Magpaheling nin Mapaghalat na Aktitud!
“Mapaheling ako nin mapaghalat na aktitud sa Dios nin sakong kaligtasan. Dadangogon ako kan sakuyang Dios.”—MIQUEAS 7:7.
1, 2. (a) Paano an salang aktitud nakadanyar sa mga Israelita sa kaawagan? (b) Ano an puedeng mangyari sa sarong Kristiano na dai nagpapatalubo nin tamang aktitud?
AN DAKOL na bagay sa buhay puedeng mansayon magsalang nin positibo o negatibo, depende sa satong aktitud. Kan an mga Israelita nasa kaawagan, sinda milagrosong tinawan nin mana. Maninigo kutana sindang nangalagkalag sa alang na daga asin odok na nagpasalamat ki Jehova sa pagtao kan saindang kakanon. Nagpabanaag kutana iyan nin positibong aktitud. Imbes, nagirumdoman ninda an manlaenlaen na kakanon sa Egipto asin nagreklamo na an mana nakakasawa. Abaa kanegatibong aktitud!—Bilang 11:4-6.
2 An aktitud nin sarong Kristiano ngonyan puede man na gibohon an situwasyon na lumuwas na magsalang maogma o mamondo. Kun mayo nin tamang aktitud, an sarong Kristiano puedeng madaling mawaran kan saiyang kagayagayahan, asin peligroso iyan huli ta, siring kan sabi ni Nehemias: “An kagayagayahan ni Jehova iyo an [satong] kuta.” (Nehemias 8:10) An positibo, magayagayang aktitud nagtatabang na kita magdanay na makosog asin nagpapalakop nin katoninongan asin pagkasararo sa kongregasyon.—Roma 15:13; Filipos 1:25.
3. Paano an tamang aktitud nakatabang ki Jeremias durante kan masakit na mga panahon?
3 Sa ibong kan pamumuhay sa masakit na mga panahon, si Jeremias nagpaheling nin positibong aktitud. Dawa kan maheling nia mismo an makatatakot na marhay na mga pangyayari sa pagbagsak kan Jerusalem kan 607 B.C.E., nakaheling sia nin positibong mga bagay. Dai lilingawan ni Jehova an Israel, asin magdadanay an nasyon. Si Jeremias nagsurat sa librong Lamentacion: “Huli sa mga gibo nin mamomoton na kabootan ni Jehova na dai pa kita napopoho, huli ta an saiyang mga pagkaherak dai nanggad matatapos. Iyan bago kada aga. Abunda an saimong pagigin fiel.” (Lamentacion 3:22, 23) Sa bilog na kasaysayan, an mga lingkod nin Dios sa pinakamasakit na mga kamugtakan nagmaigot na papagdanayon an positibo, magayagaya pa ngani, na aktitud.—2 Corinto 7:4; 1 Tesalonica 1:6; Santiago 1:2.
4. Anong aktitud an pinapagdanay ni Jesus, asin paano iyan nakatabang sa saiya?
4 Sais sientos na taon pagkagadan ni Jeremias, si Jesus natabangan na magtagal huli sa saiyang positibong aktitud. Satong mababasa: “Huli kan kagayagayahan na ibinugtak sa atubangan [ni Jesus] tinios nia an hariging pasakitan, hinamak an kasopganan, asin nagtukaw sa too kan trono nin Dios.” (Hebreo 12:2) Ano man na pagtumang o paglamag an kinaipuhan na atubangon ni Jesus—maski an labi-labing sakit sa hariging pasakitan—ikinonsentrar nia an saiyang isip sa “kagayagayahan na ibinugtak sa atubangan nia.” An kagayagayahan na iyan iyo an pribilehio na pagbindikar sa soberaniya ni Jehova asin pagsantipikar sa saiyang ngaran siring man an oportunidad na pagtao nin dakulang mga bendisyon sa makinuyog na katawohan sa ngapit.
Magkaigwa nin Mapaghalat na Aktitud
5. Ano an sarong tipikong situwasyon kun saen an mapaghalat na aktitud makatatabang sa sato na magkaigwa nin tamang pagmansay sa mga bagay-bagay?
