; Hebreo 10:12, 13) Saro pa, si Jesus dai nawaran nin pasensia sa saiyang mga parasunod. Sinabihan nia sinda: “Makanood kamo sa sako”; huling sia “mahoyo,” an saiyang instruksion nakapakokosog asin nakagiginhawa. Asin huling sia “may kababaan an puso,” sia dai noarin man nagin mahawhaw o mapangahas. (Mateo 11:29) Dinadagka kita ni Pablo na arogon an mga aspektong ini kan aktitud ni Jesus kan sabihon nia: “Papagdanayon dian sa saindo an nasa isip na aktitud na ini na yaon man ki Cristo Jesus, na, minsan ngani sia kabaing nin Dios, dai nag-isip na man-agaw, an boot sabihon, na sia makapantay sa Dios. Dai, kundi sia nagpakang-daing halaga asin buminaing sa sarong oripon asin nagin kaagid nin mga tawo.”—Filipos 2:5-7.
8, 9. (a) Taano ta kaipuhan kitang maghingoa na pataluboon an daing kapasloan na aktitud? (b) Taano ta dai maninigong manluya an satong boot kun dai niato lubos na nasusunod an arogan na iwinalat ni Jesus, asin paanong si Pablo sarong marahay na halimbawa sa bagay na ini?
8 Pasil sabihon na boot niatong maglingkod sa iba asin boot na enoton an saindang mga pangangaipo kisa kan sa sato. Alagad tibaad ihayag nin sadiosan na pagsiyasat sa nasa isip na aktitud niato na an satong puso bakong biyong arog kaiyan an tendensia. Taano ta bako? Enot, huli ta kita nagmana nin paslong mga karakteristiko ki Adan asin Eva; ikaduwa, huli ta kita nabubuhay sa sarong kinaban na nagpapalakop nin kapasloan. (Efeso 4:17, 18) An pagpatalubo nin daing kapasloan na aktitud sa parate nangangahulogan nin pagpatalubo nin kaisipan na bakong kaoyon sa satong minanang bakong sangkap na naturalesa. Nangangaipo iyan nin determinasyon asin paghihingoa.
9 An risang-risang pagkabakong sangkap niato, na laen na marhay sa sangkap na arogan na iwinalat ni Jesus sa sato, kun beses puedeng ikapanluya kan satong boot. Tibaad pagdudahan ta na posible ngani an pagkaigwa nin nasa isip na aktitud na kapareho kan ki Jesus. Alagad mangnoha an nakaparirigon sa boot na mga tataramon ni Pablo: “Aram ko na sa sako, an boot sabihon, sa sakong laman, mayo nin marahay na nag-eerok; huli ta an kakayahan na magmawot nasa sako, alagad an kakayahan na gumibo kan marahay mayo. Huli ta an marahay na minamawot ko dai ko ginigibo, kundi an maraot na hinahaboan ko iyo an ginigibo ko. Tunay na ako naoogma sa ley nin Dios segun sa sakong pagkatawo sa laog, alagad nakaheheling ako sa mga kabtang kan sakong hawak nin saro pang ley na nakikilaban sa ley kan sakong isip asin dinadara akong bihag kan ley nin kasalan na yaon sa mga kabtang kan sakong hawak.” (Roma 7:18, 19, 22, 23) Totoo, an pagkabakong sangkap ni Pablo paorootro siang inolang sa pag-otob sa kabotan nin Dios sono sa gusto nia, alagad an saiyang aktitud—an paagi nin pag-isip asin pagsaboot nia manongod ki Jehova asin sa Saiyang ley—marahay na arogan. Puede man na magin siring an satong aktitud.
