Arogon an Nasa Isip na Aktitud ni Jesus
1. Anong nasa isip na aktitud an ipinaheling ni Jesus?
1 Minsan ngani dai noarin man niato naheling an Aki nin Dios, paagi sa nasusurat na rekord kan buhay asin ministeryo ni Jesus, talagang namotan niato sia. (1 Ped. 1:8) Bilang pagkuyog sa kabotan kan saiyang Ama, binayaan nia an saiyang mamuraway na langitnon na kamugtakan asin nagdigdi sa daga. Bilang tawo, daing kaimotan niang pinaglingkodan an iba dangan itinao an saiyang buhay para sa katawohan. (Mat. 20:28) Sinasadol kita kan Tataramon nin Dios: “Papagdanayon dian sa saindo an nasa isip na aktitud na ini na yaon man ki Cristo Jesus.” Paano niato maaarog an saiyang mapagsakripisyong espiritu?—Fil. 2:5-8.
2. Anong kadepisilan an inaatubang nin dakol na Kristiano, asin ano an makakatabang sa sainda na mapangganahan iyan?
2 Kun Napapagal: Minsan ngani sangkap si Jesus, sia napagal pa man giraray. Sa sarong pangyayari, kan sia “napagal sa pagbaklay,” nagtao sia nin lubos na patotoo sa sarong Samaritana. (Juan 4:6) Dakol na Kristiano ngonyan an napapaatubang sa kaagid na kadepisilan. Pakalihis nin sarong mapagal na semana nin pagtrabaho, puedeng masakit na magkaigwa kan kosog na makikabtang sa paghuhulit. Minsan siring, kun gigibohon niato iyan nin regular, manonompongan niato na an Kristianong ministeryo nakakarepresko sa sato sa espirituwal.—Juan 4:32-34.
3. Paano niato maaarog an pagigin andam ni Jesus na magtokdo?
3 Sa saro pang pangyayari, si Jesus asin an mga disipulo nia nagduman sa sarong lugar na harayo sa mga tawo tanganing magpahingalo nin kadikit. Minsan siring, naaraman iyan nin sarong dakulang kadaklan asin naenot nang duminalagan duman tangani na sabaton sinda. Imbes na mairitar, si Jesus “napahiro nin pagkaherak sa sainda” asin ‘nagtokdo sa sainda nin balakid na bagay.’ (Mar. 6:30-34) An pagpoon asin pamamayo nin mga pag-adal sa Biblia nagkakaipo nin kaagid na aktitud. Iyan nagkakaipo nin daing ontok na paghihingoa asin tunay na pagkamoot sa mga tawo. Kun sa presente dai pa kamo namamayo nin pag-adal sa Biblia, dai umontok sa pagmamaigot na makakua nin saro.
4. Paano an pag-auxiliary payunir makakatabang sa sato na arogon an nasa isip na aktitud ni Cristo?
4 Enoton an Espirituwal na Intereses: An pag-auxiliary payunir makakatabang sa sato na magkonsentrar nin orog sa espirituwal na mga aktibidad. An sarong hoben na tugang na babae nagsurat: “An ina kan saro sa sakong mga katood inenkaminar kaming duwa na umiba sa saiya sa pag-auxiliary payunir sa laog nin sarong bulan. Talagang naoogma ako na kami nag-iba sa saiya. Naogma akong orog na mamidbid an mga tugang na lalaki asin babae, asin dai nahaloy, sinda garo kapamilya ko na. Naogma man akong magkaigwa nin orog pang oportunidad na makipag-olay sa iba manongod ki Jehova asin tokdoan sinda kan makangangalas na mga katotoohan kan Kahadean. An gabos na ini nagpamate sa sako na mas harani ki Jehova asin sa saiyang organisasyon.”—Sal. 34:8.
5. Taano ta dapat na padagos kitang maghingoa na arogon an nasa isip na aktitud ni Jesus?
5 Kita gabos napapaatubang sa pagdinaogan kan satong bakong sangkap na laman asin kan satong pagmawot na paogmahon si Jehova. (Roma 7:21-23) Dapat niatong labanan an pinagigianan an sadiri na espiritu kan kinaban. (Mat. 16:22, 23) Puede kitang tabangan ni Jehova na magin mapanggana digdi paagi sa saiyang banal na espiritu. (Gal. 5:16, 17) Mantang hinahalat niato an pagkalda sa sato pasiring sa matanos na bagong kinaban nin Dios, arogon logod niato an nasa isip na aktitud ni Jesus paagi sa pag-enot sa intereses kan Kahadean asin sa intereses nin iba kisa sa satong sadiring intereses.—Mat. 6:33; Roma 15:1-3.