5 Kun kita mapatalubo nin nasa isip na aktitud na arog kan ki Jesus, dai niato mawawara an kagayagayahan ni Jehova dawa kun an mga bagay dai pirmeng nangyayari sono sa paagi asin panahon na linalaoman ta. Si propeta Miqueas nagsabi: “Kun para sa sako, ki Jehova ako maghahalat. Mapaheling ako nin mapaghalat na aktitud sa Dios nin sakong kaligtasan.” (Miqueas 7:7; Lamentacion 3:21) Puede man kitang magpaheling nin mapaghalat na aktitud. Paano? Dakol na paagi. Enot, tibaad isipon ta na an sarong tugang na nasa autoridad nasala asin na kinakaipuhan an tolos-tolos na pagtatanos. An mapaghalat na aktitud mapangyari sa sato na maghorophorop, ‘Talaga daw na sia nasala, o ako an sala? Kun sia nasala, posible kaya na tinotogotan ni Jehova an mga pangyayari huli ta para sa saiya an indibiduwal na iyan maoswag pa asin na dai na kinakaipuhan an tolos-tolos na pagtatanos?’
6. Paano an mapaghalat na aktitud makatatabang sa saro na may linalabanan na personal na problema?
6 An mapaghalat na aktitud tibaad kaipuhan kun kita may ikinapupurisaw na personal na problema o linalabanan na kaluyahan. Ipamugtak ta baga na kita naghahagad nin tabang ki Jehova, alagad nagpapadagos an problema. Ano na ngonyan? Kaipuhan na padagos niatong gibohon an ano man na makakaya ta na resolberan an problema dangan magtubod sa mga tataramon ni Jesus: “Padagos kamong maghagad, asin iyan itatao sa saindo; padagos kamong maghanap, asin iyan makukua nindo; padagos kamong magtoktok, asin iyan bubukasan para sa saindo.” (Lucas 11:9) Padagos na mamibi, asin maghalat ki Jehova. Sa tamang panahon asin sa saiya mismong paagi, sisimbagon ni Jehova an saindong mga pamibi.—1 Tesalonica 5:17.
7. Sa anong paagi na an mapaghalat na aktitud makatatabang sa satong pagmansay sa gradwal an paglinaw na pakasabot sa Biblia?
7 Mantang naootob an mga hula sa Biblia, nagigin malinaw an satong pakasabot sa Kasuratan. Pero kun beses, tibaad isipon ta na an sarong paglilinaw atrasado. Kun iyan dai minaabot sa panahon na boot niato, kita daw andam na maghalat? Girumdomon, para ki Jehova angay na ihayag an “sagradong hilom kan Cristo” nin padikitdikit asin sa laog nin peryodo na mga 4,000 na taon. (Efeso 3:3-6) Kun siring, igwa daw kita nin ano man na rason na malangkag? Kita daw nagdududa na may sarong “fiel asin madonong na oripon” na ninombrahan na magtao sa banwaan ni Jehova “kan saindang kakanon sa igong panahon”? (Mateo 24:45) Tadaw ta hahalean an satong sadiri nin diosnon na kagayagayahan dahel ta bakong gabos lubos na nasasabotan? Girumdomon, si Jehova an nagdedesisyon kun noarin asin paano ihahayag an saiyang ‘mga hilom.’—Amos 3:7.
8. Paanong an pagpapasensia ni Jehova nagin kapakipakinabang para sa dakol?
8 An nagkapira tibaad manluya an boot huli ta iniisip ninda na pakatapos nin dakol na taon nin fiel na paglilingkod, tibaad dai na sinda mabuhay tanganing maheling an “dakula asin makangingirhat na aldaw ni Jehova.” (Joel 2:30, 31) Pero, puedeng maparigon an boot ninda kun hehelingon ninda an positibong aspekto. Si Pedro naghatol: “Ibilang nindo an pagpapasensia kan satong Kagurangnan na kaligtasan.” (2 Pedro 3:15) An pagpapasensia ni Jehova nagpangyari sa minilyon pang tama an kamugtakan nin puso na makanood kan katotoohan. Bako daw na marahayon iyan? Dugang pa, mientras na mas haloy na nagpapasensia si Jehova, mas dakol man kitang panahon na ‘padagos na maghingoa na makamtan an satong kaligtasan na may takot asin pagtakig.’—Filipos 2:12; 2 Pedro 3:11, 12.