Pagtatanos sa Salang mga Aktitud
10. Anong nasa isip na aktitud an dinagka ni Pablo na pataluboon kan mga taga Filipos?
10 Posible daw na kaipuhan kan nagkapira na itanos an sarong salang aktitud? Iyo. Malinaw na totoo ini sa nagkapirang Kristiano kan enot na siglo. Sa saiyang surat sa mga taga Filipos, si Pablo nagtaram manongod sa pagkaigwa nin tamang aktitud. Sia nagsurat: “Bako na ako nag-ako na kaiyan [langitnon na buhay paagi sa mas amay na pagkabuhay liwat] o na ako ginibo nang sangkap, kundi ako nagmamaigot ta tibaad pa ako makapangapot man sa dahelan na ako pinangaptan man ni Cristo Jesus. Mga tugang, dai ko pa ibinibilang an sakong sadiri na nakapangapot na kaiyan; alagad igwa nin sarong bagay manongod kaiyan: Linilingawan ko an mga bagay na nasa hudian asin pinipirit kong aboton an mga bagay na nasa enotan, pinupunta ko an pasohan para sa premyo na pag-apod sa itaas nin Dios paagi ki Cristo Jesus. Kita, kun siring, kun pira sa sato an maygurang na, magkaigwa kan nasa isip na aktitud na ini.”—Filipos 3:12-15.
11, 12. Sa anong mga paagi ihinahayag sa sato ni Jehova an tamang nasa isip na aktitud?
11 Ipinaheheling kan mga tataramon ni Pablo na an siisay man na, pakatapos magin Kristiano, dai nakamamate kan pangangaipo na gumibo nin pag-oswag igwa nin salang aktitud. Dai sia nagkaigwa kan nasa isip na aktitud ni Cristo. (Hebreo 4:11; 2 Pedro 1:10; 3:14) Mayo na daw nin magigibo an siring na tawo? Dai man. Puede kitang tabangan nin Dios na bagohon an satong aktitud kun talagang boot niato. Padagos na nagsabi si Pablo: “Kun sa ano man kamo may ibang inklinasyon nin isip, ihahayag nin Dios an nasabing aktitud sa saindo.”—Filipos 3:15.
12 Minsan siring, kun gusto niato na ihayag sa sato ni Jehova an tamang aktitud, dapat tang gibohon an satong kabtang. An mapagngayongayong pag-adal kan Tataramon nin Dios sa tabang kan Kristianong mga publikasyon na itinatao kan “fiel asin madonong na oripon” mapangyari sa mga “may ibang inklinasyon nin isip” na mapatalubo an tamang aktitud. (Mateo 24:45) An Kristianong kamagurangan, na ninombrahan kan banal na espiritu na “pastoran an kongregasyon nin Dios,” maoogma na tumabang. (Gibo 20:28) Kanigoan an pasalamat niato na kinokonsiderar ni Jehova an satong mga pagkabakong sangkap asin mamomoton na tinatabangan kita! Akoon niato iyan.
Pakanood sa Iba
13. Ano an manonodan ta manongod sa tamang aktitud gikan sa pagkasaysay kan Biblia dapit ki Job?
13 Sa Roma kapitulo 15, ipinaheheling ni Pablo na an paghorophorop sa mga halimbawa sa kasaysayan puedeng makatabang sa sato na liwaton an satong aktitud. Sia nagsurat: “An gabos na bagay na isinurat kaidto isinurat sa pagtokdo sa sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” (Roma 15:4) An nagkapira sa fiel na mga lingkod ni Jehova kan nakaaging mga panahon nangaipong itanos an nagkapirang aspekto kan saindang aktitud. Halimbawa, sa pankagabsan si Job igwa nin marahayon na aktitud. Dai sia noarin man nagsahot nin maraot ki Jehova, asin nungka niang tinogotan an pagdusa na tanyogon an saiyang kompiansa sa Dios. (Job 1:8, 21, 22) Pero, may tendensia sia na ipangatanosan an saiyang sadiri. Pinagbotan ni Jehova si Eliu na tabangan si Job sa pagtatanos kan tendensiang ini. Imbes na makamate nin pagkainsulto, mapakumbabang inako ni Job an pangangaipong bagohon an aktitud asin tolos na pinonan iyan.—Job 42:1-6.
14. Paano kita puedeng magin arog ki Job kun kita tinatawan nin konseho dapit sa satong aktitud?
14 Kapareho daw ni Job an magigin reaksion niato kun an sarong kapwa Kristiano maboot na sinabihan kita na kita nahehelingan nin salang aktitud? Arog ki Job, logod na dai kita noarin man ‘magsahot nin ano man na sala sa Dios.’ (Job 1:22) Kun kita magdusa sa bakong makatanosan na paagi, logod na nungka kitang magreklamo o magsahot na si Jehova iyo an dahelan kan satong mga problema. Logod na likayan tang ipangatanosan an satong sadiri, na ginigirumdom na ano man an tibaad mga pribilehio niato sa paglilingkod ki Jehova, kita “mga oripon [sana] na daing kamanungdanan” pa man giraray.—Lucas 17:10.
