Kun Paano Magigin mga Inaadalan sa Biblia an mga Napasakamotan nin mga Magasin
1. Ano an pasohan niato ngonyan na Abril asin sa Mayo?
1 Ngonyan na Abril asin Mayo, itatampok niato An Torrengbantayan asin Awake! na may pasohan na makapoon nin mga pag-adal sa Biblia sa librong Itinotokdo kan Biblia sa saindong pagdalaw liwat. Nasa ibaba an nagkapirang suhestion na puedeng makatabang. Girumdomon na maninigong ibagay ini sa saindong teritoryo asin sabihon sa sadiri nindong mga tataramon. Magin libre na gumamit nin iba pang pamamaagi kun iyan epektibo para sa saindo.
2. Paano niato magagamit an mga pahina sa kapinonan kan librong Itinotokdo kan Biblia sa pagpoon nin pag-adal sa Biblia?
2 Gamiton an mga Pahina sa Kapinonan: An sarong opsion iyo na magsabi nin arog kaini pagdalaw liwat nindo: “An magasin na iwinalat ko saindo dinadara an atension sa Biblia. Mangnoha kun taano ta importanteng marhay an pagbasa sa Biblia.” Basahon an Isaias 48:17, 18; Juan 17:3; o saro pang angay na teksto. Dangan pakatapos na iintrodusir an librong Itinotokdo kan Biblia asin pakatao nin kopya sa kagharong, puede kamong magpadagos siring kan minasunod:
◼ “An Biblia nagtatao sa sato nin tunay na paglaom para sa ngapit.” Ipaheling sa kagharong an pahina 4-5 asin maghapot, “Arin sa mga panugang ini an boot mong maheling na maotob?” Giyahan an kagharong sa kapitulo na nagtotokar kan panuga sa Kasuratan na pinili nia, asin ipakipag-olay sa halipot an saro o duwang parapo kun togot an kagharong.
◼ O puede nindong sabihon, “Sinisimbag kan Biblia an pinakaimportanteng mga hapot sa buhay.” Darahon an atension kan kagharong sa pahina 6, asin hapoton kun napag-isip-isip na daw nia an manongod sa arin man na mga hapot na nasa ibaba kan pahinang iyan. Buksan an kapitulo na nagtatao kan simbag, asin ipakipag-olay sa halipot an saro o duwang parapo.
◼ O puede nindong itokdo an nagkapira sa mga tema na nasa lista nin mga laog asin hapoton kun arin sa mga temang iyan an interesante para sa saiya. Buksan an kapitulong iyan, asin idemonstrar sa halipot an sarong pag-adal sa Biblia.
3. Paano kita makakapoon nin pag-adal sa Biblia pakatapos na makapasakamot nin mga magasin na nagtotokar dapit sa (a) naggagrabeng mga kamugtakan sa kinaban? (b) pamilya? (c) pagkamasasarigan kan Biblia?
3 Magwalat nin Sarong Hapot sa Enot na Pagdalaw: An saro pang opsion iyo na magbugtak nin pundasyon sa enot na pagdalaw para sa pagdalaw liwat. Pakatapos na akoon kan kagharong an mga magasin, magpalataw nin sarong hapot asin manuga na simbagon iyan sa masunod na pagdalaw nindo. Hingoahon na gumibo nin depinidong mga areglo na madalaw liwat, asin seguradohon na otobon an olayan. (Mat. 5:37) Sa pagdalaw liwat nindo, ipagirumdom sa kagharong an hapot, asin basahon saka ipakipag-olay sa halipot an saro o duwang espesipikong parapo sa librong Itinotokdo kan Biblia na masimbag sa hapot. Tawan sia nin kopya tangani na makasubaybay sia. Uya an nagkapirang halimbawa.
◼ Kun an magasin na ikinapasakamot nindo nagtotokar dapit sa naggagrabeng mga kamugtakan sa kinaban, puede nindong sabihon, “Sa masunod puede niatong pag-olayan an simbag kan Biblia sa hapot na ini, Anong mga pagbabago an gigibohon nin Dios digdi sa daga?” Gamiton an pahina 4-5 sa pagdalaw liwat nindo. O puede nindong palatawon an hapot na ini, “Kabotan daw nin Dios an mga trahedya?” Sa pagdalaw liwat, ipaheling sa kagharong an parapo 7-8 sa kapitulo 1.
◼ Kun an magasin na ikinapasakamot nindo nagtotokar dapit sa pamilya, bago maghale puede nindong palatawon an hapot na ini, “Ano an magigibo nin lambang miembro kan pamilya tangani na magin mas maogma an buhay pampamilya?” Sa pagdalaw liwat nindo ipakipag-olay an parapo 4 sa kapitulo 14.
◼ Kun an magasin na ikinapasakamot nindo nagtotokar dapit sa pagkamasasarigan kan Biblia, puede nindong palatawon an hapot na ini para sa masunod na pag-oolay nindo, “An Biblia daw daing kasalasala kun dapit sa siensia?” Sa pagdalaw liwat nindo, ipakipag-olay an parapo 8 sa kapitulo 2.
4. Ano an maninigo niatong gibohon kun an kagharong dai mag-ako kan librong Itinotokdo kan Biblia?
4 Sa katapusan kan kada pag-oolay, magpalataw nin saro pang hapot na sisimbagon sa masunod na pagdalaw. Oras na maestablisar an regular na pag-adal, pag-olayan an libro sa sistematikong paagi poon sa kapinonan sagkod sa katapusan. Ano kun dai mag-ako an kagharong kan librong Itinotokdo kan Biblia? Puede pa man giraray nindong padagos na darahan sia nin mga magasin asin makipag-olay sa saiya sono sa Kasuratan. Mantang kinukultibar nindo an saiyang interes, tibaad pag-abot nin panahon mag-ako sia nin pag-adal sa Biblia.
5. Taano ta maninigo kitang maghingoa na labi pa an gibohon kisa pagwalat sana nin mga magasin sa mga tawo?
5 Tinawan kita ni Jesus nin instruksion na ‘gumibo nin mga disipulo, na tokdoan sinda.’ (Mat. 28:19, 20) Kun siring, an pinakapasohan niato kun nagwawalat nin mga magasin iyo na itokdo an katotoohan sa mga sadiosan an puso. Ngonyan na Abril asin sa Mayo, gumibo nin espesyal na paghihingoa na makapoon nin pag-adal sa Biblia pakatapos na makapasakamot kan An Torrengbantayan asin Awake!