9. Kun limitado an satong magigibo sa paglilingkod ki Jehova, paano an mapaghalat na aktitud makatatabang sa sato na tagalan an situwasyon?
9 An mapaghalat na aktitud tinatabangan kita na dai manluya an boot kun an pagtumang, helang, paggurang, o iba pang mga problema inoolang kita sa paglilingkod sa Kahadean. Linalaoman ni Jehova na kita maglilingkod sa saiya nin bilog na puso. (Roma 12:1) Minsan siring, an Aki nin Dios, na ‘naheherak sa hababa asin sa dukha,’ dai naghahagad nin labi sa rasonableng ikatatao niato; iyo man si Jehova. (Salmo 72:13) Sa siring, kita dinadagka na gibohon an makakaya ta, na mapasensiang naghahalat sagkod na magbago an mga kamugtakan—magsalang sa sistemang ini nin mga bagay o sa maabot. Girumdomon: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.”—Hebreo 6:10.
10. Anong maraot na ugale an malilikayan nin saro na igwa nin mapaghalat na aktitud? Ipaliwanag.
10 An mapaghalat na aktitud tinatabangan man kitang likayan an kapangahasan. An nagkapirang nagin apostata habong maghalat. Tibaad inisip ninda na may pangangaipo para sa mga pagliliwat, magsalang sa pakasabot sa Biblia o sa organisasyonal na mga bagay. Pero, nalingawan nindang rekonoseron na an espiritu ni Jehova an nagpapahiro sa fiel asin madonong na oripon na gumibo nin mga pagliliwat sa Saiyang itinalaan na panahon, bakong kun noarin niato tibaad iniisip na ini kinakaipuhan. Asin an ano man na mga pagliliwat dapat na kaoyon sa kabotan ni Jehova, bakong sa satong personal na mga ideya. Tinotogotan kan mga apostata an mapangahas na aktitud na biribidon an saindang kaisipan asin singkogon sinda. Alagad kun inarog ninda an nasa isip na aktitud ni Cristo, napagdanay kutana ninda an saindang kagayagayahan asin nagdanay na kabilang sa banwaan ni Jehova.—Filipos 2:5-8.
11. Paano niato kapakipakinabang na magagamit an panahon sa paghalat, na sinusunod an kiisay na mga halimbawa?
11 Siempre, an pagpapadanay nin mapaghalat na aktitud dai nangangahulogan nin pagigin hugakon o inaktibo. Igwa kitang mga gigibohon. Halimbawa, kaipuhan kitang magin okupado sa personal na pag-adal sa Biblia asin sa siring ipinaheheling an kaparehong odok na interes sa espirituwal na mga bagay na ipinaheling kan fiel na mga propeta asin kan mga anghel pa ngani. Sa pagtaram dapit sa siring na interes, si Pedro nagsasabi: “May labot sa kaligtasan mismong ini an maigot na pagsiyasat asin maingat na paghanap ginibo kan mga propeta . . . Sa mismong mga bagay na ini an mga anghel nagmamawot na makamansay.” (1 Pedro 1:10-12) Bako sanang personal na pag-adal an kaipuhan, kundi siring man an regular na pag-atender sa mga pagtiripon asin pamibi. (Santiago 4:8) An mga nagpapaheling nin pakamate sa saindang espirituwal na pangangaipo paagi sa regular na pagkakan nin espirituwal na kakanon asin pakikiasosyar sa mga kapwa Kristiano nagpapatunay na nagkaigwa na sinda kan nasa isip na aktitud ni Cristo.—Mateo 5:3.
Magkaigwa nin Realistikong Pagmansay
12. (a) Anong independensia an ginusto ni Adan asin Eva? (b) Ano an ibinunga kan pagsunod kan katawohan sa dalan ni Adan asin Eva?