15. (a) Anong salang aktitud an ipinaheling kan nagkapira sa mga parasunod ni Jesus? (b) Paano si Pedro nagpaheling nin marahayon na aktitud?
15 Durante kan enot na siglo, an nagkapirang naghinanyog ki Jesus nagpaheling nin salang aktitud. Sarong beses, si Jesus may sinabing depisil saboton. Bilang simbag, “an kadaklan sa saiyang mga disipulo, kan ini madangog ninda, nagsarabi: ‘Makangingirhat an mga tataramon na ini; siisay an magdadangog kaiyan?’” An mga nagtaram nin arog kaini malinaw na igwa nin salang aktitud. Asin an salang aktitud ninda nagresulta sa dai na ninda paghinanyog ki Jesus. An rekord nagsasabi: “Huli kaini an dakol sa saiyang mga disipulo nagduman sa mga bagay na tinalikdan asin habo nang maglakaw kaiba nia.” An gabos daw igwa nin salang aktitud? Bako. An rekord nagpapadagos: “Kun siring si Jesus nagsabi sa dose: ‘Ano maharale man kamo?’ Si Simon Pedro nagsimbag sa saiya: ‘Kagurangnan, siisay pa an samong dudumanan?’” Dangan garo man sana sinimbag ni Pedro an saiya mismong hapot: “Yaon sa saimo an mga tataramon nin buhay na daing katapusan.” (Juan 6:60, 66-68) Kanigoan karahay na aktitud! Kun napapaatubang sa mga paliwanag o pagliliwat sa pakasabot sa Kasuratan na sa primero tibaad nadedepisilan kitang akoon, bako daw na marahay na ipaheling an aktitud na ipinaheling ni Pedro? Kanigoan na kamangmangan na umontok sa paglilingkod ki Jehova o na magtaram sa paagi na bakong kaoyon kan “arogan nin ikararahay na mga tataramon” dahel sana ta an nagkapirang bagay sa primero depisil saboton!—2 Timoteo 1:13.
16. Anong nakakukubhan na aktitud an ipinaheling kan Judiong mga namomoon sa relihion kan kaaldawan ni Jesus?
16 An Judiong mga namomoon sa relihion kan enot na siglo dai ikinapaheling an nasa isip na aktitud na yaon ki Jesus. An saindang pagkadesididong dai maghinanyog ki Jesus nahayag kan buhayon nia si Lazaro hale sa mga gadan. Para sa siisay man na igwa nin tamang aktitud, an milagrong idto nagin makosogon na prueba kutana na si Jesus isinugo nin Dios. Minsan siring, satong mababasa: “Dangan an mga poon na saserdote asin mga Fariseo tiniripon an Sanhedrin asin nagpoon na magsabi: ‘Ano an satong gigibohon, huli ta an tawong ini naggigibo nin dakol na tanda? Kun pabayaan ta sana sia nin siring, sinda gabos maturubod sa saiya, asin madatong an mga taga Roma asin kukuanon an satong lugar asin an satong nasyon.’” An solusyon ninda? “Magpoon kan aldaw na idto nagpaharatolhatol sinda na gadanon sia.” Apuera sa pagpakana na gadanon si Jesus, plinano ninda na gadanon an buhay na ebidensia kan saiyang pagigin paramilagro. “An poon na mga saserdote nagpaharatolhatol ngonyan na gadanon man si Lazaro.” (Juan 11:47, 48, 53; 12:9-11) Kanigoan kamakaoongis kun kita magpapaheling nin kaparehong aktitud asin mauuyam o maaaburido sa mga bagay na maninigo kutana talagang ipaggayagaya niato! Iyo, asin abaa kapeligroso kaiyan!