12 Kan lalangon nin Dios an enot na tawong mag-agom, nasa saiya sana an diretso na magbugtak kan mga pamantayan nin tama asin sala. (Genesis 2:16, 17) Gusto ni Adan asin Eva nin independensia sa paggiya nin Dios, asin nagbunga ini kan kinaban na naheheling ta sa palibot niato ngonyan. Si apostol Pablo nagsabi: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) An 6,000 na taon nin kasaysayan nin tawo poon kan panahon ni Adan nagpatunay sa pagigin totoo kan mga tataramon ni Jeremias: “Aram kong marhay, O Jehova, na bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” (Jeremias 10:23) Bakong talsot an pag-admitir na totoo an mga tataramon ni Jeremias. Iyan realistiko. Ipinaliliwanag kaiyan an gabos na halawig na siglong idto na “an tawo nagsakop sa tawo sa saiyang ikararaot” huli ta an mga tawo namahala nin independiente sa Dios.—Eclesiastes 8:9.
13. Ano an realistikong pagmansay kan mga Saksi ni Jehova manongod sa kayang gibohon kan mga tawo?
13 Huli sa situwasyon kan katawohan, narerealisar kan mga Saksi ni Jehova na igwa nin mga limitasyon an saindang magigibo sa presenteng sistema nin mga bagay. An positibong aktitud makatatabang na papagdanayon an satong kagayagayahan, alagad bako iyan an solusyon sa gabos na bagay. Sa kapinonan kan mga taon nin 1950, an sarong Amerikanong klerigo nagpublikar nin sarong pinakamabentang libro na inapod The Power of Positive Thinking. An libro nagsuherir na an kadaklan na balakid kayang mapangganahan kun iyan inaatubang na may positibong aktitud. Tunay nanggad na kahangahanga an positibong kaisipan. Alagad ipinaheheling nin eksperyensia na an kaaraman, abilidad, materyal na kabuhayan, asin dakol na iba pang bagay naglilimitar sa kaya niatong gibohon bilang mga indibiduwal. Asin kun sa bilog na kinaban, an mga problema talagang dakulaon tanganing mapangganang resolberan kan mga tawo—gurano man kapositibo kan saindang kaisipan!
14. An mga Saksi ni Jehova daw igwa nin negatibong aktitud? Ipaliwanag.
14 Huli sa realistikong pagmansay ninda sa siring na mga bagay, an mga Saksi ni Jehova kun beses sinasahotan na igwa nin negatibong aktitud. Imbes, galaga sinda na sabihon sa mga tawo an manongod sa solamenteng Saro na kayang pakarhayon nin permanente an buhay nin katawohan. Digdi inaarog man ninda an nasa isip na aktitud ni Cristo. (Roma 15:2) Asin sibot sinda sa pagtabang sa mga tawo na magkamit nin marahay na relasyon sa Dios. Aram ninda na sa katapustapusi, ini an makakahaman kan pinakamarahay.—Mateo 28:19, 20; 1 Timoteo 4:16.
15. Paano pinaparahay kan gibohon kan mga Saksi ni Jehova an mga indibiduwal?
15 Dai iniignoro kan mga Saksi ni Jehova an mga problema sosyal—nangorogna an nakararamog na mga gibo na bakong sono sa Kasuratan—na nasa palibot ninda. Bago magin saro sa mga Saksi ni Jehova an sarong interesado, sia naggigibo nin mga pagbabago, na sa parate kinakaipuhan na daogon an nakakaadiktong mga bisyo na ikinaaanggot nin Dios. (1 Corinto 6:9-11) Sa siring natabangan kan mga Saksi ni Jehova an mga naghihimate na mahale an pagbuburat, pagkaadikto sa droga, inmoralidad, asin bangkag na pagsugal. An siring na nabakle na mga indibiduwal nakanood na sustentohan an saindang pamilya sa responsable asin onestong paagi. (1 Timoteo 5:8) Kun an mga indibiduwal asin pamilya natatabangan sa paaging ini, naiinaan an mga problema sa komunidad—mas dikit an adikto sa droga, mas dikit an mga kaso nin kadahasan sa laog nin pamilya, asin iba pa. Paagi sa pagigin mga siudadanong makinuyog sa ley asin paagi sa pagtabang sa iba na maparahay an saindang buhay, iniinaan kan mga Saksi ni Jehova an pasanon kan mga ahensia na an trabaho iyo an pagresolber sa mga problema sosyal.
16. Taano an mga Saksi ni Jehova ta dai nakikilabot sa sekular na mga mobimiento para sa reporma?
16 Kaya, nabago daw kan mga Saksi ni Jehova an kamugtakan sa moral kan kinaban? Bueno, sa nakaaging dekada, an kabilangan kan aktibong mga Saksi duminakol poon sa kulang sana kaidto nin kadikit sa 3,800,000 na nagin haros 6,000,000. Iyan paglangkaw nin mga 2,200,000, na an kadaklan tinalikdan an maraot na gibo kan sinda magin Kristiano. Kadakol na buhay an nagrahay! Pero, an kabilangan na ini saditon kun ikokomparar sa ilinangkaw kan populasyon sa kinaban durante kan peryodo man sanang iyan—875,000,000! Nanonompongan kan mga Saksi ni Jehova na sarong gikanan nin kagayagayahan an pagtabang sa mga naghihimate, minsan ngani aram ninda na dikit sa tahaw nin katawohan an malakaw sa dalan pasiring sa buhay. (Mateo 7:13, 14) Mantang hinahalat kan mga Saksi an pambilog na kinaban na mga pagbabago na an Dios sana an makagigibo, dai sinda nakikilabot sa sekular na mga mobimiento para sa reporma, na sa parate minapoon na may marahay na intension alagad an naaabtan pagkadesganar asin kadahasan pa ngani.—2 Pedro 3:13.
17. Ano an ginibo ni Jesus tanganing tabangan an mga nasa palibot nia, alagad ano an dai nia ginibo?
17 Sa paggibo kaini, ipinaheheling kan mga Saksi ni Jehova an iyo man sanang kompiansa ki Jehova na ipinaheling ni Jesus kan nasa daga pa. Kaidtong enot na siglo, si Jesus naggibo nin mga milagro nin pagpaomay. (Lucas 6:17-19) Nagbuhay pa ngani sia nin mga gadan. (Lucas 7:11-15; 8:49-56) Alagad dai nia hinale an problema nin helang o dinaog an kaiwal na kagadanan. Aram nia na bako pa idto an itinalaan na panahon nin Dios para kaini. Huling igwa kan nakalalabing mga abilidad nin sarong sangkap na tawo, posibleng dakol kutana an ginibo ni Jesus na resolberan an magabat na mga problemang politikal asin sosyal. Minalataw na an nagkapira sa saiyang mga katemporanyo boot na kumapot sia nin kapangyarihan asin humiro sa siring kaining paagi, alagad nagsayuma si Jesus. Satong mababasa: “Kan maheling kan mga tawo an mga tanda na saiyang ginibo, nagpoon sindang magsabi: ‘Iyo na man nanggad ini an propeta na madatong sa kinaban.’ Kun siring si Jesus, sa pakaaram na sinda madorolok asin kukuanon sia nin pirit tanganing gibohon siang hade, naghale liwat pasiring sa bukid na sia sana.”—Juan 6:14, 15.
18. (a) Paano si Jesus pirmeng nagpaheling nin mapaghalat na aktitud? (b) Paano nagliwat an aktibidad ni Jesus poon kan 1914?
18 Habo ni Jesus na maimbuelto sa politika o sa biyong serbisyo sosyal huli ta aram nia na dai pa nag-abot an panahon na kaptan nia an sa hadeng kapangyarihan asin gumibo nin mga pagpapaomay para sa gabos na tawo sa gabos na lugar. Dawa pagkasakat nia sa inmortal na espiritung buhay sa kalangitan, sia andam na maghalat sa itinalaan na panahon ni Jehova bago humiro. (Salmo 110:1; Gibo 2:34, 35) Minsan siring, poon kan pagtukaw nia bilang Hade sa Kahadean nin Dios kan 1914, sia luminuwas “sa pandaog asin sa pagtapos kan saiyang pandadaog.” (Kapahayagan 6:2; 12:10) Kanigoan an pagpasalamat ta na pumasakop sa saiyang pagkahade, mantang an iba na naghihingakong Kristiano mas gustong magdanay na ignorante sa mga katokdoan kan Biblia may labot sa Kahadean!