Pag-arog sa Positibong Aktitud ni Cristo
17. (a) Sa anong mga kamugtakan nagpaheling nin daing takot na aktitud si Daniel? (b) Paano ipinaheling ni Jesus na sia may kosog nin boot?
17 An mga lingkod ni Jehova nagpapadanay nin positibong aktitud. Kan an mga kaiwal ni Daniel magkasapakat na magpasar nin ley na nagbabawal sa pag-arang sa siisay man na dios o tawo apuera sa hade sa laog nin 30 aldaw, aram ni Daniel na maaapektaran kaini an saiyang relasyon ki Jehova Dios. Dai daw sia mamimibi sa Dios sa laog nin 30 aldaw? Dai, daing takot na nagpadagos sia sa pagpamibi ki Jehova nin tolong beses kada aldaw, siring sa saiyang kinatodan. (Daniel 6:6-17) Si Jesus dai man natakot sa saiyang mga kaiwal. Sarong aldaw nin Sabbath, nanuparan nia an sarong lalaki na alang an kamot. Aram ni Jesus na an dakol na Judiong yaon duman maaanggot kun magpaomay sia sa Sabbath. Prangka niang hinagad sa sainda na ipahayag an saindang saboot dapit dian. Kan magsayuma sinda, si Jesus nagpadagos asin pinaomayan an lalaki. (Marcos 3:1-6) Nungka si Jesus na uminatras sa pag-otob sa sugo sa saiya kun sa heling nia tama.
18. Taano ta may mga nagtutumang sa sato, alagad ano an maninigong magin reaksion ta sa saindang negatibong aktitud?
18 Aram kan mga Saksi ni Jehova ngonyan na sinda dai man dapat na matakot sa posibleng negatibong reaksion nin mga paratumang. Ta kun iyo, dai ninda ikapaheheling an nasa isip na aktitud ni Jesus. Dakol an nagtutumang sa mga Saksi ni Jehova, an nagkapira huli ta mayo sinda nin aram sa mga katunayan asin an iba huli ta anggot sinda sa mga Saksi o sa saindang mensahe. Alagad nungka niatong togotan an saindang antipatikong aktitud na maapektaran an satong positibong aktitud. Nungka niatong togotan an iba na diktahan an paagi nin pagsamba niato.
19. Paano ta ikapaheheling an nasa isip na aktitud na kapareho kan ki Jesu-Cristo?
19 Si Jesus pirmeng nagpaheling nin positibong nasa isip na aktitud sa saiyang mga parasunod asin sa mga areglo nin Dios, gurano man iyan kadepisil na gibohon. (Mateo 23:2, 3) Maninigo tang arogon an saiyang halimbawa. Totoo, an satong mga tugang bakong sangkap, alagad ta kita iyo man. Asin saen kita makakukua nin mas marahay na kairiba asin totoong maimbod na mga katood apuera sa satong pambilog na kinaban na kasararoan nin magturugang? Dai pa kita tinawan ni Jehova nin kompletong pakasabot sa saiyang nasusurat na Tataramon, alagad anong grupong relihioso an orog na nakasasabot? Pirme niatong papagdanayon an tamang nasa isip na aktitud, an nasa isip na aktitud na yaon ki Jesu-Cristo. Kabilang sa iba pang bagay, kaiba digdi an pagigin tataong maghalat ki Jehova, na pag-oolayan ta sa minasunod na artikulo.
[Nota sa Ibaba]
a An publikasyon na The Greatest Man Who Ever Lived, na ipinublikar kan Watchtower Bible and Tract Society of New York, Inc., nagpapaliwanag kan buhay asin ministeryo ni Jesus.
Ikapaliliwanag daw Nindo?
• Paano an satong buhay apektado kan satong aktitud?
• Iladawan an nasa isip na aktitud ni Jesu-Cristo.
• Ano an manonodan ta sa aktitud ni Job?
• Ano an dapat na magin tamang aktitud sa atubangan nin pagtumang?
[Mga Ritrato sa pahina 7]
An Kristiano na igwa kan tamang aktitud naghihingoa na tumabang sa iba
[Ritrato sa pahina 9]
An mapagngayongayong pag-adal kan Tataramon nin Dios tinatabangan kita na magkaigwa kan nasa isip na aktitud ni Cristo