Paghalat—Gikanan nin Pagkadesganar o nin Kagayagayahan?
19. Noarin an paghalat nagigin “kasakitan sa puso,” asin noarin iyan sarong gikanan nin kagayagayahan?
19 Aram kaidto ni Salomon na an paghalat puedeng makadesganar. Sia nagsurat: “An paghalat na naglalawig kasakitan sa puso.” (Talinhaga 13:12) Tunay nanggad, kun an saro igwa nin daing basehan na mga linalaoman, an puso puedeng magsakit sa pagkadesganar. Minsan siring, an paghalat sa maogmang mga okasyon—tibaad kasal, pagkamundag nin aki, o pagkairibaiba giraray niato kan satong mga namomotan—puedeng magtao sato nin may pag-ansitipar na kagayagayahan haloy pa bago kan aldaw na mangyayari iyan. Nadudugangan an kagayagayahan na iyan kun ginagamit ta sa madonong na paagi an panahon sa paghalat, na naggigibo nin mga preparasyon para sa maabot na okasyon.
20. (a) Anong makangangalas na mga pangyayari an may kompiansa niatong hinahalat na maheling? (b) Paano kita makanonompong nin kagayagayahan mantang hinahalat na maotob an mga katuyohan ni Jehova?
20 Kun kita igwa nin bilog na kompiansa na an satong mga linalaoman maootob—dawa kun dai ta aram kun noarin iyan maootob—an panahon nin paghalat dai man kaipuhan na magin “kasakitan sa puso.” Aram kan fiel na mga nagsasamba sa Dios na madali na an Milenyal na Paghade ni Cristo. Kompiado sinda na maheheling ninda an katapusan nin kagadanan asin helang. May galagang pag-antisipar na magayagayang hinahalat ninda an panahon na sasabaton ninda an binilyon hale sa mga gadan, kabale an saindang gadan nang mga namomotan. (Kapahayagan 20:1-3, 6; 21:3, 4) Sa mga panahon na ini nin krisis sa ekolohiya, inaantisipar ninda an seguradong paglaom na maheling an Paraiso na eestablisaron digdi sa daga. (Isaias 35:1, 2, 7) Kun siring, madonong nanggad na gamiton an panahon nin paghalat sa tamang paagi, “na danay na dakol an gigibohon sa gibohon kan Kagurangnan”! (1 Corinto 15:58) Padagos na kumakan nin espirituwal na kakanon. Magpatalubo nin orog pa kadayupot na relasyon ki Jehova. Hanapon an iba na an puso pinahihiro sinda na maglingkod ki Jehova. Dagkahon an mga kapagtubod. Lubos na aprobetsaran an ano man na panahon na itotogot pa ni Jehova. Kun siring, an paghalat ki Jehova nungkang magigin “kasakitan sa puso” nindo. Imbes, magtatao iyan saindo nin kagayagayahan!
Ikapaliliwanag Daw Nindo?
• Paano si Jesus nagpaheling nin mapaghalat na aktitud?
• Sa anong mga situwasyon kaipuhan kan mga Kristiano an mapaghalat na aktitud?
• Taano an mga Saksi ni Jehova ta kontento nang maghalat ki Jehova?
• Paano an paghalat ki Jehova magigibong gikanan nin kagayagayahan?
[Mga Ritrato sa pahina 12]
Si Jesus nagtios huli sa kagayagayahan na ibinugtak sa atubangan nia
[Ritrato sa pahina 13]
Dawa pakatapos nin dakol na taon nin paglilingkod, puede tang mapagdanay an satong kagayagayahan
[Mga Ritrato sa pahina 15]
Minilyon an naparahay an saindang buhay paagi sa pagigin Saksi ni Jehova